ၸုမ်းသိုၵ်းမၢၼ်ႈၶႂၢၵ်ႈမိူင်းၶဝ် ၶတ်းၸႂ်တဵၵ်းတဵင်ယႃႉၵဝ်းဢူမ်ဢိုၼ် ၾိင်ႈငႄႈသိူၵ်ႈပိုၼ်း၊လိၵ်ႈလၢႆးၵႂၢမ်းလၢတ်ႈႁဝ်းၵူႈလွၵ်းၵူႈလၢႆး၊-ၵူႈၸိူဝ်ႉၵူႈပိူင်ၵူႈၸဝ်ႉၼႂ်ဝၼ်းၶမ်ႈဢၼ်ဝႃႈၼၼ်ႉ လၢတ်ႈယူႇတႅမ်ႈယူႇပွင်ႉယူႇ ပၢၵ်ႈလွင်ႈၼႄတၢင်းၵူၼ်းမိူင်းတႆးႁဝ်းၵေႃႈသမ်ႉပေႃးဢမ်ႇမေႃသုတ်းသဵင်ႈယဝ်ႉတူဝ်ႈသေပွၵ်ႈယဝ်ႉ။ ဢမ်ႇလိူဝ်သေလွင်ႈၽုၵ်ႇႁႆႈသွမ်ႈၼႃး၊ လွင်ႈမၢၵ်ႇၶဝ်ႈတဝ်ႈၼမ်ႉၸိူဝ်းၼႆႉၵေႃႈ ၶဝ်မႃးၸွမ်ႇၸိမ်ၸွၼ်ၸဵင်ႇၽိုတ်ႇႁိမ်ၸီးၸွမ်းၶဝ်ႈသေဢဝ်ၶွင်မၢၼ်ႈၶဝ်မႃးႁူမ်ႇတဵင်သုမ်ႇငမ်းပုတ်ႈတဵၼ်းပၼ်ၸိုဝ်ႈတိၵ်းတိၵ်းလႄႈ။ မိူၼ်ၼင်ႇၸိုဝ်ႈသဵင်ၶေႃႈႁွင်ႉႁိၵ်ႈ “ ၶဝ်ႈ ” ၼႆႉၵူၺ်းၵူၼ်းမိူင်းတႆးၵမ်ႈၼမ်ႁဝ်းယင်းတေႁူႉၸၵ်းၸိုဝ်ႈမၢၼ်ႈၼမ်လိူဝ်သေၸိုဝ်ႈတႆးလူးၵွၼ်ႇယဝ်ႉ။ ၵူၼ်းၵမ်ႈၼမ်ၸုပ်ႈသႅၼ်းၵၢင် ဢႃႇယု 40 လူင်းတႂ်ႈဢၼ်ယူႇၸွမ်းတႄႇ သၢပ်ႇ ဝဵင်းႁိမ်း ဝဵင်းတေႃႇထိုင်ၼႂ်းဝဵင်းမိူင်းတႆးၵမ်ႈၼမ်ၼႆႉတေႁူႉၸၵ်းၸိုဝ်ႈၶဝ်းမၢၼ်ႈၸိူဝ်ႉၼင်ႇ ၸိူဝ်းၼႆႉလွၼ်ႉ။ ဢၼ်တေႁူႉၸၵ်းၸိုဝ်ႈ “ ၶဝ်ႈမိူင်းတႆး ” ၸိူင်ႉၼင်ႇ- ...