Friday, March 29, 2024

ပၢင်ၼေၶူဝ်းၸဝ်ႈၾႃႉတႆး တီႈႁူင်းၼေပိုၼ်းတႃႈၵုင်ႈ ၵိုၼ်းၶွၼ်ႈလီ လုၵ်ႈလၢၼ်ၸဝ်ႈၾႃႉတႆးမႃးၶဝ်ႈႁူမ်ႈတင်းၼမ်

Must read

ပၢင်ပိုတ်ႇပၢင်ၼေၶူဝ်းၸဝ်ႈၾႃႉတႆး တီႈႁူင်းၼေပိုၼ်း ဝဵင်းတႃႈၵုင်ႈ ၵိုၼ်းၶွၼ်ႈလီ။ လုၵ်ႈလၢၼ်ၸဝ်ႈၾႃႉမႃးၶဝ်ႈႁူမ်ႈ  20 ပၢႆ။

Photo Credit to Ying Cherry- ႁူင်းၼေပိုၼ်း တီႈဝဵင်းတႃႈၵုင်ႈ

ဝၼ်းတီႈ 09/06/2019 ၼၢင်းလၢဝ်ငိုၼ်း ၽူႈၸိသင်ႇ တီႈႁူင်းၼေပိုၼ်း တႃႈၵုင်ႈ ဢွၼ်ႁူဝ်ၸတ်းႁဵတ်းပၢင်ၼေၶူဝ်းၸဝ်ႈၾႃႉတႆး (ၸဝ်ႈၾႃႉလူင်ႇယွင်ႁူၺ်ႈ) ၊ယၢမ်းၵၢင်ၼႂ် 9 မူင်း ပိုတ်ႇပၢင်၊ တေဢၢၼ်းၼေၶူဝ်းၸဝ်ႈၾႃႉၼႆႉ တေႃႇထိုင်ဝၼ်းတီႈ 18 လိူၼ်ၵျုၼ်ႊ ၼႆႉဝႃႈၼႆ။

- Subscription -

တီႈပၢင်ပိုတ်ႇပၢင်ၼေသိူဝ်ႈၶူဝ်းၸဝ်ႈၾႃႉၼၼ်ႉ ၼၢင်းလၢဝ်ငိုၼ်း မွၵ်ႇလၢတ်ႈဝႃႈ – “ မွၵ်ႇထိုင်ၵူႈၸဝ်ႈၵူႈၵူၼ်း မႃးလဵပ်ႈႁဵၼ်းလႆႈ ၾရီး (ဢမ်ႇသဵင်ႈၵႃႈသဵင်ႈႁူဝ်) ၶႃႈ။ ႁဝ်းၶႃႈတေၼေတေႃႇထိုင်ဝၼ်းတီႈ 18 တီႈႁူင်းၼေပိုၼ်းတႃႈၵုင်ႈၼႆႉသေ ပေႃးဝႃႈပီႈၼွင်ႉႁဝ်းၶဝ် ၸိူဝ်းဢမ်ႇလႆႈမႃးၶဝ်ႈႁူမ်ႈလဵပ်ႈႁဵၼ်းတီႈၼႆၼႆၵေႃႈ ပေႃးႁဝ်းၶႃႈယဝ်ႉတီႈၼႆႈယဝ်ႉ တေဢဝ်မိူဝ်းဝႆႉၶိုၼ်းတီႈႁေႃလူင်ယွင်ႁူၺ်ႈ ၶိုၼ်းၶႃႈ။ ဢွၼ်ၵၼ်မိူဝ်း လဵပ်ႈႁဵၼ်း မိူဝ်းတူၺ်းတီႈႁေႃယွင်ႁူၺ်ႈ သေၵမ်းၶႃႈ ” – ဝႃႈၼႆ။

Photo Credit to Ying Cherry- ၼၢင်းလၢဝ်ငိုၼ်း ၽူႈၸိသင်ႇ တီႈႁူင်းၼေပိုၼ်း တႃႈၵုင်ႈ မွၵ်ႇလၢတ်ႈၶေႃႈၵႂၢမ်းတီႈပၢင်ပိုတ်ႇပၢင်ၼေၶူဝ်းၸဝ်ႈၾႃႉတႆး

ၶူဝ်းၶွင် ၶိူဝ်းၸဝ်ႈၾႃႉလူင် ယွင်ႁူၺ်ႈ ဢၼ်ၼေၵႂႃႇမိူဝ်ႈဝႃးၼႆႉၼၼ်ႉ ပဵၼ်ၶူဝ်းၼုင်ႈတၢင်းဝႆလႄႈ ၶူဝ်းၸႂ်ႉတိုဝ်းၵမ်ႈၽွင်ႈ မီး 30 ယၢင်ႇ။ ပဵၼ်ဢၼ်တူဝ်ၼၢင်းလၢဝ်ငိုၼ်းၵႂႃႇဢဝ်တီႈႁေႃယွင်ႁူၺ်ႈသေ မႃးသၵ်ႉ သုၵ်ႈသီ မူၼ်ႉမေး မိူဝ်ႈပီႈၵၢႆၼႆႉၼၼ်ႉ ဝႃႈၼႆ။

ၸဝ်ႈႁေႇမႃႇတႅၵ်ႈ လုၵ်ႈယိင်းၸဝ်ႈၾႃႉလူင်ယွင်ႁူၺ်ႈ ၸဝ်ႈသူၺ်ႇတႅၵ်ႈလၢတ်ႈဝႃႈ- “ၶဝ်ဢဝ်ၶိူင်ႈၸၢၵ်ႈဢၼ်ၶိုတ်းၵၢပ်ႈပၢၼ်သေ သၵ်ႉပၼ်၊ သုၵ်ႈသီပၼ်။ တီႈဢၼ်မႆမၼ်းၶၢတ်ႇၵႂႃႇယွၵ်းၵႂႃႇၸိူဝ်းၼႆႉၵေႃႈၶိုၼ်းမေးယဵပ်ႉပၼ်သေ လုမ်းလႃးဝႆႉပၼ်ၶိုၼ်း ႁႂ်ႈၶူဝ်းၸိူဝ်းၼႆႉဝႆႉလႆႈ ၼေလႆႈထႅင်ႈႁိုင်ႁိုင်။ ဢၼ်ပႃႈပႃႈၶဝ်လႆႈႁၼ်တႄႉ ႁွႆးမိုဝ်းဢမ်ႇပိူင်ႈ ဢမ်ႇၵွႆသေဢမ်ႇၵႃး ယင်းပၢႆမႂ်ႇမႃး ၶႅမ်ႉမႃးထႅင်ႈၵွၼ်ႇ ။ လီၸူမ်းသိူဝ်းတႄႉတႄႉ” – ဝႃႈၼႆ။

Photo Credit to Sao Shur Fa – လုၵ်ႈလၢၼ်ၸဝ်ႈၾႃႉတႆးၸိူဝ်းမႃးၶဝ်ႈႁူမ်ႈ ပၢင်ၼေၶူဝ်းၸဝ်ႈၾႃႉတႆး ႁူမ်ႈၵၼ်ထၢႆႇႁၢင်ႈမၢႆတွင်း

 

ၶူဝ်းၸဝ်ႈၾႃႉတီႈႁေႃယွင်ႁူၺ်ႈၼႆႉ ဢဝ်ၵႂႃႇသၵ်ႉတီႈတႃႈၵုင်ႈမိူဝ်ႈႁူဝ်ပီ 2018။ လႆႈဢဝ်ၶၢဝ်းယၢမ်း သၵ်ႉသုၵ်ႈသီမႄး 1 ပီပၢႆ3 လိူၼ် ၸင်ႇယဝ်ႉတူဝ်ႈ။ ပဵၼ်ၶူဝ်းၸႂ်ႉသွႆ 270 ဢၼ်လႄႈ ၶူဝ်းၼုင်ႈၸဝ်ႈၾႃႉ 138 ၸုမ်ႇ။ ၵူၺ်းၵႃႈ ဢၼ်ဢဝ်မႃးၼေတီႈတႃႈၵုင်ႈၼႆႉ ပဵၼ်ၶူဝ်းၼုင်ႈ 11 ၸုမ်ႇလႄႈ ၶူဝ်းၸႂ်ႉသွႆ  ၊ ႁူမ်ႈၵၼ်မီး 30 ယၢင်ႇ ဝႃႈၼႆ။

တီႈပၢင်ၼေၶူဝ်းၸဝ်ႈၾႃႉ ၼၼ်ႉ မီးလုၵ်ႈလၢၼ် ၸိူဝ်ႉသၢႆ ၸဝ်ႈၾႃႉ ယွင်ႁူၺ်ႈ၊ လွၵ်ႈၸွၵ်ႇ၊ မိူင်းသူႈ၊မိူင်းၼၢႆး၊ ၵဵင်းတုင်၊ သီႇပေႃႉ၊ ၸၢမ်ၵႃး၊ တွင်ႇပႅင်ႇ၊ လၢႆးၶႃႈ၊ ပၢင်လွင်း၊ ၵဵင်းတွင်း၊ မိူင်းမိတ်ႈ၊ မိူင်းယႆၸိူဝ်းၼႆႉ မႃးၶဝ်ႈႁူမ်ႈႁိမ်းၸမ် 30 ၸဝ်ႈ။

တီႈပၢင်ၼၼ်ႉ ၸွမ်ၽွင်းလူင်တိူင်းတႃႈၵုင်ႈ ဢူးၽဵဝ်းမိၼ်းတဵင်း၊ ၽွင်းလူင်ၾၢႆႇၸၢဝ်းၶိူဝ်း (ၽွင်းလူင်မိူင်းႁူမ်ႈတုမ်) ၼၢႆႇတႅတ်ႉလုၼ်ႇ၊ ၵႅမ်ၽွင်းလူင် ႁွင်ႈၵၢၼ်ၽွင်းလူင် ၾၢႆႇယဵၼ်ႇငႄႈလႄႈ သႃႇသၼႃႇ ဢူးၵျီႇမိၼ်းလႄႈ ၶႅၵ်ႇၼွၵ်ႈမိူင်းၼႂ်းမိူင်း ဢၼ်လႆႈၽိတ်ႈမွၵ်ႇဝႆႉ ဢိၵ်ႇ ပီႈၼွင်ႉတႆး လၢႆလၢႆတီႈ မႃးၶဝ်ႈႁူမ်ႈ ႁူဝ်ၵူၼ်းမီးမွၵ်ႈ 200 ။

ပၢင်ၼေၶူဝ်းၸဝ်ႈၾႃႉတႆး တီႈႁူင်းၼေပိုၼ်းတႃႈၵုင်ႈ ၵမ်းၼႆႉ ပဵၼ်ၵၢၼ်ယုၵ်ႉမုၼ်းၶူဝ်ၶွင်ၸဝ်ႈၾႃႉတႆး ႁႂ်ႈလုမ်ႈၾႃႉလႆႈႁူႉၼႆႉ ပဵၼ်ပွၵ်ႈဢွၼ်တၢင်းသုတ်းၼႂ်းပိုၼ်းလႄႈ ပဵၼ်ဢၼ်လီၸူမ်းသိူဝ်း၊ ၾၢႆႇၼိုင်ႈၵေႃႈ လႆႈႁၼ်ပႃးလုၵ်ႈလၢၼ်ၸဝ်ႈၾႃႉတႆး ၵူႈတီႈတီႈမႃးႁူပ်ႉၵၼ် ထၢႆႇႁၢင်ႈၵိုၵ်းၵၼ်လႄႈ ပဵၼ်ဢၼ်လီၶေႃးတိပ်ႇ ၶေႃးၶူမ်- ၽူႈၶဝ်ႈႁူမ်ႈၵေႃႉၼိုင်ႈလၢတ်ႈၼေၼင်ႇၼႆ။

ၶေႃႈမုၼ်း ဢၢင်ႈဢိင်ပႃးတီႈ  Mizzima ၽွင်ႈ

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း