ၵူၼ်ႈဝၢၼ်ႈပုင်းလူင် ၸႄႈဝဵင်းၵျွၵ်ႉမႄး ၺႃးၸုမ်းယိပ်းၵွင်ႈၵၢင်ႇ ၸုမ်းၼိုင်ႈတီႉၺွပ်းၵႂႃႇ တေႃႇထိုင် ယၢမ်းလဵဝ် ပႆႇပွႆႇ တူဝ် ပီႈၼွင်ႉၸိူဝ်ႉၶိူဝ်း လုၵ်ႈလၢင်းၼၢင်းမေးပဵၼ်ဢၼ်တူၵ်းၼမ်ႉတႃ မႆႈၸႂ်ၸွမ်း။
ဝၼ်းတီႈ 25/11/2018 ယၢမ်းၵၢင်ၶိုၼ်း 11:30 မူင်း လုင်းဢေႃးပႃႇ ဢႃယု မွၵ်ႈ 50 ပီပၢႆ ၵူၼ်းဝၢၼ်ႈပုင်းလူင် ပွၵ်ႉဝၢၼ်ႈ မႂ်ႇ ၵိင်ႇၽႄမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၺႃးၸုမ်းသိုၵ်းၸုမ်းၼိုင်ႈၶဝ်ႈတီႉၺွပ်း ဢဝ်တူဝ် မၼ်း ၸၢႆး တီႈၼႂ်းထဵင်ၼႃး ႁိမ်းဝၢၼ်ႈၼမ်ႉမင်း တေႃႇထိုင်ယၢမ်းလဵဝ် ပႆႇပွႆႇတူဝ် ပွၵ်ႈၶိုၼ်း ဝႃႈၼႆ။
ၵူၼ်းဝၢၼ်ႈပုင်းလူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ၸုမ်းသိုၵ်းဢူၺ်းလီပွတ်းႁွင်ႇၶႃႈဢေႃႈ ဢၼ်ၶဝ်ႈ မႃးတီႉၺွပ်း။ ၵွၼ်ႇၶဝ်တေမႃးတီႉၺွပ်းၼၼ်ႉ ၶဝ်ယိုဝ်းၵွင်ႈလွၵ်ႇငိုတ်ႈၵမ်းၼိုင်ႈ။ မိူဝ်ႈၽွင်းၼၼ်ႉ လုင်းဢေႃးပႃႇ ၸႂ်ႉႁဝ်းၶႃႈ ၸိူဝ်း ဢၼ်ၼွၼ်းပႂ်ႉတီႈၼႃးၸွမ်းၵၼ်ၼၼ်ႉ ႁႂ်ႈပၢႆႈဢွၼ်တၢင်း ႁဵတ်းၼၼ်သေ ႁဝ်းၶႃႈ တၼ်းလႆႈပၢႆႈ လွတ်ႈၵၼ်မူတ်း ၵိုတ်းထႅင်ႈ လုင်းဢေႃးပႃႇတႄႉ ဢမ်ႇတၼ်းပၢႆႈလွတ်ႈသေ ၺႃးၺွပ်းၵႂႃႇၵမ်းလဵဝ်ၼၼ်ႉၶႃႈယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ မိူဝ်ႈၼႆႉ ယၢမ်းၵၢင်ၼႂ် လႆႈထူပ်းႁၼ် မၢၵ်ႇႁူဝ် တင်းၶႅပ်းတိၼ် တီႈၼႃႈႁၢၼ်ႉၶၢႆၶဝ်ႈၽၵ်း သၽႃႇဝ တီႈဝၢၼ်ႈၼမ်ႉမင်းၶႃႈ။ လႆႈႁၼ်ပႃးႁွႆးလိူတ်ႈသေ။ ႁဝ်းထၢင်ႇတႄႉ လုင်းဢေႃးပႃႇ လႅပ်ႈတေၺႃးၸႅတ်ႈ ထၢမ်ပေႃႉ ပေႃႉထုပ်ႉထုပ်ႉႁၢဝ်ႈႁႅင်း။ တေႃႇထိုင်တေႃႈလဵဝ်တႄႉ ပႆႇလႆႈငိၼ်းၶၢဝ်ႇငၢဝ်းသင် တၢႆႁိုဝ် လိပ်းႁိုဝ်ၵေႃႈ ပႆႇႁူႉ။ လိူဝ် ၼၼ်ႉ ၶဝ်တီႉၺွပ်းၵႂႃႇတၢင်းလႂ် ၾၢႆႇလႂ် ဢၼ်ဝႃႈၼၼ်ႉၵေႃႈ ပႆႇႁူႉ တုၵ်းယွၼ်းပႃႇတီႇမႂ်ႇသုင်ၸိုင်ႈတႆးႁဝ်းၶႃႈ ၸွႆႈ ထႅမ်ပၼ်သေၵမ်း” ဝႃႈၼႆ။
လုင်းဢေႃးပႃႇၼႆႉ မီးလုၵ်ႈလၢင်းဝႆႉ 5 ၵေႃႉ။ မၼ်းၸၢႆးၼႆႉ ယၢမ်းပဵၼ်ၽူႈၵွၼ်းဢိူင်ႇပုင်းလူင်မႃးသေဢမ်ႇၵႃး တေႃႈ လဵဝ်သမ်ႉ ပဵၼ်ၽူႈၵိူဝ်းၵုမ်ၽူႈၵွၼ်းဢိူင်ႇပုင်းလူင်ဝႆႉ ဝႃႈၼႆ။
“ လုင်းဢေႃးပႃႇၼႆႉ ပဵၼ်ၵူၼ်းဢၼ်ၸွႆႈထႅမ်လုၵ်ႈဝၢၼ်ႈလုၵ်ႈဢိူင်ႇတႄႉတႄႉ ယူႇတီႈႁဝ်းၶႃႈၵူၼ်းဝၢၼ်ႈၵႆႉပၼ်ၾၢင်ႉ လုင်းႁဝ်းယူႇ ႁႂ်ႈဝႆႉသတိၽွင်ႈ ယွၼ်ႉဝႃႈ တၢင်းပွတ်းႁဝ်းၶႃႈၼႆႉ သိုၵ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးၼမ်၊ ဢၼ်မႃး တီႉဢမ်ႇၸႂ်ႈၵူၼ်းၶူဝ်းၶဵဝ်သေတႃႉ ပဵၼ်ဢူၺ်းလီၵၼ်လႄႈ ႁဝ်းၶႃႈဢမ်ႇလိူဝ်လႆႈ၊ တုၵ်းယွၼ်းၶူဝ်း ၶဵဝ်ႁဝ်းၶႃႈ တူၺ်း လူပၼ်သေၵမ်း” ၵူၼ်းဝၢၼ်ႈ ပုင်းလူင် လၢတ်ႈၼင်ႇၼႆ။
ၼႂ်းထုင်ႉၼႆႉ မီးၸုမ်းယိပ်းၵွင်ႈၵၢင်ႇလၢႆလၢႆၸုမ်း၊ ပႃးၸဵမ်ၸုမ်းသိုၵ်းလူင်ပွင်ၸိုင်ႈ၊ သိုၵ်းၶူဝ်းၶဵဝ်၊ သိုၵ်းၶူဝ်းလၢႆး၊ သိုၵ်း လွႆ ၸိူဝ်းၼႆႉ ၵႂႃႇမႃးတူင်ႉၼိုင်။
