ၼုမ်ႇတႆး 2 ပီႈၼွင်ႉ တင်း ဢူၺ်းၵေႃႉထႅင်ႈ 2 ၵေႃႉ ႁူမ်ႈၵၼ် 4 ၵေႃႉ ပၼ်ႇလူတ်ႉထိပ်ႇ လဵပ်ႈသိုင်ႇတိူင်း မိူင်းမၢၼ်ႈ – မိူင်းတႆး ပတ်းပိုၼ်ႉ ယဝ်ႉတူဝ်ႈလီငၢမ်း ၶၢဝ်းတၢင်း 4 လိူၼ်ပၢႆ။

ဝၼ်းတီႈ 03/06/2019 ယၢမ်းၵၢင်ဝၼ်း ၸၢႆးသႅင်ႁၢၼ်၊ ၸၢႆးဢွၼ်ႇၶိူဝ်း၊ ၸၢႆးထဵင်ႇလိၼ်းလႄႈ ၸၢႆးၺၢၼ်ႇလိၼ်း ႁူမ်ႈၵၼ် ပၼ်ႇလူတ်ႉထိပ်ႇ လဵပ်ႈသိုင်ႇတိူင်း မိူင်းတႆးပတ်းပိုၼ်ႉ၊ မိူင်းယၢင်းလႅင်၊ မိူင်းမွၼ်း ပွတ်းထုင်ႉလိၼ် ပဵင်းၵမ်ႈၽွင်ႈ။ ယၢမ်းလဵဝ် ပၼ်ႇႁွတ်ႈၽႅဝ် ဝဵင်းၵႃလိ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ယဝ်ႉတူဝ်လီငၢမ်းယဝ်ႉ ဝႃႈၼႆ။

ၸၢႆးဢွၼ်ႇၶိူဝ်း ၽူႈပၼ်ႇလူတ်ႉထိပ်ႇ လၢတ်ႈတီႈၽူႈတွႆႇႁွၵ်ႈဝႃႈ “ တေလႆႈဝႃႈ ထိုင်ပဝ်ႉမၢႆ ဢၼ်ႁဝ်းၶႃႈ မုင်ႈမွင်းဝႆႉၼၼ်ႉ ယဝ်ႉၶႃႈ။ မိူဝ်ႈၽွင်းပၼ်ႇလူတ်ႉထိပ်ႇယူႇၼၼ်ႉ လႆႈတူဝ်ထူပ်း ႁူႉၸၵ်းၵူၼ်းတင်းၼမ်သေ ဢမ်ႇၵႃး ၊ လႆႈလဵပ်ႈ ႁဵၼ်းပႃးထႅင်ႈ လွင်ႈယူႇသဝ်းၵိၼ်သၢင်ႈ ပီႈၼွင်ႉၵူၼ်းမိူင်းႁဝ်း တီႈၼိုင်ႈလႄႈ တီႈၼိုင်ႈ ပႅၵ်ႇပိူင်ႈၵၼ်ၸိူင်ႉႁိုဝ်  ။ ယဝ်ႉၵေႃႈ လႆႈလဵပ်ႈႁဵၼ်းပႃး ထႅင်ႈလွင်ႈသၽႃႇဝႃႉသိင်ႇဝႅတ်ႉလွမ်ႉ။  လဵပ်ႈႁဵၼ်း ပႃးထႅင်ႈ လွင်ႈမူတ်းသႂ်မိူင်းႁဝ်း ၸဵမ်ၸိူဝ်းၼႆႉထႅင်ႈလူးၵွၼ်ႇ” ဝႃႈၼႆ။

သိုပ်ႇလၢတ်ႈဝႃႈ “ ဢၼ်လႆႈပၼ်ႇလူတ်ႉထိပ်ႇၶၢဝ်းတၢင်း 4 လိူၼ်ပၢႆ  20 ဝၼ်းၼႆႉ မီးလွင်ႈယၢပ်ႇၽိုတ်ႇယူႇ မၢင်တီႈ မၢင်ပွၵ်ႈ၊ လူတ်ႉလူမ်ႉ။ လူတ်ႉၵွႆ၊ မၢၵ်ႇလူတ်ႉပွင်ႇ ၸဵမ်ၸိူဝ်းၼႆႉၵေႃႈမီးမႃး။ လွင်ႈၵိၼ်လွင်ႈယႅမ်ႉ တီႈယူႇတၼ်းသဝ်းတႄႉ ဢမ်ႇလႆႈမႆႈၸႂ်သင်ၶႃႈ ပီႈၼွင်ႉတႆးႁဝ်း ဝဵင်းလႄႈဝဵင်း တီႈလႂ်လႄႈတီႈ ႁပ်ႉတွၼ်ႈဢဝ်ပုၼ်ႈၽွၼ်း တူၺ်းလူလွမ်ၶႅမ်ႉလႅပ်ႈ ၵူႈတီႈ ၶႃႈယဝ်ႉ။ လိူဝ်ၼၼ်ႉ ၶႂ်ႈယွၼ်းၾၢၵ်ႇထိုင် ပီႈၼွင်ႉႁဝ်းၶႃႈ ၵူႈဝဵင်းဝဵင်း ၵူႈတီးတီႈ တီႈလႆႈႁပ်ႉ တွၼ်ႈလဵင်ႉလူလုမ်း လႃး ႁဝ်းၶႃႈမႃး ၸိူဝ်းၼၼ်ႉတင်းမူတ်းတင်းသဵင်ႈ ယိၼ်းၸူမ်းၶွပ်ႈၸႂ်ယႂ်ႇ တၢင်ႇၵုင်ႇထိုင် ၵူႈၵေႃႉ ၵူႈၸဝ်ႈ ယႂ်ႇၼမ်သေ ၵမ်းၶႃႈ” ဝႃႈၼႆ။

ၼုမ်ႇတႆး 2 ပီႈၼွင်ႉ ၸၢႆးသႅင်ႁၢၼ် တင်း ၸၢႆးဢွၼ်ႇၶိူဝ်းၼႆႉ တႄႇပၼ်ႇလူတ်ႇထိပ်ႇမႃး မိူဝ်ႈဝၼ်းတီႈ 13/01/2019 ပူၼ်ႉ မႃးသေ တႄႇဢဝ် ဝဵင်းၵဵင်းမႆႇ ၸိုင်ႈထႆး ပၼ်ႇၶိုၼ်ႈမႃး တၢင်းၵဵင်းႁၢႆး၊ မႄႈသၢႆ။ ၶဝ်ႈမႃးတၢင်း တႃႈၶီႈလဵၵ်း၊ တႃႈလိူဝ်ႇ၊ မိူင်း ၽျၢၵ်ႈ၊ ၵဵင်းတုင်၊ မိူင်းသၢတ်ႇ၊ မိူင်းတူၼ် ၸိုင်ႈတႆးပွတ်းဢွၵ်ႇၶူင်း။ ၶၢမ်ႈၶူင်းပၼ်ႇၵႂႃႇတၢင်း မိူင်းပၼ်ႇ၊ လၢင်းၶိူဝ်း၊ ၵဵင်း တွင်း၊ မွၵ်ႇမႆႇ၊ မိူင်းၼၢႆး၊ ၼမ်ႉၸၢင်၊ လွႆလႅမ်၊ ပၢင်လူင်၊ မိူင်းပွၼ်၊ ႁူဝ်ပူင်း၊ တူၼ်ႈတီး၊ ပၢင်လွင်း၊ ယွင်ႁူၺ်ႈ ၸိုင်ႈတႆး ပွတ်းၸၢၼ်း။ ယဝ်ႉၵေႃႈ သိုပ်ႇလူင်း ၵႂႃႇတၢင်းၸႄႈမိူင်းယၢင်းလႅင်၊ ၸႄႈမိူင်းမွၼ်း၊ တႃႈၵုင်ႈ ၸင်ႇၶိုၼ်ႈမႃးတၢင်း ၼေႇပျီႇ တေႃႇ။

လိူဝ်ၼၼ်ႉ သိုပ်ႇၵႂႃႇတၢင်းမိူင်းမၢၼ်ႈ မိူင်းပူးၵမ်ႇ၊ ဝဵင်းလိူဝ်ႇသေ သိုပ်ႇၶိုၼ်ႈၵႂႃႇ တၢင်းပၢင်ႇဢူႈလူင်၊ ၼွင်ၶဵဝ်၊ ၵျွၵ်ႉမႄး၊ လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ မူႇၸေႈ ၼမ်ႉၶမ်း၊ ၶဝ်ႈၵႂႃႇမိူင်းၶႄႇ လူင်းမႃးၶိုၼ်းၵွၼ်ၵၢင်ၸိုင်ႈတႆး တၢင်းပွတ်း မိူင်းၼွင်၊ လၢႆးၶႃႈ၊ တၢင်ႉယၢၼ်း သိုပ်ႇၶဝ်ႈၸူး တၢင်းပွတ်းပၢင်သၢင်း၊ မိူင်းၶၢၵ်ႇ၊ မိူင်းယၢင်း၊ မိူင်းလႃး၊ မိူင်းယု၊ မိူင်းယွင်း ပၼ်ႇဢွၵ်ႇမႃးတၢင်းမိူင်းၽျၢၵ်ႈ ၶိုၼ်း လူင်းၸူးတႃႈၶီႈလဵၵ်း ။ ဢွၵ်ႇဢႅဝ်ႇတၢင်းၾင်ႇထႆး မႄႈသၢႆသေ ၶိုၼ်းၶဝ်ႈၸူး တႃႇၶီႈလဵၵ်း ထိုင်ၵဵင်းတုင်၊ မိူင်း ပဵင်း ယဝ်ႉၵေႃႈ ၶၢမ်ႈၶူင်း မိူဝ်းၶိုၼ်းဝဵင်းၵႃလိ ။

ၸၢႆးဢွၼ်ႇၶိူဝ်း လၢတ်ႈဝႃႈ “ ပေႃးၶၢဝ်းၵတ်းမႃး ႁဝ်းၶႃႈ ၵူၼ်းၼုမ်ႇ ၵူႈဝဵင်း ဢၼ်တီႈႁဝ်းၶႃႈ လႆႈမႃးယင်ႉလိုဝ်ႈ မိုတ်ႈၵိုဝ်းႁူႉ ၸၵ်းၵၼ်ၼၼ်ႉ ႁဝ်းၶႃႈ ၸူဝ်းၵၼ်ဝႆႉ မီးၽႅၼ်ၵၢၼ် တေပၼ်ႇလူတ်ႉထိပ်ႇထႅင်ႈၵမ်းၼိုင်ႈ ၵူၺ်းၵႃႈ တေဢမ်ႇႁိုင်ၸိူင်ႉ ၼႆ။ တေၸႂ်ႉၶၢဝ်းယၢမ်း မွၵ်ႈဝူင်ႈသွင်ဝူင်ႈၵူၺ်း။   ပဝ်ႉမၢႆတီႉဢၼ်တေၵႂႃႇတႄႉၵေႃႈ ပႆႇၸၢင်ႈလၢတ်ႈလႆႈ တေၵႂႃႇတီႈလႂ် ဢၼ် ဝႃႈၼၼ်ႉ” ဝႃႈၼႆ။