သိုၵ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ၶဵင်ႈၶႅင်၊ ယိုဝ်းၵၼ်ၶိုၼ်း ၼႂ်းၸိုင်ႈတႆး ပွတ်းႁွင်ႇ လၢႆလၢႆၸႄႈဝဵင်းလႄႈ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇၽိုတ်ႇ ၸိူဝ်းၺႃးတီႉ၊ ၺႃးၶႃႈတၢႆၵေႃႈမီး။

ဝၼ်းတီႈ 20/11/2018 ယၢမ်းၵၢင်ၶမ်ႈ မွၵ်ႈ 7 မူင်းၼၼ်ႉ ႁူဝ်မၢဝ်ႇဢိူင်ႇဢီႇၼၢႆး ၸိုဝ်ႈႁွင်ႉ ၸၢႆးဢၢႆႈမွင်ႇ ၵူၼ်းဝၢၼ်ႈ ဢီႇ ၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈတီႉၺွပ်းၵႂႃႇ ထိုင်ယၢမ်းလဵဝ် ပေႃႈမႄႈ ပီႈၼွင်ႉၸိူဝ်ႉၶိူဝ်း လုၵ်ႈလၢင်းၼၢင်းမေး မၼ်းၸၢႆး ပဵၼ်ဢၼ်မႆႈၸႂ်ၸွမ်း ဝႃႈၼႆ။

ၵူၼ်းၼႂ်းဢိူင်ႇဢီႇၼၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ် ႁွင်ႉၵႂႃႇႁူဝ်မၢဝ်ႇလူင်ဢီႇၼၢႆး။ ၶဝ်ဝႃႈ ၶဝ်တေႁွင်ႉ ၵႂႃႇထၢမ်လွင်ႈထၢမ်တၢင်းမၼ်းသေ ယဝ်ႉၵေႃႈ တေၶိုၼ်းပၼ်မႃးယူႇၼႆၵူၺ်း။ လွင်ႈဢၼ် ၶဝ်ႁွင်ႉၵႂႃႇထၢမ် လွင်ႈထၢမ် တၢင်းဢၼ်ဝႃႈၼၼ်ႉ ပဵၼ်လွင်ႈသင် ဢမ်ႇလႆႈႁူႉၸွမ်း ပေႃးတူဝ်မၼ်း ၸၢႆးပွၵ်ႈမႃးၵူၺ်း ၸင်ႇႁူႉ” ဝႃႈၼႆ။

ၶၢဝ်ႇဢမ်ႇယိုၼ်ယၼ်လၢတ်ႈဝႃႈ “ ပဵၼ်ၸုမ်းဢူၺ်းလီပွတ်းႁွင်ႇတီႉၵႂႃႇၼႆသေတႃႉ ၾၢႆႇၸုမ်းဢူၺ်းလီပွတ်းႁွင်ႇ ဢမ်ႇ ယိုၼ်ယၼ်သင်ၵဵဝ်ႇၵပ်းလွင်ႈၼႆႉ။ ၸိူင်ႉၼၼ်ၼင်ႇၵဝ်ႇ ၽွင်းၶၢဝ်းဢွၵ်ႇဝႃႇၼၼ်ႉၵေႃႈ ၵူၼ်းဝၢၼ်ႈထုၵ်ႇၶႃႈ တၢႆၵေႃႉ ၼိုင်ႈၼၼ်ႉၵေႃႈၼႄးပဵၼ်ၸုမ်း RCSS ၵဵဝ်ႇၵပ်းလွင်ႈၼႆႉ ၾၢႆႇ RCSS ၵေႃႈဢမ်ႇတူၵ်ႇလၢတ်ႈသင်။

တေႃႈလဵဝ် တၢင်းပွတ်းဢိူင်ႇဢီႇၼၢႆးၼႆႉ သိုၵ်းဢၼ်တူင်ႉၼိုင်ၵႂႃႇမႃးယူႇတႃႇသေႇမီး သိုၵ်းလူင်ပွင်ၸိုင်ႈမၢၼ်ႈ၊ သိုၵ်း ဢူၺ်းလီပွတ်းႁွင်ႇလႄႈ သိုၵ်း RCSS ။ ၼႂ်းၸုမ်းဢူၺ်းလီပွတ်းႁွင်ႇတႄႉ မီးၸုမ်းသိုၵ်း TNLA တင်း SSPP ႁူမ်ႈ ၵၼ်တူင်ႉၼိုင်။

ၵူၼ်းဝၢၼ်ႈဢီႇၼၢႆး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ဢမ်ႇဝႃႈသိုၵ်းၸုမ်းလႂ်၊ ၸုမ်းလႂ်မႃးယွၼ်းၵေႃႈ ႁဝ်းၶႃႈ ၵူၼ်းမိူင်းလႆႈပၼ် ဢမ်ႇဝႃႈသိုၵ်းမၢၼ်ႈ၊ သိုၵ်းၶူဝ်းၶဵဝ်၊ သိုၵ်းၶူဝ်းလၢႆးလႄႈ သိုၵ်းလွႆ ၸဵမ်ၸိူဝ်းၼႆႉ။ ၵူၺ်းၵႃႈ ဢမ်ႇမီး ၸုမ်းလႂ် တေမႃးယိပ်းၵွင်ႈဢဝ်ႁူမ်ႇလူမ်ႈ ပႂ်ႉပၼ်ၼႃႈႁိူၼ်း ၼႃးဝၢၼ်ႈႁဝ်း။ သမ်ႉၼႄးၵူၼ်းဝၢၼ်ႈ ပဵၼ်ၸႂ်ၸုမ်းၼၼ်ႉ ၸုမ်းၼႆႉသေတီႉမတ်ႉၶႃႈႁႅမ်- ႁဝ်းၶႃႈ ဝူၼ်ႉဝႆႉတႄႉ တေၸူဝ်းၵၼ်ပၢႆႈၵႂႃႇမိူင်းထႆးယဝ်ႉၶႃႈဢေႃႈ” ဝႃႈၼႆ။

ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 20/11/2018 ယၢမ်းၵၢင်ၼႂ် သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင် တိုၵ်းၵၼ် တီႈႁၢဝ်းသၼ်လွႆႁၢင်း ၾၢႆႇတူၵ်းဝၢၼ်ႈပၢင်လူင် ယၢၼ်ၵႆဝၢၼ်ႈ မွၵ်ႈ 2 လၵ်း တီႈလႅၼ်ၶႅၼ်ႈ ဢိူင်ႇပၢင်လူင် တင်း ဢိူင်ႇၵွင်းၶႃႇ ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ၵူၼ်းမိူင်းဢွၼ်ၵၼ် တူၵ်းၸႂ်တိုၼ်ႇသၢၼ်ႈ။ မၢင်ၸိူဝ်း ၵေႃႈဝႃႈ ဢမ်ႇမီးလွင်ႈႁူမ်ႇလူမ်ႈယဝ်ႉၼႆသေ ပႃးလုၵ်ႈမေးငိူင်ႉပၢႆႈၵေႃႈမီး။