ပီမႂ်ႇၵူႈပီမႂ်ႇ ၸိူင်ႉၼင်ႇ ပီမႂ်ႇၵေႃးၸႃႇ၊ လိူၼ်ႁႃႈ/ သၢင်းၵျၢၼ်ႇ(သူင်ၵၢၼ်း) လႂ်ၸိူဝ်းၼႆႉ။ ပီမႂ်ႇလိူၼ်ၸဵင်၊ ပီမႂ်ႇလုမ်ႈၾႃႉ (ပီမႂ်ႇလူၵ်ႈ) ၸိူဝ်းၼႆႉ မၼ်းၵေႃႈ မိူၼ်ၵၼ်ၵူၺ်း ၼင်ႇႁိုဝ် ႁဝ်းတေ ဝူၼ်ႉမႄးထတ်းသၢင်ၶိုၼ်းလႆႈ တူဝ်မႂ်ႇ ႁႂ်ႈတူဝ်မႂ်ႇ၊ ၸႂ်မႂ်ႇ၊ လၢႆးႁဵတ်းမႂ်ႇ။ ဢၼ်ပူၼ်ႉမႃး ၼႂ်းၶၢဝ်းတၢင်း 1 ပီ ဢၼ်လႂ်ဢမ်ႇလီ ႁဝ်းၵေႃႈ ပွႆႇပႅတ်ႈသေ ၶိုၼ်းမူၼ်ႉ မႄးတူဝ်မႂ်ႇ၊ ၸႂ်မႂ်ႇ ယဝ်ႉၵေႃႈ ပိူင်လူင်မၼ်း ႁဝ်းၶႃႈတေလႆႈဝႆႉၸႂ်ၵႂၢင်ႈ၊ ၸႂ်ယႂ်ႇ၊ ၸႂ်ယၢဝ်း။ မေႃထွမ်ႇ၊ မေႃဝူၼ်ႉ၊ မေႃသၢင်ႈလႄႈ မေႃ ၶဝ်ႈႁႃပိူၼ်ႈ၊ မေႃႁူမ်ၸူမ်း ႁၵ်ႉပိူၼ်ႈလႆႈ ပိူၼ်ႈၵေႃႈ ၸင်ႇတေႁၵ်ႉႁဝ်းလႆႈ။
ၵွပ်ႈၼႆလႄႈ ႁဝ်းၶႃႈ မုင်ႈမွင်းဝႃႈ တေလႆႈမီးၸႂ် ပိုတ်ႇၵႂၢင်ႈၶႂၢင်သေလႄႈ မီးၼမ်ႉၸႂ် ဢဝ်မဵတ်ႉတႃႇ ႁဵတ်းၵေႃႉၵၼ် ဢဝ်ၵႂၢမ်းလီ ၵႂၢမ်းဝၢၼ်သေ ႁဵတ်းၵေႃႉၵၼ် ဢဝ်ၼမ်ႉၸႂ် ၽိူၵ်ႇၸိုၼ်ႈၶၢဝ်သႂ်သေ ႁဵတ်းၵေႃႉၵၼ် ႁႂ်ႈဢွမ်ႇလွမ်ႈၽွမ်ႉ ပဵင်းၵၼ်ၵႂႃႇၶႃႈ။
မႂ်ႇသုင်ၶႃႈ
ၸၢႆးသႅင်ယ
ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ