ၽွင်းလူင်ၾၢႆႇႁူမ်ႇလူမ်ႈဝႃႈ ၸုမ်းပျီႇတူႉၸိတ်ႉၼႆႉ ပဵၼ်ၸုမ်းၵူၼ်းမိူင်း တႃႇၵႅတ်ႇၶႄလႅၼ်လိၼ်

ၵႅမ်ၽွင်းလူင်ၾၢႆႇႁူမ်ႇလူမ်ႈဝႃႈ ၸုမ်းပျီႇတူႉၸိတ်ႉၼႆႉ ဢမ်ႇၸႂ်ႈပဵၼ်ၸုမ်းသိုၵ်းမၢၼ်ႈ ပဵၼ်ၸုမ်းၵူၼ်းမိူင်းၵူၺ်း ဝႃႈၼႆ။

ဝၼ်းတီႈ 11/9/2019 ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ၵမ်းထူၼ်ႈ 19 တီႈၼေႇပျီႇတေႃႇၼၼ်ႉ ယူႇတီႈၽူႈတႅၼ်း သ ၽႃးၵူၼ်းမိူင်း တေႃႇမီႉၵုၼ်ႇၶျၢၼ်း တွင်ႈထၢမ် ၼႂ်းပၢင်ၵုမ်ဝႃႈ ၸုမ်းပျီႇတူႉၸိတ်ႉၼႆႉ မီးဝႆႉတွၼ်ႈတႃႇၽႂ်။ လွင်ႈႁဵတ်းလွင်ႈ သၢင်ႈၸုမ်းပျီႇတူႉၸိတ်ႉၼႆႉ ဢဝ်ပုၼ်ႈၽွၼ်းႁဵတ်းသၢင်ႈပၼ်ပိုၼ်ႉတီႈတႃႇၸုမ်းလႂ် ၸဵမ်ၸိူဝ်းၼႆႉ။

ၸွမ်ႁၢၼ် မိၼ်ႉၼွႆႇ တွပ်ႇလၢတ်ႈဝႃႈ “ ၸုမ်းပျီႇတူႉၸိတ်ႉၼႆႉ ဢမ်ႇၸႂ်ႈၸုမ်းတပ်ႉသိုၵ်းႁဝ်းၶႃႈ။ ပဵၼ်ၸုမ်းၵူၼ်းမိူင်းၵူၺ်း ၵွပ်ႈၼၼ် မၼ်းၵဵဝ်ႇလူၺ်ႈ ၾၢႆႇၸဝ်ႈၼႃႈတီႈ၊ ႁူင်းပလိၵ်ႈ၊ ယေး ၸိူဝ်းၼႆႉၵူၺ်း။ ယူႇတီႈတိူင်းသိုၵ်းသေၶွတ်ႇၽွတ်ႈၵုမ်း ၵမ်ဝႆႉ ၽိုၵ်းပၼ်ၵၢၼ်လႄႈၸႅၵ်ႇပၼ်ၼႃႈတီႈပုၼ်ႈၽွၼ်းၵႅတ်ႇၶႄ ၸွမ်းလႅၼ်လိၼ်” ဝႃႈၼႆ။

ၸွမ်ႁၢၼ် မိၼ်ႉၼွႆႇ လၢတ်ႈဝႃႈ ၼႃႈတီႈၸုမ်းပျီႇတူႉၸိတ်ႉဢဝ်ႁူမ်ႇလူမ်ႈပၼ် ၸွမ်းလႅၼ်လိၼ်မိူင်းႁူမ်ႈတုမ်သေဢမ်ႇၵႃး တေလႆႈထွမ်ႇပႃးၶေႃႈၸီႉသင်ႇၾၢႆႇပလိၵ်ႈပႃး။ ၾိုၵ်းၽွၼ်ႉဝႆႉတႃႇၵႅတ်ႇၶႄၸိူဝ်ႉၸၢတ်ႈ ဢမ်ႇဝႃႈၶၢဝ်းယၢမ်းလႂ် ႁႂ်ႈတူဝ်ႈ တၼ်းဝႆႉတႃႇသေႇ” ဝႃႈၼႆ။

သိုၵ်းၵူၼ်းမိူင်းၼႆႉ တွၼ်ႈတႃႇဢဝ်ႁူမ်ႇလူမ်ႈ ဝၢၼ်ႈ၊ ပွၵ်ႉ၊ ဢိူင်ႇ၊ ႁူင်းယႃ၊ ႁူင်းၸၢၵ်ႈ၊ ႁူင်းၸၢၵ်ႈသုၼ်ႇတူဝ် ၸိူဝ်းၼႆႉ သေတႃႉ ဢဝ်ႁူမ်ႇလူမ်ႈပၼ် မိူဝ်ႈၽွင်းမီးပၼ်ႁႃ ႁႂ်ႈလႆႈၸွႆႈ ဝႃႈၼႆ။

ၼႂ်းမိူင်းႁူမ်ႈတုမ်ၼႆႉ ၸုမ်းပျီႇတူႉၸိတ်ႉ တင်းမူတ်းမီး 6,050 ၸုမ်း။

ၼႂ်းမိူင်းတႆးၼႆႉ ဢၼ်ၸႂ်ႉၸိုဝ်ႈပျီႇတူႉၸိတ်ႉသေ ႁဵတ်းၵၢၼ်ၵႃႉၶၢႆ ဢၼ်ၽိတ်းမၢႆမီႈ၊ ပိုတ်ႇၵၢၼ်တေႃႇလွင်း၊ ပေႉၵိၼ် ၵူၼ်းမိူင်း ၸိူဝ်းၼႆႉ ၵေႃႈမီးၼမ်ၼႃႇ” ၵူၼ်းမိူင်းတႆးပွတ်းႁွင်ႇလၢတ်ႈ။