ၼႂ်းၸႄႈဝဵင်းသီႇပေႃႉ ၸုမ်းယိပ်းၵွင်ႈၵၢင်ႇ ၶဵင်ႇၶႅင်ၵၢၼ်သိုၵ်းတေႃႇၵၼ်လႄႈ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းသေ ဢွၼ်ၵၼ်ပၢႆႈၼပ်ႉႁူဝ်ပၢၵ်ႇ မႃးမီးဝႆႉယူႇၼႂ်းဝဵင်း။
ဝၼ်းတီႈ 03-04/01/2019 ၼႆႉမႃး ၵူၼ်းဝၢၼ်ႈတူၼ်ႈၵႅင်း၊ ဝၢၼ်ႈႁူဝ်ၼႃးလႄႈ ဝၢၼ်ႈၼႂ်းလူင် ဢွၼ်ၵၼ်ငိူင်ႉပၢႆႈၽေး သိုၵ်း မႃးသွၼ်ႈဝႆႉတီႈဝတ်ႉၼႃးမၢၵ်ႇၶေႃ။ ၵူၼ်းဝၢၼ်ႈၶၢႆးႁဵဝ်းသမ်ႉ ဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉၼွင်ၵေႃႈ။ ၵူၼ်းဝၢၼ်ႈၵဵတ်းၽူၼ်တင်း ဝၢၼ်ႈတူၼ်ႈၵႅင်းသမ်ႉ ဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉၽူဝ်းတေႃႇ ၸႄႈဝဵင်းသီႇ ပေႃႉ ၸိုင်ႈတႆးပွတ်းႁွင်ႇ။ ယွၼ်ႉသိုၵ်းၶူဝ်းလၢႆး တင်း ၶူဝ်းၶဵဝ် ၶဵင်ႈၶႅင်ၵၢၼ်သိုၵ်းတေႃႇၵၼ် ၵူၼ်းဝၢၼ်ႈမႆႈၸႂ် ၵူဝ်ပဵၼ် ပၢင် တိုၵ်းသေ ဢွၼ်ၵၼ်ငိူင်ႈဝႄႈဢွၵ်ႇမႃးထႃႈ ဝႃႈၼႆ။
ၵူၼ်းပၢႆႈၽေးသိုၵ်း ဝၢၼ်ႈတူၼ်ႈၵႅင်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ “ ပၢင်တိုၵ်းတႄႉ ပႆႇပဵၼ် လႆႈႁၼ် သိုၵ်းၶူဝ်းၶဵဝ် ၶၢမ်ႈမႃးတၢင်းၾၢႆႇတူၵ်းတၢင်း သဵၼ်ႈတၢင်းသီႇပေႃႉ – ၼမ်ႉ လၼ်ႈလႄႈ ႁဝ်းၶႃႈ ၵူဝ်ၶဝ်ပဵၼ်ပၢင်တိုၵ်းၵၼ်သေ လႆႈပၢႆႈဢွၵ်ႇမႃးဝႆႉထႃႈဢွၼ်တၢင်း မိူဝ်ႈၼႆႉတႄႉ မၢၵ်ႇၵွင်ႈလႅပ်ႈ တေတႅၵ်ႇယူႇၶႃႈ။ တီႈဝတ်ႉၼႃးမၢၵ်ႇၶေႃတႄႉ မိူဝ်ႈၶမ်ႈဝႃး ႁဝ်းၶႃႈ ပီႈၼွင်ႉဝၢၼ်ႈတူၼ်ႈၵႅင်း ဢွၼ်ၵၼ်ပၢႆႈဢွၵ်ႇ မႃး ၶႃႈ။ မိူဝ်ႈၼႆႉ ယၢမ်းၵၢင်ၼႂ်သမ်ႉ ၵူၼ်းဝၢၼ်ႈႁူဝ် ၼႃး တင်း ဝၢၼ်ႈၼႂ်းလူင် ၸင်ႇႁွတ်ႈၽႅဝ်မႃးထႅင်ႈၶႃႈ။ တင်းမူတ်း ႁူဝ်ၵူၼ်းတေမီးမွၵ်ႈ 100 ပၢႆၶႃႈ” ဝႃႈၼႆ။
လိူဝ်ၼၼ်ႉ ၵူၼ်းဝၢၼ်ႈၶၢႆးႁဵဝ်း ၸိူဝ်းပၢႆႈၵႂႃႇသွၼ်ႈဝႆႉတီႈဝတ်ႉၼွင်ၵေႃႈ မီးၵူၼ်း 50 ပၢႆ။ တီႈဝတ်ႉၽူဝ်း တေႃႇသမ်ႉ ၵူၼ်းဝၢၼ်ႈၵဵတ်းၽူၼ် ႁူဝ်ၵူၼ်း 35 ၵေႃႉလႄႈ ၵူၼ်းဝၢၼ်ႈတူၼ်ႈၵႅင်း ႁူဝ်ၵူၼ်း 8 ၵေႃႉ ႁူမ်ႈၵၼ် မီး 43 ၵေႃႉ ဝႃႈၼႆ။
ၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ တီႈႁိမ်း ၼမ်ႉလၼ်ႈႁဝ်းၶႃႈ တီႈဝတ်ႉၵွင်းႁုင်းၼႆႉၵေႃႈ မီးၵူၼ်းပၢႆႈမႃးသွၼ်ႈဝႆႉယူႇ ၵူၺ်းၵႃႈ ႁူဝ်ၵူၼ်းမီးၵႃႈႁိုဝ် ပဵၼ်ၵူၼ်း ဝၢၼ်ႈလႂ်ၼႆ ပႆႇလႆႈႁူႉၶႃႈ။ ၵမ်ႉတေၵႂႃႇတူၺ်းယူႇၶႃႈ” ဝႃႈၼႆ။
ၼႂ်းၸႄႈဝဵင်းသီႇပေႃႉၼႆႉ မီးၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃးယူႇတႃႇသေႇ မီးသိုၵ်းလူင်ပွင်ၸိုင်ႈမၢၼ်ႈ၊ သိုၵ်း SSPP လႄႈ သိုၵ်း RCSS ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ