ၵူၼ်းပၢႆႈၽေးသိုၵ်းဢၼ်မႃးသွၼ်ႈဝႆႉတီႈ ဝတ်ႉမုင်ႈသႃႇ ၼႂ်းဝဵင်းၼမ်ႉတူႈၼၼ်ႉ ႁူဝ်ၵူၼ်း မီးႁိမ်းၸမ်ႁဵင် ၼႂ်းၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းၽႂ်မၼ်းၵမ်ႈၽွင်ႈ ဝႃႈၼႆ။
ဝၼ်းတီႈ 26/10/2018 ယၢမ်းၵၢင်ၼႂ် ၵူၼ်းဝၢၼ်ႈမိူင်းယဵၼ်၊ ၼွင်ၵႂၢင်၊ ၼမ်ႉတဝ်း၊ ၼွင်သၢၼ်း၊ ဝၢၼ်ႈတီး၊ ၵွင်းၵေး၊ ဝၢၼ်ႈပၢင်ႇလွၵ်း၊ ဝၢၼ်ႈၵွင်းႁုင်းလႄႈ ဝၢၼ်ႈၼႃးၼႃႉ ဢၼ်ပၢႆႈၽေးသိုၵ်းမႃးသွၼ်ႈဝႆႉတီႈဝတ်ႉမုင်ႈသႃႇ ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ႁူဝ်ၵူၼ်း မီးႁိမ်းႁဵင်၊ ၼႂ်းၼၼ်ႉ ၵမ်ႈၽွင်ႈ ဢွၼ်ၵၼ်ပွၵ်ႈ ၶိုၼ်း မိူဝ်းႁိူၼ်းၽႂ်မၼ်းမိူဝ်ႈၼႆႉ ဝႃႈၼႆ။
လုင်းၸၢႆးပႃႉၺၢၼ်ႇ ၵႅမ်ၶွမ်ႊမတီႊၸုမ်းၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်း ဢၼ်မီးဝႆႉတီႈ ဝတ်ႉမုင်ႈသႃႇ 900 ပၢႆၼႆႉ ၵမ်ႈၽွင်းႁၢင်ႈႁႅၼ်းတေပွၵ်ႈမိူဝ်းၶိုၼ်းမိူဝ်ႈၼႆႉ။ ပႂ်ႉၽူႈၵွၼ်းဢိူင်ႇထုင်ႉမိူင်းယဵၼ် မႃးႁွင်ႉႁပ်ႉၵႂႃႇၵူၺ်းယဝ်ႉ။ ပၢင်တိုၵ်းတႄႉ ယဵၼ်ၵႂႃႇယဝ်ႉ လႆႈငိၼ်းဝႃႈ တပ်ႉသိုၵ်း တင်း သွင်ၾၢႆႇ လႆႈထွၼ်ပၼ်ၵၼ်ၶိုၼ်းယဝ်ႉ။ တေႃႈလဵဝ်ၼႆႉ ပဵၼ်ၶၢဝ်းၵူၼ်းမိူင်းလူဝ်ႇဢဝ်ၶဝ်ႈဢဝ်ၼမ်ႉၵေႃႈၸႂ်ႈ” ဝႃႈၼႆ။
မိူဝ်ႈဝႃး ဝၼ်းတီႈ 25/10/2018 ၵူၼ်းပၢႆႈၽေးသိုၵ်း ႁွတ်ႈၽႅဝ်မႃးတီႈဝတ်ႉမုင်ႈသႃႇ ထႅင်ႈ 3 ဝၢၼ်ႈ ႁူဝ်ၵူၼ်းမီး 222 ၵေႃႉ။ မိူဝ်ႈဝၼ်းတီႈ 24/10/2018 ႁူဝ်ၵူၼ်းဢၼ်ပၢႆႈမႃးသမ်ႉ 700 ပၢႆ သွင်ဝၼ်း ႁူမ်ႈၵၼ် တင်းမူတ်း မီး 900 ပၢႆ ဝႃႈၼႆ။
ၵူၼ်းပၢႆႈၽေးသိုၵ်းႁွတ်ႈတီႈဝတ်ႉမုင်ႈသႃႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵၢင်ၼႂ် ၵႃး 3-4 လမ်း တၢင်ႇၵူၼ်း ဝၢၼ်ႈပွၵ်ႈမိူဝ်းၵေႃႈမီးၵမ်ႈၽွင်ႈယဝ်ႉ။ ၵႃးဢၼ်ၵႂႃႇသူင်ႇသေ ပွၵ်ႈမႃးႁပ်ႉၶိုၼ်းၵေႃႈမီး။ ပၢင်တိုၵ်းတႄႉ ပႆႇယဵၼ်လီ။ မိူဝ်ႈၶမ်ႈဝႃးတိုၵ်ႉငိၼ်းသဵင်ၵွင်ႈယူႇ။
မိူဝ်ႈဝၼ်းတီႈ 22-23/10/2018 ၼၼ်ႉ သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်း ၼႂ်းထုင်ႉမိူင်း ယဵၼ် ထိုင်မႃး ၼႂ်းဝၼ်းတီႈ 24/10/2018 ဝၼ်းဢွၵ်ႇဝႃႇသႃ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ၵူၼ်းမိူင်း ထုင်ႉမိူင်း ယဵၼ် ႁိမ်းႁဵင် ဢွၼ်ၵၼ်ပၢႆႈယၢၼ်ႁိူၼ်းယေး ဢွၵ်ႇမႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ