ၼၢင်းယိင်းၵူၼ်းၵျွၵ်ႉမႄးၵေႃႉၼိုင်ႈ ဢၢၼ်းၽဝ်တူဝ် ၶႃႈတူဝ်တၢႆ ၵူၺ်းၵႃႈ ၵူၼ်းဝၢၼ်ႈတၼ်းၸွႆႈၶႄၶိုတ်းတၼ်းသေ လႆႈမၢတ်ႇၸဵပ်း ယၢမ်းလဵဝ်မီးတီႈႁူင်းယႃလူင်ဝဵင်းၵျွၵ်ႉမႄး။
မိူဝ်ႈၼႆႉ ဝၼ်းတီႈ 7/4/2020 ယၢမ်းၵၢင်ၼႂ် မွၵ်ႈ 10 မူင်းပၢႆ ၼၢင်းယိင်းၵေႃႉၼိုင်ႈ ဢႃယု 30 ပီပၢႆ ဢဝ်ၼမ်ႉမၼ်းရူတ်ႉ ႁူတ်းသႂ်ႇ တူဝ်ၸဝ်ႈၵဝ်ႇသေ ၸုတ်ႇၽဝ်တူဝ်ၶိုၼ်း တီႈပွၵ်ႉလွႆႁိၼ်သႅင် ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။
လုင်းၸၢႆးၵူး ၸုမ်းၼမ်ႉၶူင်း ၶႅၵ်ႇလီပၢင်ၸႃႉ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်တီႈပွၵ်ႉၵျွၵ်ႉတွင်ႇ ပွၵ်ႉလွႆႁိၼ်သႅင် ၶႃႈဢေႃႈၼၼ်ႉ။ ပဵၼ်လွင်ႈသင်တႄႉတႄႉသေ ထိုင်တီႈမၼ်းၼၢင်းပေႃးၽဝ်တူဝ်ၶိုၼ်းၼၼ်ႉ ႁဝ်းၶႃႈၵေႃႈ ဢမ်ႇလႆႈႁူႉ ၸွမ်းလီလီၶႃႈ။ လႅပ်ႈတေပဵၼ်လွင်ႈၼႃႈႁိူၼ်းတႃယေးၶဝ်ၶႃႈယူဝ်ႉ” ဝႃႈၼႆ။
ၵူၼ်းယူႇႁိမ်းၵိၼ်ၸမ်ၵၼ်ၼႂ်းပွၵ်ႉ လၢတ်ႈဝႃႈ “ၶႃၽူဝ်မေးၵႆႉၵႆႉၽိတ်းမေႃးၵၼ်ယွၼ်ႉလူၺ်ႈ ၼႃႈၵၢၼ်ႁႃၵိၼ်လဵင်ႉတွင်ႉ ၼႃႈႁိူၼ်းၶဝ်။ ပွၵ်ႈၼႆႉၵေႃႈပဵၼ်လွင်ႈႁႃၵိၼ်ၼႆႉၵူၺ်းၼင်ႇၵဝ်ႇ။ ၶဝ်မႃးၶၢတ်ႈယူႇတီႈပွၵ်ႉလွႆႁိၼ်သႅင်တိုၵ်ႉလႆႈ 3-4 လိူၼ် ၵူၺ်း။ ၼၢင်းယိင်းၵေႃႉၼႆႉမီးလုၵ်ႈလဵၵ်ႉဝႆႉၵေႃႉၼိုင်ႈ” ဝႃႈၼႆ။
ၼၢင်းယိင်းၵေႃႉၼႆႉ ၺႃးၾႆးမႆႈၵႂႃႇမွၵ်ႈ 70% ၽိဝ်ၼင်လွၵ်ႈမူတ်း ၶူၼ်ႁူဝ်ၵေႃႈမႆႈငေႃးၶႅမ်ႈ။ ယူႇတီႈၸုမ်းၸွႆႈထႅမ် ပရႁိတ ၼႂ်းၸႄႈဝဵင်းၵျွၵ်ႉမႄး လႆႈၵႂႃႇၸွႆႈဢဝ်တူဝ်မႃးသူင်ႇယူတ်းယႃတူဝ်ဝႆႉတီႈ ႁူင်းယႃ ၵျွၵ်ႉမႄး ဝႃႈၼႆ။
