ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉဝိႁၢရ် ၼွင်ၵေႃႈ ၸႄႈဝဵင်းသီႇပေႃႉ ႁူဝ်ၵူၼ်း 32 ၵေႃႉၼၼ်ႉ ၶိုၼ်းဢွၼ်ၵၼ် ပွၵ်ႈမိူဝ်းႁိူၼ်းၶိုၼ်းမူတ်းယဝ်ႉ ဝႃႈၼႆ။
ဝၼ်းတီႈ 06/12/2018 ယၢမ်းဝၢႆးဝၼ်း မွၵ်ႈ 1 မူင်း ၼၼ်ႉ ၵူၼ်းဝၢၼ်ႈၶၢႆးႁဵဝ်း တင်း ဝၢၼ်ႈၵုင်းသေႃႉ ဢၼ်ပၢႆႈမႃး သွၼ်ႈဝႆႉတီႈဝတ်ႉဝိႁၢရ်ၼွင်ၵေႃႈၼၼ်ႉ ၶိုၼ်းဢွၼ်ၵၼ်ပွၵ်ႈမိူဝ်းႁိူၼ်းၽႂ်မၼ်းယဝ်ႉ။ ၼႂ်းဝၼ်းၼၼ်ႉ ၵူၺ်းၼင်ႇၵဝ်ႇ ယၢမ်းဝၢႆးဝၼ်း မွၵ်ႈ 2 မူင်း ၵူၼ်းဝၢၼ်ႈၵွင်းဝဵင်း ႁူဝ်ၵူၼ်း 39 ၵေႃႉ ၶိုၼ်းဢွၼ်ၵၼ်ပၢႆႈၽေး မႃးသွၼ်ႈတီႈဝတ်ႉဝိႁၢရ် ဝၢၼ်ႈၸၢၼ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။
ၵူၼ်းမိူင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တေလႆႈဝႃႈ ၼႂ်းပိုၼ်ႉတီႈယဵၼ်ယဝ်ႉႁႃႉ ဢၼ်ဝႃႈၼၼ်ႉ ပႆႇ ယဵၼ် သွင်ၾၢႆႇတိုၵ်ႉၶဵင်ႇၶႅင်ၵၼ်ယူႇ။ မၢင်ဢွင်ႈတီႈၵေႃႈ ၶဝ်ငိူင်ႉဝႄႈထွၼ်ႇယူႇၵူၺ်းၵႃႈ ၵူၼ်းပၢႆႈၽေးႁဝ်းၶႃႈတႄႉ ယွၼ်ႉမႆႈၸႂ်သူၼ်ႁႆႈၼႃး ႁိူၼ်းယေးၶႃႈဢေႃႈ။ ဢၼ်ပီႈၼွင်ႉပွၵ်ႈမိူဝ်းၼၼ်ႉ တင်းၵူဝ် တင်းပွၵ်ႈၼၼ်ႉယဝ်ႉ။ မိူဝ်ႈဝႃး ပီႈၼွင်ႉဝၢၼ်ႈၶၢႆးႁဵဝ်း ပေႃးပၢႆႈဢွၵ်ႇမႃးထႅင်ႈၶႃႈယဝ်ႉ” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉတီႈ ဝတ်ႉဝၢၼ်ႈၸၢၼ်းတႄႉ ႁူဝ်ၵူၼ်း 438 ၵေႃႉတႃႇ လင်ႁိူၼ်း 120 လင်၊ ၸၢႆး 197 ၵေႃႉ၊ ယိင်း 241 ၵေႃႉ။ တီႈဝတ်ႉဝၢၼ်ႈၸၢၼ်း (ပူႇတႃႇ) ၵျွင်း သမ်ႉ ႁူဝ်ၵူၼ်း 52 ၵေႃႉ တႃႇလင်ႁိူၼ်း 15 လင်၊ ၸၢႆး 27 ၵေႃႉ၊ ယိင်း 25 ၵေႃႉ တင်းမူတ်းႁူမ်ႈၵၼ် 490 ၵေႃႉ ဝႃႈၼႆ။
ၵူၼ်းပၢႆႈၽေးဢၼ်ၵိုၵ်းဝႆႉသမ်ႉ ပဵၼ်ၵူၼ်းဝၢၼ်ႈၼႃး၊ ဝၢၼ်ႈၶုမ်ႇ၊ ဝၢၼ်ႈၼႂ်းလူင်၊ ဝၢၼ်ႈၵျွင်း လႄႈ ဝဵင်းၵွင်းဝဵင်း ၸိူဝ်းၼႆႉ။
