မၢင်ၸိူဝ်း ယင်းတိုၵ်ႉမီးၸႂ်ၶႂ်ႈထၢမ်ယူႇ ႁဵၼ်းလိၵ်ႈတႆးမေႃမႃးယဝ်ႉတေဢဝ်ၵႂႃႇၸႂ်ႉတိုဝ်းတီႈလႂ်
ၼႂ်းလူၵ်ႈ(လူဝ်းၵ)လူင်ၼႆႉ ၶူဝ်းၶွင်ဢၼ်လီ မီးဢေႇ မီးၵႃႈၶၼ် ၵႃႈၶၼ်ယႂ်ႇ ၽႂ်ၵေႃႈၶႂ်ႈလႆႈၶႂ်ႈမီး ၶႂ်ႈလႆႈ သမ်ႉႁႃယၢပ်ႇ။ မၢင်သိင်ႇမၢင်ဢၼ် ပေႃးၼမ်မၢၵ်ႈလၢႆပူၼ်ႉတီႈၵေႃႈ သမ်ႉဢမ်ႇမီးၵႃႈၶၼ် ၵႃႈၶၼ်ထုၵ်ႇ ၽႂ်ၵေႃႈ ဢမ်ႇပေႃးဝႆႉၼမ်ႉၼၵ်း။
ပိူင်ႈၵၼ်တင်းလိၵ်ႈတႆးၵႂၢမ်းတႆးႁဝ်း ၵူၼ်းႁူႉၵူၼ်းမေႃဢေႇ ဢမ်ႇသူင်ၸႂ်ႉတိုဝ်း ႁူမ်ႈဝႃႈၵူၼ်းတႆးမေႃလိၵ်ႈတႆး ၵႂၢမ်းတႆး ဢမ်ႇပႅၵ်ႇၸႂ်သေတႃႉ ၵူၼ်းတႆးဢမ်ႇမေႃလိၵ်ႈတႆးၵႂၢမ်းတႆးၵေႃႈမီၼမ်ဢမ်ႇဢေႇ။ ၵူၼ်းႁူႉၵူၼ်းမေႃ ၵူၼ်းၶႂ်ႈတႅမ်ႈ ၶႂ်ႈလၢတ်ႈမီးဢေႇ မၢင်တီႈမၢင်လႂ်ဢဝ်လိၵ်ႈတႆးၵႂၢမ်းတႆး လၢတ်ႈတေႃႇပိူၼ်ႈ တႅမ်ႈတေႃႇပိူၼ်ႈၵေႃႈ ပိူၼ်ႈဢမ်ႇႁူႉလႄႈ ၵူၼ်းမေႃၵေႃႈဢမ်ႇၶႂ်ႈလၢတ်ႈၶႂ်ႈတႅမ်ႈ လိူဝ်သေႁဝ်းႁႃးၼင်ႇၵၼ်တႅမ်ႈၸူးၵၼ်ၵူၺ်း။ ယႃႇဝႃႈပိူၼ်ႈလႃႈ တေႃႈတႆးႁဝ်းၵူၺ်း မၢင်ၵေႃႉယင်းဝႃႈ လၢတ်ႈၵႂၢမ်းတႆး တႅမ်ႈလိၵ်ႈတႆးၼႆႉ မိူၼ်ႁၢင်ႈ ဢမ်ႇထိုင်ဢူၵ်းထိုင်ၸႂ် ဢမ်ႇမိူၼ်ဢူၵ်းမိူၼ်ၸႂ် ၼႆၵေႃႈမီး။ ထွႆႈၵႂၢမ်း(ဝေႃးႁၢရ်)ၵေႃႈဢမ်ႇၸေး ဢမ်ႇတဵမ် ထူၼ်ႈၼႆယူႇ။ ယွၼ်ႉၼၼ် ၸင်ႇဢမ်ႇၶႂ်ႈတႅမ်ႈဢမ်ႇၶႂ်ႈလၢတ်ႈ ပေႃးတႅမ်ႈပေႃးလၢတ်ႈၵေႃႈ လႆႈဢဝ်ထွႆႈၵႂၢမ်း ပိူၼ်ႈမႃးၶူၼ်းၶဝ်းသုၼ်လေႃးၵမ်ႈၼမ်။
ၵူၼ်းႁုၼ်ႈသႅၼ်းမႂ်ႇၵေႃႈ ဢမ်ႇမီးၸႂ်ၶႂ်ႈႁူႉၶႂ်ႈမေႃ မေႃယဝ်ႉတေဢဝ်ၵႂႃႇၸႂ်ႉတီႈလႂ် တေဢဝ်ၵႂႃႇၸႂ်ႉၼႂ်းလုမ်း ၼႂ်းၸၢႆး ပဵၼ်တၢင်းၵၢၼ်ၵေႃႈဢမ်ႇလႆႈ၊ ၸႂ်ႉၼႂ်းၶွမ်ႊပၼီႊတီႈႁဵတ်းၵၢၼ်ၵေႃႈဢမ်ႇလႆႈ၊ တေၵႂႃႇသွၵ်ႈသေႃႉႁႃ ၶေႃႈမုလ်းတၢင်းႁူႉတၢင်းႁၼ် ၼႂ်း Google ၸိူဝ်းၼႆႉၵေႃႈ ဢမ်ႇမီးလိၵ်ႈတႆး။ တေၵႂႃႇႁႃလိၵ်ႈလူင်ၸိူဝ်းၼႆႉၵေႃႈ ပဵၼ်လွင်ႈထမ်းမထမ်းမူဝ်း လွင်ႈလူႇလွင်ႈတၢၼ်းၵူၺ်း။ ၶႂ်ႈလႆႈတၢင်းႁူႉၶေႃႈမုလ်းမႂ်ႇမႂ်ႇ ဢၼ်ၶိုတ်းၵၢပ်ႈပၢၼ် ၼၼ်ႉ တၵ်းတေလႆႈမေႃလိၵ်ႈပိူၼ်ႈတၢင်ႇၸိူဝ်ႉတၢင်ႇၶိူဝ်းၸင်ႇၸၢင်ႇၵႂႃႇဢၢၼ်ႇလဵပ်ႈႁဵၼ်းႁူႉလႆႈ။ ၵွပ်ႈၼႆ ၸင်ႇၵႂႃႇဝႆႉၼမ်ႉၼၵ်းၼိူဝ်လိၵ်ႈပိူၼ်ႈၵႂၢမ်းပိူၼ်ႈပူၼ်ႉတီႈႁႅင်းလိူဝ်လိၵ်ႈတႆးၵႂၢမ်းတႆး။
မိူဝ်ႈလဵဝ် ႁူမ်ႈဝႃႈပပ်ႉလိၵ်ႈၽိုၼ်လၢႆးဢၼ်ပၼ်တၢင်းႁူႉတၢင်းႁၼ် ယင်းမီးမေႃတႅမ်ႈလိၵ်ႈၶဝ်ၵမ်ႈၽွင်ႈ တႅမ်ႈဢွၵ်ႇမႃးဝၢင်းပိုၼ်ၽႄႈၼႆၵေႃႈ ၵူၼ်းသူင်လူသူင်ဢၢၼ်ႇယင်းတိုၵ်ႉလဵၵ်ႉၵေႇဢေႇမၢင် ၵူၼ်းတႅမ်ႈၵေႃႈ တိုၵ်ႉဢေႇ ပႆႇမီးၵူႈလွင်ႈ။
ပၢႆသေလိူဝ်ႁဝ်းဢမ်ႇမီးဢမ်းၼၢၸ်ႈပွင်မိူင်း ဢမ်ႇၸၢင်ႈဝၢင်းၽႅၼ်ၵမ်ၸႃတႃႁဝ်းလႆႈ ဢမ်ႇၸၢင်ႈဢဝ်ၶဝ်ႈသွၼ် ၼႂ်းႁူင်းႁဵၼ်းလႆႈၵူႈႁူင်းႁဵၼ်း လုၵ်ႈဢွၼ်ႇၵိူတ်ႇယႂ်ႇမႃးၵႂႃႇႁူင်းႁဵၼ်းၵေႃႈလႆႈႁဵၼ်းလိၵ်ႈပိူၼ်ႈတၢင်ႇၶိူဝ်းၵမ်းလဵဝ် လိၵ်ႈႁဝ်းသမ်ႉလႆႈထုၵ်ႇပိုၼ်ႉပွႆႇဝႆႉ ထိုင်မႃးၶၢဝ်းမႆႈၶၢဝ်းႁိူင်ၽွင်းဢိုတ်းႁူင်းႁဵၼ်း ၸင်ႇလႆႈပိုတ်ႇပၢင်သွၼ် ပၼ်ၵၼ်ၸူဝ်ႈၶၢဝ်းတၢင်းဢွၼ်ႇ 1 လိူၼ် 2 လိူၼ်ၵူၺ်း လိၵ်ႈပိူၼ်ႈၵႂၢမ်းပိူၼ်ႈတႄႉလႆႈႁဵၼ်း တင်ႈတႄႇ ပေႃႈမႄႈဢဝ်ၵႂႃႇၾၢၵ်ႇၶဝ်ႈႁူင်းႁဵၼ်းၸဵမ်လဵၵ်ႉ မၢၵ်ႇဢွၵ်းဢေႃလႆႈႁပ်ႉပွၼ်ႈသႂ်ႇလိၵ်ႈပိူၼ်ႈၵႂၢမ်းပိူၼ်ႈၽွင်းလဵၵ်ႉ ၽွင်းၼုမ်ႇ ၾင်သႂ်ႇၼႂ်းဢွၵ်းဢေႃမႃး။
ယွၼ်ႉၼၼ်ႉၸင်ႇ လွင်ႈၸႂ်တိတ်းၸႂ်ပႅၼ်းဢေႇ ယူႇၼႂ်းႁူင်းႁဵၼ်း ႁဵၼ်းလိၵ်ႈပိူၼ်ႈလၢတ်ႈၵႂၢမ်းပိူၼ်ႈ 8 ၸူဝ်ႈ မူင်း ယူႇႁိူၼ်းလၢတ်ႈၵႂၢမ်းတႆးတေႃႇပေႃႈတေႃႇမႄႈ 4 ၸူဝ်ႈမူင်းတေမီးလၢႆၶေႃႈ။ ပၢႆလႆႈထုၵ်ႇတဵၵ်းငႅၼ်ႉ ၼုင်ႈၶူဝ်းလုၵ်ႈႁဵၼ်း ဢၼ်ပဵၼ်ၶူဝ်းပိူၼ်ႈၾိင်ႈပိူၼ်ႈ။ ဝၢႆးပွၵ်ႈမႃးႁိူၼ်း မၢင်ၸိူဝ်းပေႃႈမႄႈပၢႆဢွၼ်လၢတ်ႈၵႂၢမ်း ပိူၼ်ႈထႅင်ႈလူးၵွၼ်ႇ။ ယႂ်ႇမႃးသမ်ႉ ပိူၼ်ႈတဵၵ်းသႂ်ႇပၼ်ၸိုဝ်ႈ ဢူး မ ၼမ်းၼႃႈၸိုဝ်ႈ တူဝ်ၸၢႆး တူဝ်ၼၢင်းထႅင်ႈ။ တင်းၾိင်ႈတင်းလိၵ်ႈလၢႆးၵႂၢမ်းလၢတ်ႈ ထုၵ်ႇဢိုၼ်ႁၢႆၵႂႃႇလွႆးလွႆးလႄႈယႃႇဝႃႈတေယူႇထိုင်ပၢၵ်ႇပီ 50 ပီၵူၺ်းၵေႃႈ ၸွင်ႇႁဝ်းတေၵိုတ်းလိူဝ်သင်ၵႃႈႁိုဝ်။
ဢၼ်ၵဝ်ႇၵေႃႈတေလႆႈၵဵပ်းပူပူၵ်းပွင်ယူၵ်ႉမုလ်း ဢၼ်မႂ်ႇၵေႃႈတေလႆႈႁဵတ်းသၢင်ႈ ဢမ်ႇၸႂ်ႈ 4 ၼိဝ်ႉတူမ်း 5 ႁူး ပဵၼ် 4 ၼိဝ်ႉ တူမ်းသိပ်းသၢဝ်းႁူးလႄႈမၼ်းႁိုဝ်ႁွၼ်ႇတူဝ်ႈ။ ဢၼ်ႁူဝ်ႈသမ်ႉႁူဝ်ႈလၢႆႁူး ဢၼ်သႂ်ႇဢၼ်ထႅမ် သမ်ႉႁူးလဵဝ်။
ၵၢၼ်လိၵ်ႈလၢႆးႁဝ်းၵူႈဝၼ်းၼႆႉ ႁႅင်းဢူၼ်ႈတႄႉတႄႉ လုၵ်ႈဢွၼ်ႇဢၼ်ၵိူတ်ႇမႃးမႂ်ႇ ၸွင်ႇသမ်ႉတေၶႂ်ႈႁဵၼ်း ၶႂ်ႈႁုမ် ၸွင်ႇသမ်ႉတေမီးတိုဝ်ႉလႆႈႁဵၼ်း။ ၵူၼ်းလူင်မိူဝ်ႈၼႆႉ ၸင်ႇသမ်ႉသူင်တႅမ်ႈသူင်ၸႂ်ႉ ၸွင်ႇသမ်ႉတေမီးၶၢဝ်း ယၢမ်းၸႂ်ႉတိုဝ်း။ ႁူမ်ႈဝႃႈၼႂ်း facebook, Line ၸိူဝ်းၼႆႉ ၸွမ်းၵၢပ်ႈပၢၼ်သေလႄႈမိူဝ်ႈလဵဝ် ႁူမ်ႈဝႃႈႁဝ်းမီး တိုဝ်ႉတၢင်းတႅမ်ႈလိၵ်ႈတႆးႁဝ်းတိတ်းတေႃႇၸူးၵၼ်လႆႈၵေႃႈ သမ်ႉမႃးမီးပၼ်ႁႃ ၵေႃႉၼိုင်ႈမီးၾွၼ်ႉၵျေႃႇၵျီႇ ၵေႃႉၼိုင်ႈၸႂ်ႉၾွၼ်ႉ Unicode သမ်ႉဢမ်ႇပွင်ႇၵၼ်ထႅင်ႈ။ ၽူႈႁူႉၽူႈႁၼ် ၽူႈယႂ်ႇၵူၼ်းလူင်ႁဝ်းၶဝ် ၶႆႈၸႂ် တႃႇမိူဝ်းၼႃႈဝႆႉၸိူင်ႉႁိုဝ်။
ၽူႈတွႆႇႁွၵ်ႈ/မႅၵ်ႉၷသိၼ်ႊ
ၶေႃႈမုလ်း – ၽူႈတွႆႇႁွၵ်ႈ မၢႆ 006, July 2018
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ