ၵူၼ်းမိူင်း ၸၢဝ်းပဢူဝ်း ၼႂ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ႁူဝ်ၵူၼ်း ၼပ်ႉႁူဝ်ပၢၵ်ႇ ဢၼ်လႆႈပၢႆႈၶၢမ်ႈၶူင်းၵႂႃႇတၢင်း ပွတ်းဢွၵ်ႇၼၼ်ႉ ယူႇတီႈၸုမ်း PNLO ၼႄးဝႃႈ RCSS လိုပ်ႈႁေႃႈ ၵူၼ်း ဝၢၼ်ႈပၢႆႈၼႆၼၼ်ႉ ဢမ်ႇၸႂ်ႈ ဝႃႈၼႆ။

ဝၼ်းတီႈ 04/01/2019 ယူႇတီႈႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLO/ PNLA ဢွၵ်ႇၶေႃႈ ပိုၼ်ၽၢဝ်ႇဝႃႈ မိူဝ်ႈဝၼ်းတီႈ 31/12/2018 ယူႇတီႈတပ်ႉသိုၵ်း RCSS/SSA ႁွင်ႉၵူၼ်းဝၢၼ်ႈၵႂႃႇၶွၼ်ႈတုမ်ၵၼ်တီႈဝတ်ႉ ပၢင်မီသေ လိုပ်ႈႁေႃႈၵူၼ်းဝၢၼ်ႈ တဵၵ်းၵူၼ်းဝၢၼ်ႈၶၢႆႈပၢႆႈ။ ၵဵဝ်ႇလူၺ်ႈလွင်ႈၼႆႉ ယူႇတီႈၽူႈၶၢၼ်ပၢၵ်ႇ RCSS တီႈလုမ်း ၵပ်းသၢၼ် ဝဵင်းတူၼ်ႈတီး တွပ်ႇလၢတ်ႈဝႃႈ ဢမ်ႇၸႂ်ႈ ပဵၼ်ၶၢဝ်ႇမၢပ်ႇၼႄးသႂ်ႇၵူၺ်း ဝႃႈၼႆ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ လုမ်းၵၢပ်းသၢၼ် RCSS/SSA တီႈတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈ ဢၼ်သိုၵ်းႁဝ်း ႁေႃႈလိုပ်ႈၵူၼ်းဝၢၼ်ႈၼၼ်ႉ မၼ်းဢမ်ႇၸႂ်ႈ “ၶဝ်မၢပ်ႇၽၢမ်းၼႄးဢဝ်ၵူၺ်း”တီႈတႄႉမၼ်း ဝၢႆးသေ သိုၵ်းပဢူဝ်းၶဝ်ၵႂႃႇယူႇဝႆႉၼၼ်ႉ ၵူၼ်းသိုၵ်းႁဝ်း ယင်းဢမ်ႇၵႂႃႇၽႅဝ်တီႈဝၢၼ်ႈမႆႉပူၵ်ႇ၊ ဝၢၼ်ႈပၢင်ပီႉယဝ်ႉ ပဵၼ် သိုၵ်း ၶဝ်တူင်ႉၼိုင်ဝႆႉၵူၺ်း။ ထႅင်ႈလွင်ႈၼိုင်ႈ ၶဝ်ဝႃႈသိုၵ်းတႆးတေမႃးယိုဝ်းႁဝ်းဢိူဝ်ႈၼႆ ၸႂ်ႉၵူၼ်းဝၢၼ်ႈတီႈၼၼ်ႈ ၼၼ်ႉ ၶဝ်ႈႁၢပ်ႇထၢမ်းၵၢၼ်ၼႂ်းသိုၵ်းၶဝ်။ တႃႇၵူၼ်းၸၢႆးသမ်ႉ ႁႂ်ႈႁဵတ်းသိုၵ်း၊ တႃႇၵူၼ်းယိင်းသမ်ႉ ႁႂ်ႈႁုင်ၶဝ်ၽၵ်းသေ ၵႂႃႇသူင်ႇ ပၼ် တီႈဢၼ်ၶဝ်ႁဵတ်းတပ်ႉဝႆႉၼၼ်ႉ။ ယွၼ်ႉၼၼ် ၵူၼ်းဝၢၼ်ႈ ဢမ်ႇယွၼ်းႁဵတ်းသေ ဢွၼ်ၵၼ်ပၢႆႈ ဢွၵ်ႇမႃး” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈႁွင်ႈၵၢၼ် ပိုၼ်ၽၢဝ်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆးဢွၵ်ႇဝႆႉ မိူဝ်ႈဝၼ်းတီႈ 01/01/2019 ယၢမ်းႁူဝ်ၶမ်ႈၼၼ်ႉ ၽူႈမီးပုၼ်ႈၽွၼ်း PNLO/ PNLA ဢၼ်တူင်ႉၼိုင် တၢင်းမိူင်ပၼ်ႇ ဢိူင်ႇၼႃးမွၼ် ၼၼ်ႉ ႁွင်ႉၵူၼ်းဝၢၼ်ႈၼႂ်းပိုၼ်ႈတီႈသေ ႁဵတ်းပၢင်ၵုမ်ပိူဝ်ႈတႃႇၵဵပ်းသိုၵ်းမႂ်ႇ။ ၼႂ်းပၢင်ၵုမ်ၼၼ်ႉ ၽူႈမီးပုၼ်ႈၽွၼ်း PNLO လၢတ်ႈဝႃႈ သင်ၽႂ်ဝၢၼ်ႈလႂ် ဢမ်ႇၶႂ်ႈႁဵတ်းသိုၵ်း ဢမ်ႇၶႂ်ႈၸွႆႈထႅမ် PNLO ၸိုင် ႁႂ်ႈၶၢႆႉႁိူၼ်းယေးၵႂႃႇယူႇတၢင်ႇတီႈ ဝႃႈၼႆ။

ထိုင်မႃး ဝၼ်းတီႈ 02/01/2019 ၵူၼ်းဝၢၼ်ႈၵူၼ်းမိူင်း ၼႂ်းဢိူင်ႇၼႃးမွၼ် လႆႈဢွၼ်ၵၼ်ပၢႆႈမႃးတၢင်းပွတ်းဢွၵ်ႇၶူင်းသေ ယူႇတီႈတပ်ႉသိုၵ်းဝႃႉ UWSA ပွတ်းၸၢၼ်း လႆႈႁပ်ႉလဵင်ႉလူ တူၺ်းၸွႆႈထႅမ်ဝႆႉ ဝႃႈၼႆ။

ၼႂ်းၶေႃႈပိုၼ်ၽၢဝ်ႇ PNLO ဢွၵ်ႇဝႆႉသမ်ႉ ၵူၼ်းဝၢၼ်ႈမွၵ်ႈ 300 ၵေႃႉ လင်ႁိူၼ်း/ မေႃႈၶဝ်ႈ 75 လင် ပဵၼ်ၵူၼ်းဝၢၼ်ႈ ၼွင်ၶဵဝ်၊ ဝၢၼ်ႈမႆႉပူၵ်ႇ၊ ဝၢၼ်ႈပၢင်ပီႉ ၸဵမ်ၸိူဝ်းၼႆႉ ဝႃႈၼႆ။

ၸဝ်ႈသိုၵ်း ၸၢႆးဢူး လၢတ်ႈဝႃႈ “ ၵဵဝ်ႇလူၺ်ႈလွင်ႈ ဢၼ် PNLO ဢွၵ်ႇၶေႃႈပိုၼ်ၽၢဝ်မၢပ်ႇၼႄးႁဝ်းၼၼ်ႉ ယူႇတီႈၸုမ်း ႁဝ်းၶႃႈၵေႃႈ တေဢွၵ်ႇတုမ်ႉတွပ်ႇၶိုၼ်းယူႇ။ လွင်ႈတၢင်းဢၼ်ပဵၼ်မႃးၼၼ်ႉ လုၵ်ႉတီႈၾၢႆႇလဵဝ်ဝႃႈၵူၺ်းတႄႉ မၼ်း ဢမ်ႇသၢင်ႇထုၵ်ႇ တီႈတႄႉမၼ်းတႄႉ ပၼ်ႁႃငဝ်ႈတႄႇမၼ်း ပဵၼ်သင် မိူဝ်ႈဢွၼ်တၢင်းတႄႉ ဢမ်ႇမီးပၼ်ႁႃသင် ၵွပ်ႈ ပိူဝ်ႈဝႃႈ ၶဝ်ၶႂ်ႈၵႂႃႇတၢင်ႈတပ်ႉ ပၵ်းသဝ်းယူႇတီႈၼၼ်ႈလႄႈ ၸင်ႇတႄႇမီးပၼ်ႁႃမႃး ၸိူဝ်းၼၼ်ႉ မၼ်းလူဝ်ႇတေ လႆႈ ၵႄႈလိတ်ႈၵၼ်။ ၵႄႈလိတ်ႈၵၼ်ဢၼ်ဝႃႈၼၼ်ႉ မၼ်းဢမ်ႇၸႂ်ႈဝႃႈ ယဝ်ႉၵၢၼ်သိုၵ်းသေၵႄႈလိတ်ႈဢမ်ႇၸႂ်ႈမၼ်း လူဝ်ႇလႆႈဢဝ်ၵၢၼ်ဢုပ်ႇဢူဝ်းၵၼ်သေၵႄႈလိတ်ႈၵႂႃႇ” ဝႃႈၼႆ။

သိုပ်ႇလၢတ်ႈဝႃႈ ဢၼ်သိုၵ်းၶဝ်ၵႂႃႇၼၼ်ႉ မၼ်းဢမ်ႇၸႂ်ႈၵႂႃႇၵႅတ်ႇၶႄႁႄႉၵင်ႈၵူၼ်းမိူင်း ၶဝ်ၵႂႃႇႁႃပၼ်ႁႃ သႂ်ႇပၼ် ၵူၼ်း ဝၢၼ်ႈ မႆႉပူၵ်ႇ၊ ပၢင်ပီႉၵူၺ်း ႁႂ်ႈလႆႈယူႇယၢပ်ႇၵိၼ်ယၢပ်ႇ။ ၵၢၼ်ၸွႆႈထႅမ်ၵူၼ်းမိူင်းဢၼ်ဝႃႈၼၼ်ႉ ႁႂ်ႈပဵၼ်လၢႆးသၢင်ႇ ထုၵ်ႇ၊ ႁႂ်ႈမၢၼ်ႇမႅၼ်ႈ” ဝႃႈၼႆ။

သိုၵ်း RCSS တင်းသိုၵ်း PNLO ၶဵင်ႈၶႅင်ၵၢၼ်သိုၵ်းၵၼ်မႃး တင်ႈတႄႇပၢႆပီ 2018။ ယွၼ်ႉပၼ်ႁႃၼႆႉသေ ၵျွင်းမုၼ် ၸဝ်ႈတႆးၵေႃႈၺႃးၽဝ်၊ ၵျွင်းမုၼ်ၸဝ်ႈပဢူဝ်းၵေႃႈၺႃးၽဝ်။ ၵူၼ်းမိူင်းလႆႈယူႇယၢပ်ႇဝႆႉတင်းသွင်ၾၢႆႇ ဝႃႈၼႆ။