ပူၼ်ႉမႃးမိုၼ်ႉသိုၼ်းႁိုင် တီႈမိူင်းၵိုင်ၵဵင်းတွင်း

ၽွင်း 400 ပီပၢႆ တင်းလၢႆသိုပ်ႇၶႆႈမႃး

ၵွႆႈတွင်းၸႃးမၢႆၸေး သထေးၸၢႆးတိၼ်ႇၼ

ၼၢင်းၵၼ်ႇထၵၢၼ်ႈယူင်ႇ သဝ်းထင်တူင်ႇၵဵင်းတွင်း

မီးလုၵ်ႈၼေႃႇလွင်းလီ ၶုၼ်ၽီယိုၼ်ႈလူင်းၾၢၵ်ႇ

ပၢၵ်ႇပၢႆသၢဝ်းႁႃႈၼီႈ မႅၼ်ႈတီႈၶၢဝ်းလိူၼ်သၢမ်

ၼမ်ႉၼၢႆးၼမ်ပႆႇႁိူတ်ႇ ပီၵိူတ်ႇၶုၼ်သၢမ်လေႃး

ပိူၼ်ႈပေႃးတေႃႉတႆႇၵၼ် ၽိူဝ်ႇဢၼ်ယႂ်ႇထူၼ်ႈမႃး

မႄႈလႃၽႃးႁႂ်ႈဢဝ် လုၵ်ႉပႂ်ႉၵဝ်ဢူးပႅမ်း

မႄႈႁၵ်ႉၵႅမ်းၼႅၼ်ႈၼႃ ၵူပ်ႉၵူႈၽႃမႅင်ႇၸၢႆး

ႁႂ်ႈသုတ်းဝၢႆးတေႃႇထဝ်ႈ မႄႈၸဝ်ႈဝႃႈ ၼင်ႇၸႂ်

တႃသႂ်ၼေႃႇၶုၼ်ၸၢႆး ပႆႇၶႂ်ႈပၢႆးႁွမ်းၶဝ်ႈ

ဢႃယုၸဝ်ႈပႆႇၵႄႇ ပႆႇၶႂ်ႈတႄႇၼႃႈႁိူၼ်း

တွပ်ႇၵႂၢမ်းၸိူၼ်းမႄႈၸဝ်ႈ ၼၢႆးထဝ်ႈၸႂ်လမ်ၼႃႇ

ႁိုတ်းထႃႉလႃႇသဵင်မေႃး သၢမ်လေႃးပႆႇတၵ်းသဵင်

ဢမ်ႇတွပ်ႇထဵင်ယူႇမႃး ထိုင်ၶၢဝ်းၶႃးဢွၵ်ႇၵႃႉ

ၶီႇမႃႉၼမ်းဝူဝ်းတၢင်ႇ ဢၢၼ်းမၢၵ်ႇၶိုၼ်းမိူဝ်းၵႃႉ

ၸဝ်ႈၶီႇမႃႉထူဝ်းႁူဝ် သဵင်ၶူဝ်ႁုၼ်ႈပၼ်းၵႂႃႇ

ပႆလတ်းၽႃႇယုမ်းၶိူဝ်း မုင်ႈမိူဝ်းၼိူဝ် ၾၢႆႇႁွင်ႇ

တူၵ်းပွင်ႇႁွတ်ႈမိူင်းၵိုင် ၽႅဝ်ထိုင်တီႈ တၼ်းသဝ်း

ၼၢင်းလဝ်းဢူဝ်ႈပဵမ်ႇသၢင်ႈ ႁုၼ်ႇႁၢင်ႈၾၢင်ငၢမ်းလဝ်း

ၸဝ်ႈသၢမ်လေႃးမဝ်းမႆႈ ၸွမ်းၶႆႈႁူပ်ႉၺႃးၵၼ်

တီႈဢၼ်ႁိမ်းၾင်ႇၼမ်ႉ ၸင်ႇသမ်ႉတၢၼ်ႈၶူဝ်ၸူး

ၸွႆႉၼၢင်းပူးလၢတ်ႈၵႂႃႇ ၼမ်ႉတဵင်းယႃႇပေမေႃး

သၢမ်လေႃးလႄႈဢူဝ်ႈပဵမ်ႇ တေၶဵင်ႇတႃႉတၢင်းႁၵ်ႉ

ထေႃတၵ်ႉမူၼ်ႈၸူမ်းၵၼ် မိူဝ်ႈဢၼ်ၵႂၢမ်းသတ်ႉၸႃႇ

ယိုၼ်ႈယွၼ်းတႃႇယၼ်ၵမ်ႉ ၵႄးလႆႈၼမ်ႉတဵင်းၶဵဝ်

တေႃႇယၢမ်းလဵဝ် ဢမ်ႇမေႃး ပေႃးမီးဝႆႉလၵ်းထၢၼ်

ပၢၼ်ၶႅပ်ႇၶၢင်ႈၼၢင်းႁိုင် ၶွပ်ႈထိုင်ယၢမ်းပွၵ်ႈဝၢႆႇ

မိုဝ်းၵၢႆႇဝႆႈပေႃႈမႄႈ လတ်းၽႃႇၵႄႈလူင်ၶိူဝ်း

ပွၵ်ႈၶိုၼ်းမိူဝ်းမိူင်းလင် တီႈသဝ်းထင်ဢိူင်ႇၸဝ်ႈ

မႄႈၼၢႆးထဝ်ႈတူၺ်းႁၼ် ၵူပ်ႉၵူႈပႃးၵၼ်မႃး

မီးပႃးတင်းလုၵ်ႈပႂ်ႉ ၼႅတ်ႈၸႂ်ႉႁႂ်ႈၵူၼ်းမၼ်း

ႁိပ်ႈလၼ်းၵၼ်းႁုင်ၶဝ်ႈ ၼၢႆးထဝ်ႈၵႅင်ႈၸူမ်းၼႃႇ

မၢင်ႉၵႂႃႇမိုဝ်ႉၵႅင်ၽၵ်း ယၵ်းယိၵ်းၽုၵ်းသႂ်ႇမေႃႈ

လိူတ်ႇသေႃႈသေႃႈ ပူင်တမ်း ၼႂ်းဢုပ်းၶမ်းဝၢၼ်ႇၶဝ်ႈ

ၼၢႆးထဝ်ႈဢဝ်ၶဵမ်သႂ်ႇ လုၵ်ႈပႂ်ႉမႂ်ႇၼင်ႈဝူင်း

မိုဝ်းလူင်းၶူတ်ႉၶဝ်ႈထႅင်ႈ ၸူၵ်းသႂ်ႇငႅင်ႈပၢႆၶဵမ်

ၵပ်ႉတဵမ်ဢူၵ်းသိုတ်ႉႁႆႈ သၢမ်လေႃးဢမ်ႇလႆႈႁၼ်

ၽွင်းၸူဝ်းၵၼ်ဢွၵ်ႇၵႃႉ ဢူဝ်ႈပဵမ်ထူပ်းၸႃႉၼႆ

ၶူဝ်လႆၵေႃႈလၼ်ႇလုတ်ႈ မိုဝ်းယိပ်းႁုတ်ႈငမ်တၢဝ်း

ဝၢတ်ႇႁၢဝ်းၽိဝ်မႆႉႁႅင်ႈ လႆႈတိူဝ်ႉထႅင်ႈသွင်ၵမ်း

ၼမ်ႉတႃယမ်းၵႅမ်ႈလၢႆႇ ဢွၼ်ပွၵ်ႈဝၢႆႇယၢၼ်မိူဝ်း

ပႃးၸုမ်းၸိူဝ်းလုၵ်ႈၼွင်ႉ ၸူဝ်းႁွင်ႉၽႃးၽိူဝ်းၵၼ်

လတ်းၸွမ်းသၼ်ပႃႇၵႄႇ သၼ်ႇထေႇလုၵ်ႈၼၢင်းပႃး

ၵိူတ်ႇတူၵ်းမႃးယဝ်ႉၵေႃႈ တေႃႈဢမ်ႇမီးသၢႆၸႂ်

ယၢမ်းငၢႆးၼႂ်ၵတ်းၶႅင် ပႃးလုၵ်ႈလႅင်တမ်းဝႆႉ

ၼိူဝ်တေႃႁႅင်ႈမႆႉၵေႃႇ ႁႂ်ႈႁွင်ႉႁႃပေႃႈၸၢႆး

ဝၢႆးသေၼၢင်းမိူဝ်းပႅတ်ႈ သၢမ်လေႃးၼႅတ်ႈမႃးႁၼ်

တီႈဢၼ်တူၵ်းၶူဝ်လႆ  လိူတ်ႈတူၵ်းယႆယွႆႉယွတ်ႇ

ႁူႉၸွတ်ႇတိုၼ်းတၵ်ႉဝႆႉ ၵွပ်ႈမႄႈၼႆႉ ႁဵတ်းၽေး

လုၵ်ႈမေးပၢႆႈယၢၼ်ၵႆ ၼမ်ႉတႃလႆတူၵ်းယမ်း

ၼေႃႇၶမ်းၸဝ်ႈလိူတ်ႇမႆႈ ၽတ်ႉမႃႉလႅၼ်ႈၽၢႆၽႂ်း

ႁၼ်ပူႇယၢင်းၼႂ်းႁႆႈ ၸင်ႇတေႃႉၶႆႈထၢမ်ၵၼ်

ၸွင်ႇထူၵပ်းႁၼ်မေးၸဝ်ႈ ပူႇယၢင်းထဝ်ႈမွၵ်ႇၶၢၼ်

ႁၼ်ဢိူဝ်ႈလၢၼ်ၼႂ်ဝႃး မိူဝ်ႈမႃးပၵ်းမွၵ်ႇမူဝ်

သဵင်ၶူဝ်ႁုၼ်ႉႁိူဝ်းႁိူဝ်း ၽိူဝ်ႇမိူဝ်းပၵ်းမွၵ်ႇမႆႈ

သဵင်ႁႆႈပၼ်းၸွမ်းတၢင်း ၸဝ်ႈလၼ်းၵၼ်းသိုပ်ႇပူၼ်ႉ

မႃးဝူၼ်ႉတူၵ်ႇၶိူဝ်းၼၢင်း ယုၵ်ႉယၢင်ႈဝၢင်းတိၼ်ပႆ

ယၢၼ်ၵႆမိူင်းၵဵင်းတွင်း ယၢမ်းၽွင်းဢွၵ်ႇတၢင်းၵေႃႈ

ၼၢင်းတေႃႈဢူၼ်ႈၼူၼ်းၼႃႇ ႁွတ်ႈမိူဝ်းၵႂႃႇမိူင်းၵိုင်

ၽႅဝ်ထိုင်တီႈႁိူၼ်းသဝ်း မႅၼ်ႈၶၢဝ်းယွၼ်ႇႁူဝ်ၶမ်ႈ

ငဝ်းႁိူဝ်ႈၸမ်ႈတႃဝၼ်း တေႃႈပႆႇတၼ်းၸူမ်ႁၢႆ

ၼၢင်းလူမ်ႉတၢႆႁိမ်းႁိူၼ်း ပွႆႇတူဝ်လိူၼ်းယဵတ်ႇၶွႆႈ

ၸႂ်ၶၢတ်ႇမွႆႈလိုမ်းၵႂႃႇ ၵွပ်ႈၸဵပ်းၼႃႇတင်းတူဝ်

ၸဝ်ႈၽူဝ်ပႆႇတၼ်းမႃး ပေႃႈမႄႈပႃးဢိုတ်ႇႁႆႈ

ၼမ်ႉယွႆႈၼႆႈသွင်တႃ လုၵ်ႈမႃးႁႃႁိူၼ်းၵေႃႈ

ၵႂၢမ်းတေႃႈလၢတ်ႈဢမ်ႇလႆႈ ၵပ်ႉလိူတ်ႇမႆႈၵူင်ၶေႃး

သၢမ်လေႃးၸဝ်ႈမိူဝ်းႁၼ် ႁိူၼ်းဢၼ်မီးပၢင်ၸႃႉ

ၸဝ်ႈလူင်းမႃႉထၢမ်ၸူဝ်ႈ ၼွင်ႉဢူဝ်ႈပဵမ်ႇမီးလႂ်

ၽႂ်ၵေႃႈ ဢမ်ႇတွပ်ႇလႆႈ ၽွမ်ႉဢိုတ်ႇႁႆႈဢူၼ်ဢၢၼ်

ပေႉငိၼ်းၽၢၼ်ၸွမ်းၼၢင်း ႁႄႉတၢင်းၸဝ်ႈၶဝ်ႈၵႂႃႇ

ၵူၼ်းၵိုၼ်းၼႃႇတဵမ်ႁိူၼ်း ၸဝ်ႈၸူၵ်းငိုၼ်းၼႂ်းထူင်

ၽၢဝ်ႇပိုၼ်ႁူင်ႈလူင်းၸၢၼ်း ၵူၼ်းလုၵ်ႉ-ၵၢၼ်းႁိမ်ၵၼ်

ၸဝ်ႈလၼ်လိၼ်ၶဝ်ႈႁိူၼ်း ႁိမ်းၶၢပ်ႈတူဝ်လိူၼ်းတၢႆ

ဝူၼ်ႉသေးလၢႆၼၢင်းၼႅၼ်ႇ သၢမ်လေႃးၵႅၼ်ႇမဝ်းမႃႈ

ၼၢင်းလပ်းထႃႈ လိုမ်းမိူင်း မႄႈၸႂ်လိူင်းႁဵတ်းၶဵၼ်

မႆၵဵၼ်ၶဵၼ်တၵ်းႁွမ်း တိုၼ်းတၢႆၸွမ်းၼၢင်းၵဝ်

ၸၵ်ႉမိတ်ႈတဝ်တႅင်းၶေႃး သၢမ်လေႃးလူႉဢိူမ်ႈၸမ်

တၢဝ်းၵမ်မိုဝ်းမေးၼၢင်း ပွႆႇတူဝ်ဝၢင်းယဵတ်ႇၶွႆႈ

ပိူၼ်ႈၸင်ႇၵွႆႈပွႆႇၶၢဝ်ႇ လုၵ်ႈၸၢႆးမၢဝ်ႇသၢမ်လေႃး

မိတ်ႈတႅင်းၶေႃးသဵင်ႈၵႂႃႇ မႄႈမႃႇတႃႇႁူႉငိၼ်း

ၶေႃႈၵႂၢမ်းၶိၼ်းလိုဝ်းၶႆႈ မၢင်ႉႁိပ်ႈမႆႈလၼ်းၵၼ်း

တႅပ်းၾၼ်းမႆႉသၢမ်တႃ မႅၵ်ႇမိူဝ်းႁႃမိူင်းၵိုင်

ႁွတ်ႈထိုင်ႁိူၼ်းပၢင်ၸႃႉ ဢဝ်ဝၢင်းပလႃႉၶႅၼ်ႈၶႂၢင်

တမ်းၵၢင်သွင်တူဝ်တၢႆ ပၢၵ်ႇလၢႆသႅၼ်ၵမ်ႇၾႃႇ

ႁႂ်ႈၶိူဝ်ယႃႇၶွႆႈၵၼ် ၵၢဝ်ႇပၼ်ၵႂၢမ်းတိတ်ႉထၢၼ်ႇ

ၼၢႆးၵၢၼ်ႈယူင်ႇၶၢၼ်ႁေႃး သၢမ်လေႃးလႄႈ ဢူဝ်ႈပဵမ်ႇ

မီးဝႆႉၸဵမ်ႇလၵ်းပိုၼ်း ပွၵ်ႈၶိုၼ်းတႄႇပဵၼ်လၢဝ်

ၵၢင်ႁၢဝ်မီးမႃးၼၢၼ်း လၢဝ်မႆႉၵၢၼ်းသၢမ်တႃ

မုင်ႈႁႅၼ်ႁႃတူၺ်းလူး ဢိူမ်ႈၶၢင်းၸူးႁိမ်းၵၼ်

ၽႂ်ႁၼ်ၵေႃႈ လွမ်ဢၢမ်း ၶၢဝ်းယၢမ်းႁိုင်ႁီးထွင်

တၢင်းႁၵ်ႉသွင်ၽူဝ်မေး ႁူႉတေးသိုပ်ႇသဝ်ႈမွင်ၶုၼ်ႇလွပ်ႈ။

ဢဝ်မႃး ၼႂ်းပပ်ႉၵွၼ်းၶေႃ

မၢႆ 253 လိူၼ် ၾႅပ်ႊပိဝ်ႊရီႊ ပီ 2009

ၼမ်ႉၸိုမ်းသႅင်