ပၢင်ၵုမ်သၽႃးၸႄႈမိူင်း တီႈဝဵင်းတူၼ်ႈတီးၼၼ်ႉ ၽူႈတႅၼ်းသၽႃး မိူင်းၵိုင် လုင်းၸၢႆးလူင် တွင်ႇထၢမ် ၵဵဝ်ႇၵပ်းမၢႆမီႈ ႁေႃႈရူတ်ႉၵႃးလႄႈ မၢႆမီႈသဵၼ်ႈတၢင်း။ ၽွင်းလူင်ၾၢႆႁူမ်ႇလူမ်ႈလႄႈ လႅၼ်လိၼ်ၸႄႈမိူင်းတႆးလႆႈ တွပ်ႇလၢတ်ႈၵႂႃႇ ၼင်ႇၼႆ။

လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈမၢႆမီႈႁေႃႈရူတ်ႉၵႃး သဵၼ်ႈတႃႈသၢႆတၢင်းၼႆႉ မၼ်းလမ်ႇလွင်ႈတႃႇၵူၼ်းမိူင်းႁဝ်းတႄႉတႄႉ ဢီႈသင်ၵေႃႈယဝ်ႉ မၼ်းလူဝ်ႇလႆႈမီးပၵ်းပိူင်။ ပၵ်းပိူင်ၼႆႉ မၼ်းမီးယူႇသေတႃႉၵေႃႈ ဢမ်ႇမီးၽူႈလႂ်မႃးဢုပ်ႇၶႆႈလၢတ်ႈၼႄၵူၼ်းမိူင်းဝႃႈ ပၵ်းပိူင်မၼ်းမီးၸိူင်ႉႁိုဝ်၊ မၼ်းပဵၼ် ၸိူင်ႉႁိုဝ်ၼႆ ၵမ်းၵမ်းလူဝ်ႇလႆႈလၢတ်ႈပၼ်ၵူၼ်းမိူင်း။ တီႈၵူၼ်းမိူင်းႁဝ်းၶႃႈတႄႉ ၶႂ်ႈလၢတ်ႈဝႃႈ လွင်ႈပၵ်း ပိူင်ၼႆႉ ႁဝ်း လူဝ်ႇလႆႈၸွမ်းၵူႈၵေႃႉ ၽႂ်ၵေႃႈလူဝ်ႇလႆႈယူႇၼႂ်းပၵ်းပိူင်ၵူႈၵေႃႉ ပေႃးၸိူင်ႉၼႆမႃး မိူင်းႁဝ်းၵေႃႈ တေၶိုၼ်ႈ ယႂ်ႇမႂ်ႇသုင်မႃး ပၵ်းပိူင်ဢၼ်ဝႃႈၼၼ်ႉ ပိူဝ်ႈတႃႇႁႄႉၵင်ႈၽေးပၼ်ႁဝ်း” ဝႃႈၼႆ။

လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 တွင်ႈထၢမ် ၼႂ်းသၽႃးမိူင်းတႆးၵႂႃႇ မိူဝ်ႈဝၼ်းတီႈ 12/ 12/2018 ပၢင်ၵုမ်သၽႃးမိူင်းတႆး ပွၵ်ႈၵမ်း 2 တီႈလုမ်းသၽႃးၸႄႈမိူင်းတႆး ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း ဝႃႈ လွင်ႈမၢႆမီႈရူတ်းၵႃးလႄႈ မၢႆမီႈသဵၼ်ႈတႃႈသၢႆတၢင်းၼႆႉ ၸွင်ႇတေမီးၸဝ်ႈၼႃႈတီႈ ၽူႈမီးပုၼ်ႈၽွၼ်းၶဝ် တေလူင်း ပၼ်ပိုၼ်ႉႁူႉၵူၼ်းမိူင်းယူႇႁႃႉ ၵဵဝ်ႇလူၺ်ႈလွင်ႈမၢႆမီႈၼႆႉ။

ၵဵဝ်ႇလူၺ်ႈလွင်ႈၼႆႉသေ ယူႇတီႈၽွင်းလူင် ၾၢႆႇႁူမ်ႇလူမ်ႈလႄႈ လႅၼ်လိၼ် ၸႄႈမိူင်းတႆး ၸဝ်ႈသိုၵ်းလူင်လႃႉဢူး တွပ်ႇလၢတ်ႈၼႂ်းပၢင်ၵုမ်သၽႃးၸႄႈမိူင်းတႆးၼၼ်ႉဝႃႈ “ ယွမ်းႁပ်ႉယူႇ ၵွပ်ႈပိူဝ်ႈ ၾၢႆႇၸဝ်ႈၼႃႈတီႈၵုမ်းၵမ်ရူတ်ႉၵႃး ဢမ်ႇၵုမ်ႇလူမ်ႈ၊ ဝၢႆးၼႆႉမႃး ပေႃးၵုမ်ႇလူမ်ႈၸိုင် တီႈၸႄႈဝဵင်းဢွၼ်ႇၸိူဝ်းၼၼ်ႉၵေႃႈ တေၵမ်းၵမ်း လူင်းႁဵတ်းပၼ် ပၼ်ပိုၼ်ႉႁူႉၵၢၼ်ႁေႃႈရူတ်ႉၵႂႃႇယူႇ” ဝႃႈၼႆ။

ယူႇတီႈလုင်းၸၢႆးလူင် ၽူႈတႅၼ်းသၽႃးၸႄႈမိူင်း ၸႄႈဝဵင်းမိူင်းၵိုင် ၶဵတ်ႇလိူၵ်ႈတင်ႈ မၢႆ 2 ၼႂ်းဝၼ်းလဵဝ် လႆႈတွင်ႈထၢမ် 2 ႁူဝ်ၶေႃႈ။ ႁူဝ်ၶေႃႈတီႈၼိုင်ႈသမ်ႉ ၵဵဝ်ႇလူၺ်ႈလွင်ႈၾၢႆၽွင်းမိူင်း တီႈမိူင်းၵိုင် ဢၼ်လႆႈလူႉၵွႆၼၼ်ႉ ၸွင်ႇတေၵေႃႇ သၢင်ႈႁဵတ်းပၼ်ၵူၼ်းမိူင်း။ ၶေႃႈတီႈသွင်သမ်ႉ ၵဵဝ်ႇလူၺ်ႈလွင်ႈမၢႆမီႈၵၢၼ်ႁေႃႈရူတ်ႉၵႃးလႄႈ သဵၼ်ႈတႃႈသၢႆတၢင်း ၸိူဝ်းၼႆႉ။

ၽူႈတႅၼ်းသၽႃးၸႄႈမိူင်းတႆးၼႆႉ တင်းမူတ်းမီး 141 ၵေႃႉ ဝႃႈၼႆ။