ၸဝ်ႈၼႃႈတီႈပလိၵ်ႈ ဝဵင်းၵဵင်းမႆႇႁူမ်ႈၵၼ်ၸွမ်းႁႃတူဝ် ၸၢႆးၵေႃးယ ဢၼ်ထၢင်ႇထိူမ်ဝႃႈ ပဵၼ်ၵူၼ်းၶႃႈႁႅမ်မေးၸဝ်ႈၵဝ်ႇတီႈ  ၵဵင်းမႆႇ ၸိုင်ႈထႆး။

ဝၼ်းတီႈ 20/11/2018 သိုဝ်ႇၶၢဝ်ႇၵဵင်းမႆႇပိုၼ်ၽၢဝ်ႇဝႃႈ ၸဝ်ႈၼႃႈတီႈၾၢႆႇၽွင်းငမ်း၊ ၾၢႆႇပလိၵ်ႈႁူမ်ႈၵၼ် လူင်းပိုၼ်ႉတီႈ ၸွမ်းႁႃတူဝ်ၸၢႆးၵေႃးယ ဢၼ်ထုၵ်ႇၼႄးဝႃႈၶႃႈႁႅမ်မေးၼၢင်းမၼ်းၸၢႆးတၢႆတီႈမႄႈရိမ်း ဝဵင်းၵဵင်းမႆႇ ၸိုင်ႈထႆး ၶၢတ်ႈလၢမ်းဝႃႈ ပၢႆႈၶဝ်ႈၵႂႃႇတၢင်းၼႂ်းထိူၼ်ႇလွႆသုထဵပ်ႈဝႃႈၼႆ။

ၽွင်းၶဝ်ႈၵႂႃႇၵူတ်ႇထတ်းၼၼ်ႉၸဝ်ႈၼႃႈတီႈထူပ်းႁၼ်ႁွႆးတိၼ်၊ ႁွႆးၸူႉတုမ်ၾႆးႁုင်ၵိၼ်ၶဝ်ႈၽၵ်း၊ မီးၶဝ်ႈသွႆးဢေႃႇတေႃႇ၊ ၶဝ်ႈသၢၼ်ၸိူဝ်းၼႆႉ ၊ယူႇတီႈၸဝ်ႈၼႃႈတီႈပလိၵ်ႈသေ တေၶတ်းၸႂ် ၸွမ်းႁႃတူဝ်မၼ်းၸၢႆးတေႃႇပေႃးထူပ်းႁၼ်ၼႆယဝ်ႉ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ – “ဢၼ်ၶႃႈႁႅမ် ၼၢင်းတိင်ႉတၢႆၼၼ်ႉ ပဵၼ်ၽႂ်တႄႉတႄႉဢၼ်ဝႃႈၼၼ်ႉပႆႇၸၢင်ႈယိုၼ်ယၼ်။ ၵူၺ်းၵႃႈ ၵွၼ်ႇတေပဵၼ်လိူင်ႈၼၼ်ႉ ၵေႃႉပဵၼ်ၽူဝ်မႃးႁႃသေ မၼ်းၸၢႆးသမ်ႉႁၢႆၵႂႃႇလႄႈ လၢႆၾၢႆႇၸင်ႇၶၢတ်ႈလၢမ်းဝႃႈ ပဵၼ်ၼမ်ႉမိုဝ်းမၼ်းၸၢႆး ၸိူင်ႉႁိုဝ်ၵေႃႈယဝ်ႉ ပေႃးတီႉလႆႈတူဝ်မၼ်းၸၢႆးသေမႃး တွင်ႈထၢမ်ယဝ်ႉၸင်ႇ တေတႅပ်းတတ်းလႆႈဝႃႈ ပဵၼ်ၽႂ်တႄႉတႄႉဢၼ်ၶႃႈႁႅမ်ၼၢင်းတိင်ႉ ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 12/11/2018 ၼၼ်ႉ ၼၢင်းတိင်ႉ ဢႃယု 33 ပီ ၵူၼ်းဝၢၼ်ႈဝူဝ်းလၢႆး ၸႄႈဝဵင်း မိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ဢၼ်ႁွတ်ႈၽႅဝ် ႁဵတ်းၵၢၼ်ဝႆႉတီႈဝဵင်းၵဵင်းမႆႇ ၸိုင်ႈထႆးၼၼ်ႉၺႃးၶႃႈႁႅမ်တၢႆ တီႈႁွင်ႈလိုဝ်ႈၵူၼ်းႁဵတ်းၵၢၼ် ဢၼ်မီးၼႂ်းဢိူင်ႇမႄႈရႅမ်ႊ ၸႄႈဝဵင်း မႄႈရိမ်ႊ ၸႄႈတွၼ်ႈၵဵင်းမႆႇ ၸိုင်ႈထႆး ။ လၢႆၾၢႆႇၶၢတ်ႈလၢမ်းဝႃႈပဵၼ်ၼမ်ႉမိုဝ်းၽူဝ်မၼ်းၼၢင်း ၸၢႆးၵေႃးယ။

ၸၢႆးၵေႃးယ ဢမ်ႇၼၼ်ႁွင်ႉ ၸၢႆးယ ဢႃယု 38 ပီ ယူႇဝၢၼ်ႈသၢမ်ပူၼ်း ဢိူင်ႇယၢင်းလွႆ ၸႄႈဝဵင်း မိူင်းၵိုင် ၸႄႈတွၼ်ႈလွႆ လႅမ် ၸိုင်ႈတႆးပွတ်းၸၢၼ်း ဝၢႆးပဵၼ်လိူင်ႈယဝ်ႉမၼ်းၸၢႆးႁၢႆၵႂႃႇ ။ မိူဝ်ႈလဵဝ် ၸဝ်ႈၼႃႈတီႈ ပလိၵ်ႈထႆး ၸွမ်းႁႃတူဝ်ဝႆႉလိူဝ် ၼၼ်ႉလႆႈၵပ်း သၢၼ်ၸဝ်ႈၼႃႈတီႈ ၸွမ်းလႅၼ် လိၼ် ႁႂ်ႈပၵ်းတႃ ပႂ်ႉတူၺ်း ယူႇဝႃႈၼႆ။