ၸဝ်ႈၶူးၿႃး ပရႃႊၽတ်းၸၼ်တရင်းသီ ဝတ်ႉၵူႇတဝ်ႈ မွပ်ႈတၢင်းၵိၼ်ယႅမ်ႉ ၶူဝ်းၶွင်ႁႅင်ႈၶွင်ႁိူင်ပၼ်ၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႂ်ႇ ၵႂႃႇၸႅၵ်ႇၸၢႆႇ ၸွႆႈထႅမ်ပီႈၼွင်ႉတႆး ၸိူဝ်းလႆႈထုၵ်ႇၵိုတ်းယုတ်းလႄႈ ႁၢမ်းႁႅၵ်းၵၢၼ်ငၢၼ်းထူပ်း တၢင်းတုၶ်ႉယၢၵ်ႈၵိၼ်းၸႂ် လွင်ႈယူႇၵိၼ် ၼႂ်းၵဵင်းမႂ်ႇ ယွၼ်ႉတၢင်းပဵၼ်ၸိူဝ်ႉမႅင်းဝႆႊရသ်ႊ ၶူဝ်ႊဝိတ်ႉ COVID-19 ဢၼ် ၽႄႈၸွတ်ႇတူဝ်ႈ ယူႇယၢမ်းလဵဝ်။
ဝၼ်းတီႈ 7/4/2020 ယၢမ်းၵၢင်ဝၼ်း ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႂ်ႇ လႆႈႁပ်ႉဢဝ်ၶူဝ်းၶွင်ၵိၼ်ၶွင်ယႅမ်ႉ သႅၼ်းႁႅင်ႈ သႅၼ်းႁိူင် တီႈၸဝ်ႈၶူးၿႃး ပရႃႊၽတ်းၸၼ်တရင်းသီ ၸဝ်ႈၵွၼ်းဝတ်ႉၵူႇတဝ်ႈ ဢိူင်ႇသီၽုမ်း ဢိၵ်ႇတင်း ပဵၼ်ၸဝ်ႈ ၽူႈၵွၼ်းၸႄႈဝဵင်းၵဵင်းမႂ်ႇသေ လႆႈဢဝ်ၶူဝ်းၶွင်ၸဝ်ႈၶူးၿႃးႁဝ်း လူင်းၵႂႃႇၸႅၵ်ႇ ၸွႆႈပၼ်ပီႈၼွင်ႉတႆးႁဝ်း ၸိူဝ်းထုၵ်ႇပေႃႈ လဵင်ႉမႄႈလဵင်ႉ ၵိုတ်းၸၢင်ႈၵၢၼ်ၸၢင်ႈငၢၼ်းလႄႈ ႁၢမ်းႁႅၵ်းၼႃႈၵၢၼ် ဢမ်ႇမီးတႃႇၵိၼ်တႃႇယႅမ်ႉ ထူပ်းတၢင်းယၢပ်ႇၽိုတ်ႇ တုၵ်ႉၵိၼ်းၸႂ်ၵမ်ႈၽွင်ႈ။
ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႂ်ႇ လႆႈဢဝ်ၶူဝ်းၶွင်လူင်းၵႂႃႇၸွႆႈၸႅၵ်ႇယိုၼ်ႈဝႅင်ႇ ၸႅၵ်ႇၸွႆႈထႅမ်ပၼ်ပီႈၼွင်ႉတႆး ၼႂ်းတူင်ႇပိုၼ်ႉတီႈၼႂ်းၵဵင်းမႂ်ႇ ၸိူဝ်းတီႈႁႅင်းၵၢၼ်ပီႈၼွင်ႉတႆးယူႇသဝ်း မိူၼ်ၼင်ႇမူႇဝၢၼ်ႈၼၼ်းထရၢမ်းသႃရၾီး လႄႈ မူႇဝၢၼ်ႈတူၼ်ႈပဝ်း ၸိူဝ်းၼႆႉ။
ၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇလၢတ်ႈတီႈၽူႈတွႆႇႁွၵ်ႈဝႃႈ“မိူဝ်ႈဝႃးၼႆႉ ၸဝ်ႈၶူးၿႃးပရႃႊၽတ်း ၸၼ်တရင်းသီ ဢၼ်မီးၸိတ်းၸႂ်ၸေတၼႃးသတ်ႉထႃးၸိုၼ်ႈၸၢင်ႇၶၢဝ်သႂ် မီးတၢင်းဢီးလူ မီးမဵတ်ႉတႃႇ ၵရုၼႃး ယႂ်ႇလူင်သေလႄႈ လႆႈဢဝ်ၶဝ်ႈၶွင်တၢင်းၵိၼ်တၢင်းယႅမ်ႉၶွင်ႁႅင်ႈၶွင်ႁိူင် မွပ်ႈပၼ်ၵေႃလိၵ်ႈလႆးလႄႈၾိင်ႈငႄႈတႆး ၵဵင်းမႂ်ႇ ၵႂႃႇၸႅၵ်ႇတွၼ်ႈမွပ်ႈပၼ် ပီႈၼွင်ႉတႆး ၼႂ်းၵဵင်းမႂ်ႇ ၵမ်ႈၽွင်ႈၸိူဝ်းဢမ်ႇလႆႈႁဵတ်းၵၢၼ်ႁဵတ်းငၢၼ်း မႃးလၢႆဝၼ်း လၢႆဝူင်ႈ ယဝ်ႉၼၼ်ႉ ၸွမ်းၼင်ႇယိုၼ်းမိုဝ်းၶိုတ်းထိုင်” – ဝႃႈၼႆ။
ၶွင်ၵိၼ်ႁႅင်ႈဢၼ်လႆႈဢဝ်ၵႂႃႇၵမ်ႉၸွႆႈၸႅၵ်ႇပၼ်ပီႈၼွင်ႉတႆးႁဝ်းၼၼ်ႉ မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်း၊ ၶဝ်ႈသွႆးႁႅင်ႈ၊ ပႃဢႅပ်ႇ၊ ၶဝ်ႈမုၼ်းၶဝ်ႈပွင်း၊ ၼူမ်းၵွင်ႇၼူမ်းဢႅပ်ႇ၊ ၼမ်ႉသူမ်ႈၼမ်ႉဝၢၼ်တႃႇလုၵ်ႈဢွၼ်ႇလုၵ်ႈဢီႈ လႄႈ ၶွင်ၸႂ်ႉၶွင်သွႆ ဢၼ်ၸႂ်ႉတိုဝ်းၼႂ်းၼႃႈႁိူၼ်းၵမ်ႈၽွင်ႈ ၸဵမ်ၸိူဝ်းၼႆႉ ၼႂ်း 3 ပိုၼ်ႉတီႈ ႁူဝ်ၵူၼ်း 210 ၵေႃႉ၊ 57 မုင်ႉႁေႃႁိူၼ်း – ဝႃႈၼႆ။
ပီႈၼွင်ႉတႆးဢၼ်လႆႈႁပ်ႉၶူဝ်းတွၼ်ႈၸိူဝ်းၼၼ်ႉ မိူဝ်ႈလႆႈႁူႉထိုင်မုၼ်ငဝ်းတူၼ်ၸဝ်ႈၶူးၿႃး ဝတ်ႉၵူႇတဝ်ႈ မီးမဵတ်ႉတႃႇ ၵရုၼႃးသတ်ႉထႃးလႄႈဢီးလူၸွႆႈထႅမ်မႃးၼႆလႄႈလႆႈပိတိယိၼ်းၸူမ်း ယုၵ်ႉမိုဝ်းဝႆႈသႃၶွပ်ႈၵုၼ်းမုၼ်ငဝ်းတူၼ်ၸဝ်ႈ ၶူးၿႃး ပရႃႊၽတ်းၸၼ်တရင်းသီ ၸဝ်ႈၵွၼ်းဝတ်ႉၵူႇတဝ်ႈယႂ်ႇလူင်တႄႉတႄႉ ၼႆယဝ်ႉ။
ၼွၵ်ႈလိူဝ်ၼၼ်ႉ ယင်းမီးၸုမ်းတူင်ႉၼိုင်တူင်ႇဝူင်းတႆး ၼႂ်းၵဵင်းမႂ်ႇ လၢႆလၢႆၸုမ်းၵေႃႈ ႁူမ်ႈၵၼ်သေ သိုဝ်ႉၶဝ်ႈသၢၼ် ၶွင်ၵိၼ်ၶွင်ႁႅင်ႈၶွင်ႁိူင် လူင်းပိုၼ်ႉတီႈ ၵႂႃႇၸွႆႈၵမ်ႉထႅမ်ၵၼ်ၵေႃႈမီးလၢႆၸုမ်းယူႇ – ဝႃႈၼႆ။
ယွၼ်ႉတၢင်းပဵၼ် COVID – 19 ၼႆႉ ႁၢဝ်ႈႁႅင်းလၢမ်ႈၽႄႈၸွတ်ႇတူဝ်ႈသေ ၸွမ်းၼင်ႇႁၢၼ်ႉၶၢႆၶူဝ်း၊ ႁၢၼ်ႉၶၢႆ ၶဝ်ႈၽၵ်း ဢိၵ်ႇထႅင်ႈလၢႆလၢႆႁၢၼ်ႉၶၢႆၶွင်ၵိၼ်ယႅမ်ႉ ၶွင်ၸႂ်ႉတိုဝ်း လႆႈဢိုတ်းႁပ်းႁၢၼ်ႉၵႂႃႇသဵင်ႈသေ ႁႅင်းၵၢၼ်ပီႈ ၼွင်ႉတႆး ၸိူဝ်းႁဵတ်းၵၢၼ် ၸွမ်းႁၢၼ်ႉၶၢႆတၢင်းၵိၼ် ၶူဝ်းၼုင်ႈတၢင်းဝႆ ဢိၵ်ႇပႃးၵူႈၸိူဝ်းၸိူဝ်းၵေႃႈ လႆႈၵိုတ်းၵၢၼ် ယင်ႉၵၢၼ် ၵၼ်ဝႆႉမူတ်းသဵင်ႈလႄႈ ၸင်ႇလႆႈႁူပ်ႉထူပ်းတၢင်းယၢပ်ႇၽိုတ်ႇၵိၼ်းၸႂ်ၵၼ်ၼႆယဝ်ႉ။
မိူဝ်ႈလဵဝ် ၼႂ်းမိူင်းထႆးၼၼ်ႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 2,369 ၵေႃႉ၊ တၢႆ 30 ၵေႃႉ ယူတ်းယႃ ႁၢႆၶႅၼ်း လီၵႂႃႇၶိုၼ်းယဝ်ႉ 888 ၵေႃႉ လူင်ပွင်ၸိုင်ႈ မိူင်းထႆး ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
