တွၼ်ႈတႃႇၵူၼ်းမိူင်းသူႈ တေၸၢင်ႈလႆႈၶုတ်းသႅင် ၼႂ်းပိုၼ်ႉတီႈ ႁႃလဵင်ႉတွင်ႉ ၽႂ်မၼ်းလွတ်ႈလွတ်ႈလႅဝ်းလႅဝ်းၼၼ်ႉ ယူႇတီႈလူင်ပွင်ၸိုင်ႈမိူင်းတႆးတိုၵ်ႉဢုပ်ႇ တၢင်းလူင်ပွင်ၸိုင်ႈမိူင်းႁူမ်ႈတုမ်ဝႆႉယူႇ ဝႃႈၼႆ။
ၸၢႆးလိၼ်းမျၢတ်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းသူႈ တွင်ႇထၢမ် ၼႂ်းသၽႃးၸႄႈမိူင်း တႆး တီႈဝဵင်းတူၼ်ႈတီး မိူဝ်ႈဝၼ်းတီႈ 13/12/2018 ၼၼ်ႉဝႃႈ ၸွင်ႇမီးၽႅၼ်ၵၢၼ်တႃႇၶပ်းၶိုင်ပၼ်ၵူၼ်းမိူင်းသူႈ လႆႈ ၶုတ်းသႅင် ႁႃလဵင်ႉတွင်ႉ ဝႃႈၼႆ။
ၸၢႆးလိၼ်းမျၢတ်ႉ ၽူႈတႅၼ်းပႃႇတီႇႁူဝ်သိူဝ် ၸႄႈဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ် ႁဝ်းလႆႈငိၼ်းမႃးတႄႉ တေႃႈလဵဝ် ၼႂ်းမိူင်းႁူမ်ႈတုမ်ၼႆႉ မၢင်တီႈ ဢၼ်ဢွၵ်ႇသႅင်ၼၼ်ႉ ပိူၼ်ႈပေႃးပၼ်ၵူၼ်းပိုၼ်ႉတီႈ ၶုတ်းသႅင် ႁႃၵိၼ်လဵင်ႉ တွင်ႉၵၼ်ယဝ်ႉ။ ၼႂ်းမိူင်းတႆးႁဝ်း ဢၼ်ဢွၵ်ႇသႅင်ၼႆႉသမ်ႉ ပဵၼ်တီႈမိူင်းသူႈႁဝ်း ယွၼ်ႉၼၼ် လႄႈ တွၼ်ႈတႃႇၵူၼ်း မိူင်းသူႈ ႁဝ်းပေႃးတေလႆႈႁဵတ်းၵိၼ်ၵၢၼ် ၶုတ်းႁႃသႅင်ၵၼ် ႁႂ်ႈပေႃး ပဵၼ်ၵၢၼ်ႁႃၵိၼ်လဵင်ႉ တွင်ႉ၊ တႃႇၵူၼ်းမိူင်းႁဝ်းၶႃႈ ပွတ်းဢွၼ်ႇတွၼ်ႈၼိုင်ႈၼႆသေ ၸင်ႇလႆႈတွင်ႈထၢမ်ၼႂ်းသၽႃး” ဝႃႈၼႆ။
“တီႈမိူင်းသူႈၼႆႉ ဢၼ်ၶုတ်းသႅင်ႁႃၵိၼ်လဵင်ႉတွင်ႉယူႇၼႆႉ ပဵၼ်ၶွမ်ႊပၼီႊလႄႈ သုၼ်ႇတူဝ်လွၼ်ႉလွၼ်ႉ။ တႃႇၵူၼ်းၼႂ်းပိုၼ်ႉတီႈ တေလႆႈဢၼုၺၢတ်ႈၶုတ်းသမ်ႉယၢပ်ႇ ထႅင်ႈလွင်ႈၼိုင်ႈၵေႃႈ ၶွမ်ႊပၼီႊဢၼ်ၶဝ်မႃး ၶုတ်းယူႇ ၼၼ်ႉ မၢင်ၶွမ်ႊပၼီႊဝႂ်ၶႂၢင်ႉၶုတ်းသႅင် ပေႃးမူတ်းယဝ်ႉ။ မၢင်ဢၼ်လႆႈဢိုတ်းၵႂႃႇပႅတ်ႈၵေႃႈမီး။ မၢင်ၶွမ်ႊပၼီႊၵေႃႈ ဝႂ်ၶႂၢင်ႉၶုတ်းသႅင်ၸမ် တေမူတ်းဢႃယု။ ၵွပ်ႈၼၼ်လႄႈ ၵူၼ်းမိူင်းသူႈ ၸင်ႇလႆႈတုၵ်းယွၼ်းႁႂ်ႈတွင်ႈထၢမ်ပၼ်ၼႂ်း သၽႃး” ဝႃႈၼႆ။
ၽွင်းလူင်ၾၢႆႇသၽႃႇဝလႄႈ ၾိင်ႈတိုၼ်းပဵၼ် တွပ်ႇလၢတ်ႈၼႂ်းသၽႃးၸႄႈမိူင်းတႆးဝႃႈ “ ၵဵဝ်ႇလူၺ်ႈၶၢဝ်းယၢမ်းလႄႈ ဢွင်ႈတီႈ တေလူင်းပၼ်မိူဝ်ႈလႂ် တေပဵၼ်တီႈလႂ် ဢၼ်ဝႃႈၼၼ်ႉ တေႃႈလဵဝ် လူင်ပွင်ၸိုင်ႈမိူင်းႁူမ်ႈတုမ် တိုၵ်ႉငူပ်ႉငီႉ ၵၼ်ယူႇ။ ၵူၺ်းၵႃႈ တေပဵၼ်မိူဝ်ႈလႂ် တီႈလႂ် ဢၼ်ဝႃႈၼၼ်ႉ ပႆႇပၼ်ၵႂၢမ်းတွပ်ႇလႆႈ။ လိူဝ်ၼၼ်ႉ တႃႇၵူၼ်းမိူင်းပိုၼ်ႉတီႈ တီႈၶုတ်း ႁႃသႅင်ၼၼ်ႉ ၼိုင်ႈလွၵ်း(ၼိုင်ႈဢေႊၶိူဝ်ႊ) တေလႆႈပၼ် 5 သႅၼ်ပျႃး။ လိူဝ်ၼၼ်ႉ ၼိုင်ႈၼႃးႁိူၼ်းလႂ် တေပၼ် ႁဵတ်း 3 ဢေႊၶိူဝ်ႊ” ဝႃႈၼႆ။
တေႃႈလဵဝ် ဢွင်ႈတီႈၶုတ်းသႅင် တီႈမိူင်းသူႈၼၼ်ႉ ၶွမ်ႊပၼီႊတင်း ၵူၼ်းမိူင်းသုၼ်ႇတူဝ်ၵမ်ႈၽွင်ႈ တိုၵ်ႉၶုတ်း သႅင်ယူႇ ဝႃႈၼႆ။
ပၢင်ၵုမ်သၽႃးၸႄႈမိူင်းတႆး ဝၼ်းတီႈ 14/12/2018 ၼႆႉ တင်းမူတ်း ၽူႈတႅၼ်းမီး 141 ၵေႃႉ။ ဢၼ်မႃးၶိုၼ်ႈႁွတ်ႈပၢင် ၵုမ်သမ်ႉ 121 ၵေႃႉ ပေႃးဢဝ်ပိူဝ်ႊသႅၼ်ႊမၼ်းဝႃႈၸိုင် 85.82 % ဝႃႈၼႆ။
