ၸဝ်ႈၼႃႈတီႈပလိၵ်ႈထႆး ၵူတ်ႇထတ်းတီႉၺွပ်းလႆႈ ၵူၼ်းလၵ်ႉလွမ်ၶဝ်ႈမိူင်းထႆး တီႈၵဵင်းမႆႇ၊ ပဵၼ်ၵူၼ်းမိူင်းႁူမ်ႈတုမ်မၢၼ်ႈ – ဝႃႈၼႆ။

ဝၼ်းတီႈ 27 /06/2019 ၸဝ်ႈၼႃႈတီႈႁူင်းပလိၵ်ႈ ဝဵင်းၵဵင်းမႆႇလႄႈ မႄႈႁွင်ႈသွၼ် ႁူမ်ႈၵၼ်ၵူတ်ႇထတ်းတီႉၺွပ်းလႆႈ ၵူၼ်းၶဝ်ႈမိူင်းၽိတ်းပၵ်းပိူင်မၢႆမီႈ တီႈၸႄႈဝဵင်းႁွတ်ႉ ၸႄႈတွၼ်ႈၵဵင်းမႆႇ ၸိုင်ႈထႆး ။ ဢၼ်ပလိၵ်ႈထႆးတီႉလႆႈၼၼ်ႉ ပဵၼ်   ၼၢင်းဢေးၵီႇ၊ ၼၢင်းၼေႃႇ ၸိူဝ်းၼႆႉတင်းမူတ်းမီး 10 ၵေႃႉ ။

ၼၢင်းၶမ်း ၵူၼ်းႁဵတ်းၵၢၼ်ၼႂ်းဝဵင်းၵဵင်းမႆႇ လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ “ မိူဝ်ႈလဵဝ်ၼႆႉ ဢမ်ႇမိူၼ်မိူဝ်ႈၵွၼ်ႇယဝ်ႉ ဢမ်ႇ မီးဝတ်းၼႆႉယူႇယၢပ်ႇၼႃႇ ၊ ဢမ်ႇမီးၵူၼ်းႁပ်ႉႁဵတ်းၵၢၼ် ၊ ၵႂႃႇလႂ်မႃးလႂ်ၵေႃႈ ဢမ်ႇလႆႈ ၊ ႁၼ်ၸဝ်ႈ ၼႃႈတီႈၶဝ်ၵူတ်ႇ ထတ်း ယူႇၵူႈဝၼ်းဢေႃႈ ” ဝႃႈၼႆ။

ယၢမ်းလဵဝ်ၼင်ႇႁိုဝ်ၵူၼ်းမိူင်းပေႃးတေ ၵႂႃႇမႃးႁႃၵၼ်ငၢႆႈ ႁႂ်ႈၶဝ်ႈမိူင်း ဢွၵ်ႇမိူင်းၸွမ်းၼင်ႇမၢႆမီႈ ဝၢၼ်ႈမိူင်းမီးၼၼ်ႉ လူင်ပွင်ၸိုင်ႈဝၢၼ်ႈမိူင်းၽႂ်မၼ်း လႆႈၵပ်းသၢၼ်တင်း လၢႆလၢႆမိူင်းသေ ႁဵတ်းပၼ် ဝႂ်ၶၢမ်ႈမိူင်းယူႇႁင်းၽႂ်မၼ်း။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ပႃႇတီႇႁူဝ်သိူဝ်လၢတ်ႈဝႃႈ – “ ၵဵဝ်ႇလူၺ်ႈလွင်ႈဢၼ် ပီႈၼွင်ႉၼႂ်းမိူင်း ႁဝ်း ၵႂႃႇႁဵတ်းၵၢၼ်တၢင်ႇမိူင်း ႁႂ်ႈပေႃးမီးၵုင်ႇသိၵ်ႈၶႃႇလႄႈ ဢမ်ႇထုၵ်ႇၺႃး ပိူၼ်ႈတဵၵ်းတဵင်ၼၼ်ႉ ၼႂ်းသၽႃးၵေႃႈ ႁဝ်းဢုပ်ႇၵၼ်ယူႇ ၊ ပေႃးႁႂ်ႈလီၼႆႉ ႁႂ်ႈပီႈၼွင်ႉႁဝ်းလဵပ်ႈႁဵၼ်း လွင်ႈပၵ်းပိူင်ၼမ်ၼမ် ႁဵတ်းဝႂ်ၶၢမ်ႈမိူင်း ႁႂ်ႈထုၵ်ႇမႅၼ်ႈသေ ၸင်ႇဢွၵ်ႇမိူင်းၼႆႉလီလိူဝ်ပိူၼ်ႈ ယဝ်ႉ ” ဝႃႈၼႆ။

တႄႇဢဝ် လိူၼ်ၵျႅၼ်ႊၼိဝ်ႊရီႊ 2019 မႃး တေႃႇထိုင် ၼႂ်းလိူၼ်ၵျုၼ်ႊၼႆႉ ႁႅင်းၵၢၼ်ယၢၼ်မိူင်း ဢၼ်ၺႃးတီႉသေ ထုၵ်ႇ သူင်ႇတူဝ်ပွၵ်ႈ တၢင်းတႃႈၶီႈလဵၵ်းမီး1,046 ၵေႃႉယဝ်ႉ။ ပဵၼ် ၽူႈၸၢႆး 679 ၵေႃႉ၊ ၽူႈယိင်း 344 ၵေႃႉလႄႈ လုၵ်ႈဢွၼ်ႇ 33 ၵေႃႉ – ဝႃႈၼႆ ။