ပၢင်တိုၵ်းပဵၼ်ၼႂ်းဝၢၼ်ႈတူၼ်ႈၵႅင်း လႄႈ ဝၢၼ်ႈၶၢႆးႁဵဝ်း မၢၵ်ႇတူၵ်းသႂ်ႇ ၼႂ်းဝၢၼ်ႈလႄႈ ၵူၼ်းဝၢၼ်ႈ 300 ပၢႆ ပၢႆႈၽေး သိုၵ်းသိူဝ်။
ဝၼ်းတီႈ 24 – 25/12/2018 ၵူၼ်းဝၢၼ်ႈတူၼ်ႈၵႅင်း တင်း ဝၢၼ်ႈၶၢႆးႁဵဝ်း ဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉၼႃးမၢၵ်ႇ ၶေႃ ႁူဝ်ၵူၼ်း 150 ပၢႆ။ ဝတ်ႉၼွင်ၵေႃႈ ႁူဝ်ၵူၼ်း 140 ပၢႆ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။
ၵူၼ်းဝၢၼ်ႈပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ မၢၵ်ႇလူင် တူၵ်းသႂ်ႇ ၵျွင်းလင်ၼိုင်ႈၶႃႈ။ ၾႆးမႆႈႁိူၼ်း ၵူၼ်းဝၢၼ်ႈတူၼ်ႈၵႅင်းလင်ၼိုင်ႈ။ တေႃႈလဵဝ် ၵူၼ်းဝၢၼ်ႈတူၼ်ႈၵႅင်းတင်း ၶၢႆးႁဵဝ်း ဢွၼ်ၵၼ်ပၢႆႈဢွၵ်ႇမႃး မီးႁူဝ်ၵူၼ်း 300 ပၢႆယဝ်ႉ။ တေႃႈလဵဝ် ဢၼ်တိုၵ်ႉပၢႆႈမႃးဢွၵ်ႇမႃးၵေႃႈတိုၵ်ႉမီးယူႇ။ ပၢင်တိုၵ်း တႄႉ တႄႇမိူဝ်ႈဝႃး ယၢမ်းၵၢင်ၼႂ် 8 မူင်း။ ထိုင်မိူဝ်ႈၼႆႉ သဵင်ၵွင်ႈပႆႇယဵၼ် တိုၵ်ႉပဵၼ်ႁၢဝ်ႈႁႅင်းယူႇ” ဝႃႈၼႆ။
တေႃႈလဵဝ် ရူတ်ႉၵႃး ၸွႆႈထႅမ် ၼႂ်းၸႄႈဝဵင်းသီႇပေႃႉ 3 လမ်းလႄႈ ဝဵင်းၼမ်ႉလၼ်ႈ 1 လမ်း ႁူမ်ႈၵၼ် 4 လမ်း ၵႂႃႇပႂ်ႉႁပ်ႉ ၵူၼ်းပၢႆႈၽေးသိုၵ်းတီႈဝၢၼ်ႈႁူဝ်ၼႃးဝႆႉ ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ၵႃး 4 လမ်း ၵႂႃႇပႂ်ႉႁပ်ႉၵူၼ်းပၢႆႈၽေးသိုၵ်း တီႈဝၢၼ်ႈႁူဝ်ၼႃးဝႆႉယူႇ။ မိူဝ်ႈၼႆႉၵေႃႈ ပၢင်တိုၵ်းပဵၼ်ႁႅင်း တပ်ႉသိုၵ်း 2 ၾၢႆႇဢမ်ႇထွၼ် ပၼ်ၵၼ် ၵူၼ်းထဝ်ႈ၊ ၼၢင်းယိင်း၊ လုၵ်ႈဢွၼ်ႇ ၼႂ်းဝၢၼ်ႈတူၼ်ႈၵႅင်း ၵိုတ်းၶၢင်ႉဝႆႉ ပႆႇၸၢင်ႈပၢႆႈဢွၵ်ႇမႃး။ လွင်ႈၵူၼ်း မိူင်း မၢတ်ႇၸဵပ်းလူႉတၢႆတႄႉဢမ်ႇမီး” ဝႃႈၼႆ။
ပၢင်တိုၵ်းပွၵ်ႈၼႆႉၵေႃႈ လႆႈႁူႉဝႃႈ SSPP ဢၼ်ပဵၼ် လုၵ်ႈၸုမ်းဢူၺ်းလီပွတ်းႁွင်ႇလႄႈ တင်းတပ်ႉသိုၵ်း RCSS/SSA ဝႃႈၼႆ။
ၼႂ်းထုင်ႉၼႃးမၢၵ်ႇၶေႃၼႆႉ ၼႂ်းႁၢင်ပီ 2018 ၼႆႉ ပၢင်တိုၵ်းပဵၼ်ၶိူဝ်းယႂ်း။ ၵူၼ်းမိူင်းလႆႈပၢႆႈယၢၼ်ၽေးသိုၵ်း ဢမ်ႇတၼ်းလႆႈႁဵတ်းၵၢၼ် ၽုၵ်ႇသွမ်ႈ။