ဢိင်ၼိူဝ် ပၢင်တိုၵ်းသိုၵ်းသိူဝ် ၼႂ်းပိုၼ်ႉတီႈသေ ၵူၼ်းမိူင်းၼႂ်းၸႄႈဝဵင်းသီႇပေႃႉ ဢၼ်ပၢႆႈယၢၼ်ႁိူၼ်းယေး ယၢမ်းလဵဝ် မီးၵႂႃႇယဝ်ႉ ႁူဝ်ၵူၼ်း 900 ပၢႆ ဝႃႈၼႆ။
ဝၼ်းတီႈ 10/12/2018 ယၢမ်းဝၢႆးဝၼ်း မွၵ်ႈ 1 မူင်း ၵူၼ်းဝၢၼ်ႈႁူဝ်ၼႃး၊ ဝၢၼ်ႈၼႂ်းလူင် လႄႈ ဝၢၼ်ႈတႃႈလူင် ႁူဝ်ၵူၼ်း 436 ၵေႃႉ ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈဝတ်ႉဝိႁၢရ်ၼႃးမၢၵ်ႇၶေႃ ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇ ပေႃႉ။ ယွၼ်ႉသိုၵ်းလူင်ပွင်ၸိုင်ႈမၢၼ်ႈ ၶိုၼ်ႈလေႃႇယိုဝ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်တူင်ႉၼိုင်ယူႇဝႆႉတၢင်း ၾၢႆႇဢွၵ်ႇဝၢၼ်ႈႁူဝ်ၼႃးၼၼ်ႉ ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ဝၢႆးလင်ပၢင်တိုၵ်းပဵၼ်မိူဝ်ႈဝႃးၼႆႉသေ တေႃႇထိုင်ယၢမ်းလဵဝ်ၼႆႉ ဢမ်ႇလႆႈငိၼ်းသဵင်ၵွင်ႈထႅင်ႈယဝ်ႉၼႆသေတႃႉ ၵူၼ်းပၢႆႈၽေးတႄႉ ပႆႇႁတ်းပွၵ်ႈႁိူၼ်းၶိုၼ်းၶႃႈ၊ တိုၵ်ႉပႂ်ႉတူၺ်းငဝ်းလၢႆးမၼ်းယူႇ၊ လွင်ႈၶဝ်ႈၼမ်ႉ တၢင်းၵိၼ်တႄႉ ႁဝ်းၶႃႈ ၶိုၼ်းၵဵပ်း ၵိၼ် ဢၼ်ၵဝ်ႇ ဢၼ်ၵိုတ်းၶၢင်ႉဝႆႉ မိူဝ်ႈၵမ်းပူၼ်ႉ ၸိူဝ်းၼၼ်ႉၵူၺ်းၶႃႈ ပေႃးယူႇၵႂႃႇၶၢဝ်းယၢဝ်းတႄႉ ၶဝ်ႈၼမ်ႉတၢင်းၵိၼ်ႁဝ်း ဢမ်ႇလႅပ်ႈၵုမ်ႇ။ တေႃႈလဵဝ် ႁဝ်းၶႃႈ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ဝႆႉၽွင်ႈၶႃႈ။ ပၢင်တိုၵ်းဢၼ်ဝႃႈၼၼ်ႉ ဢမ်ႇႁူႉလႆႈၶႃႈလူင် တေပဵၼ် ၶၢဝ်းပွတ်းႁႃႉ ၶၢဝ်းယၢဝ်းဢၼ်ဝႃႈၼၼ်ႉ” ဝႃႈၼႆ။
တေႃႈလဵဝ် ၵူၼ်းပၢႆႈၽေး ဢၼ်မႃးသွၼ်ႈဝႆႉတီႈဝတ်ႉဝိႁၢရ် ၼႃးမၢၵ်ႇၶေႃၼႆႉ ၵူၼ်းဝၢၼ်ႈႁူဝ်ၼႃး လင်ႁိူၼ်း 126 လင်၊ ၸၢႆး 121 ၵေႃႉ၊ ယိင်း 286 ၵေႃႉ၊ ဝၢၼ်ႈၼႂ်းလူင် လင်ႁိူၼ်း 5 လင်၊ ၸၢႆး 10 ၵေႃႉ၊ ယိင်း 14 ၵေႃႉ၊ ဝၢၼ်ႈတႃႈလူင် လင်ႁိူၼ်း 1 လင်၊ ၸၢႆး 1 ယိင်း 3 ၵေႃႉ ႁူမ်ႈၵၼ်တင်းမူတ်း 436 ၵေႃႉ ဝႃႈၼႆ။
လိူဝ်ၼၼ်ႉ ၼႂ်းဝၼ်းလဵဝ်ၵၼ်ၵူၺ်း ယၢမ်းဝၢႆးဝၼ်း မွၵ်ႈ 1:30 မူင်းၼၼ်ႉ ၵူၼ်းဝၢၼ်ႈၼႃး၊ ၵွင်းဝဵင်း၊ ဝၢၼ်ႈၶုမ်ႇ၊ ဝၢၼ်ႈ ၵျွင်းလႄႈ ၼႂ်းလူင် ၸိူဝ်းၼႆႉ ႁူဝ်ၵူၼ်း 438 ၵေႃႉ ဢွၼ်ၵၼ်ပၢႆႈမႃးသွၼ်ႈဝႆႉတီႈဝတ်ႉဝိႁၢရ်ဝၢၼ်ႈၸၢၼ်းထႅင်ႈ ယွၼ်ႉ ၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃး ႁၢဝ်ႈႁႅင်းလႄႈ ၵူၼ်းဝၢၼ်ႈၵူဝ်ပဵၼ်ပၢင်တိုၵ်းသေ ငိူင်ႉဝႄႈပၢႆႈဢွၵ်ႇ မႃးဝႆႉဢွၼ် တၢင်း ဝႃႈၼႆ။
ၼွၵ်ႈလိူဝ်ၼၼ်ႉ တီႈဝတ်ႉဝိႁၢရ်ဝၢၼ်ႈၸၢၼ်း (ပူႇတႃႇ) ၵူၼ်းပၢႆႈၽေးဢၼ်ပၢႆႈမႃး မိူဝ်ႈႁူဝ်လိူၼ်ၻီႊသႅမ်ႊၿိူဝ်ႊၼႆႉ ပႆႇ ၸၢင်ႈပွၵ်ႈၵိုတ်းၶၢင်ႉဝႆႉ 52 ၵေႃႉ ၸၢႆး 27 ၵေႃႉ၊ ယိင်း 25 ၵေႃႉ ဝႃႈၼႆ။
