ၸမ်ၼမ်ႉႁူႉလွင်ႈပႃ - ႁူႉသဵင်ၵႃသဵင်ၼူၵ်ႉ ၵွပ်ႈၸမ်ထိူၼ်ႇ ၵႂႃႇငၢႆႈၵေႃႈမႃးငၢႆႈ၊ ၶိုၼ်ႈငၢႆႈၵေႃႈလူင်းငၢႆႈ၊ ငၢႆးၼမ်ႉလႆတူၵ်းလွႆ ၸႂ်ၵူၼ်းၵႅၼ်ႇၵွႆလႅၵ်ႈလၢႆႈငၢႆႈ။ လူလိၵ်ႈတႅမ်ႈလိၵ်ႈ ႁႂ်ႈဝူၼ်ႉလိုၵ်ႉပႃးၸႂ် လိၵ်ႈတူဝ်လႂ်ၵေႃႈ ၵႃႈၶၼ်မိူၼ်ၶမ်းၸွႆႉ ၶၢဝ်းတၢင်းၵႆ ႁူႉၼမ်ႉႁႅင်းမႃႉ ႁဵတ်းၵူၼ်းၵႃႉၶၢဝ်းႁိုင် ႁူႉထိုင်ၼမ်ႉၸႂ်ၵူၼ်း ၽူႈမေႃပွႆႇဝၢင်းပၼ် ဢမ်ႇၸႂ်ႈၵူၼ်းလိူၼ်ငိူဝ်ႈသိူၼ်ႈ ၽူႈဢမ်ႇပွႆႇဝၢင်းပိူၼ်ႈ ပဵၼ်ၵူၼ်းမိူၵ်ႈမႂ်ႈလိုမ်းတူဝ် မိူဝ်ႈလပ်ႉမိတ်ႈလပ်ႉလႅဝ်း၊ ၸႂ်သႅဝ်းၸႂ်လမ် ၽႃႇပုၵ်းထိုင်ႉ ၵူၼ်းမိူင်းႁႃငိုၼ်းမေႃမိူဝ်ႇၸၢၼ်ႈ ငိုၼ်းဢမ်ႇတဵမ်ၸၢၼ်ႈဝႃႈမီးဢေႇ။ ၸၢႆးၸိင်ႇ NY.USA Vol. 18, No. 182, 2001

ပူၼ်ႉမႃးမိုၼ်ႉသိုၼ်းႁိုင် တီႈမိူင်းၵိုင်ၵဵင်းတွင်း ၽွင်း 400 ပီပၢႆ တင်းလၢႆသိုပ်ႇၶႆႈမႃး ၵွႆႈတွင်းၸႃးမၢႆၸေး သထေးၸၢႆးတိၼ်ႇၼ ၼၢင်းၵၼ်ႇထၵၢၼ်ႈယူင်ႇ သဝ်းထင်တူင်ႇၵဵင်းတွင်း မီးလုၵ်ႈၼေႃႇလွင်းလီ ၶုၼ်ၽီယိုၼ်ႈလူင်းၾၢၵ်ႇ ပၢၵ်ႇပၢႆသၢဝ်းႁႃႈၼီႈ မႅၼ်ႈတီႈၶၢဝ်းလိူၼ်သၢမ် ၼမ်ႉၼၢႆးၼမ်ပႆႇႁိူတ်ႇ ပီၵိူတ်ႇၶုၼ်သၢမ်လေႃး ပိူၼ်ႈပေႃးတေႃႉတႆႇၵၼ် ၽိူဝ်ႇဢၼ်ယႂ်ႇထူၼ်ႈမႃး မႄႈလႃၽႃးႁႂ်ႈဢဝ် လုၵ်ႉပႂ်ႉၵဝ်ဢူးပႅမ်း မႄႈႁၵ်ႉၵႅမ်းၼႅၼ်ႈၼႃ ၵူပ်ႉၵူႈၽႃမႅင်ႇၸၢႆး ႁႂ်ႈသုတ်းဝၢႆးတေႃႇထဝ်ႈ မႄႈၸဝ်ႈဝႃႈ ၼင်ႇၸႂ် တႃသႂ်ၼေႃႇၶုၼ်ၸၢႆး ပႆႇၶႂ်ႈပၢႆးႁွမ်းၶဝ်ႈ ဢႃယုၸဝ်ႈပႆႇၵႄႇ ပႆႇၶႂ်ႈတႄႇၼႃႈႁိူၼ်း တွပ်ႇၵႂၢမ်းၸိူၼ်းမႄႈၸဝ်ႈ ၼၢႆးထဝ်ႈၸႂ်လမ်ၼႃႇ ႁိုတ်းထႃႉလႃႇသဵင်မေႃး သၢမ်လေႃးပႆႇတၵ်းသဵင် ဢမ်ႇတွပ်ႇထဵင်ယူႇမႃး ထိုင်ၶၢဝ်းၶႃးဢွၵ်ႇၵႃႉ ၶီႇမႃႉၼမ်းဝူဝ်းတၢင်ႇ ဢၢၼ်းမၢၵ်ႇၶိုၼ်းမိူဝ်းၵႃႉ ၸဝ်ႈၶီႇမႃႉထူဝ်းႁူဝ် သဵင်ၶူဝ်ႁုၼ်ႈပၼ်းၵႂႃႇ ပႆလတ်းၽႃႇယုမ်းၶိူဝ်း မုင်ႈမိူဝ်းၼိူဝ် ၾၢႆႇႁွင်ႇ တူၵ်းပွင်ႇႁွတ်ႈမိူင်းၵိုင်...