ၶွမ်ႊမသျိၼ်ႊငမ်းယဵၼ်မၢၼ်ႈ တင်း ပႃႇတီႇမႂ်ႇသုင်ၸိူဝ်ႉၸၢတ်ႈ ယၢင်းလႅင် KNPP ႁူပ်ႉဢုပ်ႇၵၼ် ၼွၵ်ႈလႅၵ်ႈ တီႈဝဵင်း ၵဵင်းမႆႇ ၸိုင်ႈထႆး။
ဝၼ်းတီႈ 18/11/2018 ယၢမ်းၵၢင်ဝၼ်း ၶွမ်ႊမသျိၼ်ႊငမ်းယဵၼ်မၢၼ်ႈ (Peace Commission – PC) တင်း ပႃႇတီႇမႂ်ႇ သုင်ၸိူဝ်ႉၸၢတ်ႈယၢင်းလႅင် KNPP လႄႈ ၸုမ်းၶၢင် KIA ႁူပ်ႉဢုပ်ႇၵၼ် တီႈႁူင်းႁႅမ်းၶမ်းမွၼ်ႉလၢၼ်ႉၼႃး ၸႄႈဝဵင်း သၼ်ၵမ်းၽႅင်း ၸႄႈတွၼ်ႈၵဵင်းမႆႇ ၸိုင်ႈထႆး။ တၢင်းၾၢႆႇ KNPP လႄႈ PC တႄႉ တူၵ်းလူင်းလႆႈၸႂ်ၵၼ် တႃႇၶိုင်သၢင်ႈ ၼႄၼမ်ႉၼႄတူဝ် လွင်ႈၸၼ်ႉၸႄႈမိူင်း၊ လွင်ႈၸၼ်ႉမိူင်းႁူမ်ႈတုမ်။ ယဝ်ႉၵေႃႈ လွင်ႈၸၼ်ႉပႃႈတႂ်ႈႁူပ်ႉလွင်ႈယၢပ်ႇ ၽိုတ်ႇၸိူဝ်းၼၼ်ႉ ႁႂ်ႈႁူပ်ႉဢုပ်ႇၵၼ် ၸႅင်ႈၸႅင်ႈလႅင်းလႅင်း ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်းမၢႆ 3 RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ပိူင်လူင်မၼ်းတႄႉ ဢၼ်ၶဝ်မႃး ထူပ်းၼႆႉ ပဵၼ် 4 ၸုမ်းယႂ်ႇ။ တႃႇ 2 ၸုမ်းတႄႉ ပဵၼ်ၸုမ်းလူင်းလၢႆးမိုဝ်း NCA။ ထႅင်ႈ 2 ၸုမ်းတႄႉ ပဵၼ်ၸုမ်းဢၼ်ပႆႇ လူင်း လၢႆးမိုဝ်း NCA ။ ၶဝ်ၵေႃႈ ပွင်ႇဝႃႈ ၼႂ်းၵၢၼ်ငမ်းယဵၼ်ၼႆႉ ပေႃးၵူႈၸုမ်းပႆႇၶဝ်ႈၼႆ မၼ်းၵေႃႈပႆႇယဝ်ႉ။ ဢိင်ၼိူဝ် ငဝ်းလၢႆးၽႂ်မၼ်းသေ မႃးႁူပ်ႉဢုပ်ႇၵၼ်” ဝႃႈၼႆ။
သိုပ်ႇလၢတ်ႈဝႃႈ“ မိူၼ်ၼင်ႇ ၶၢင် KIA/ KIO ၶဝ်ၵေႃႈမႃးဢုပ်ႇ တေႁဵတ်းႁိုဝ် ႁႂ်ႈပေႃးလႆႈႁူပ်ႉၵၼ်ၵႂႃႇတၢင်းၼႃႈထႅင်ႈ။ တင်းၾၢႆႇ PC ၶဝ်တႄႉ မႃးသိူဝ်ႇတၢင်းပၼ် ၼႂ်းၵႄႈတင်းသွင်ၾၢႆႇ လူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇ။ ႁဝ်းမႃး တူၺ်း ပီႈၼွင်ႉယၢင်းလႅင် KNPP ၵေႃႈ တေႃႈၼင်ႇၼၼ်ယဝ်ႉ။ ၶဝ်ၵေႃႈ မၼ်းမီးလွင်ႈၶွင်ႉၶမ်ၵၼ် ဝႆႉယူႇ တႃႇတေႁႂ်ႈ ၶၵ်ႉၵၢၼ်ငမ်းယဵၼ် ပေႃးတေၶႅမ်ႉလႅပ်ႈ ၵႂႃႇတၢင်းၼႃႈလႆႈလီလီၼၼ်ႉ တေလႆႈႁဵတ်းႁိုဝ် ၶိုၼ်းမႃးဢုပ်ႇၵၼ်” ဝႃႈၼႆ။
ၸုမ်းၶၢင် KIA တႄႉ တုၵ်းယွၼ်း ဢုပ်ႇၵုမ်ၵႂႃႇလွင်ႈသင် ဢၼ်ဝႃႈၼၼ်ႉ ဢမ်ႇလႆႈႁူႉ ၸွမ်းလၢႆးႁူဝ်ယွႆႈမၼ်း ယွၼ်ႉဝႃႈ ဢမ်ႇပၼ်ၶႂၢင်ႉၸုမ်းသိုဝ်ႇၶၢဝ်ႇ ၶဝ်ႈဢဝ်ၶၢဝ်ႇ ဝႃႈၼႆ။
ယူႇတီႈၶွမ်ႊမသျိၼ်ႊလွင်ႈငမ်းယဵၼ်မၢၼ်ႈ ဢၼ်ၵႂႃႇႁူပ်ႉထူပ်းၸုမ်းယိပ်းၵွင်ႈၵၢင်ႇ 4 ၸုမ်း တီႈၵဵင်းမႆႇၼၼ်ႉ ႁူပ်ႉ ဢုပ်ႇၵၼ်ၼွၵ်ႈလႅၵ်ႈ(ဢမ်ႇပဵၼ်တၢင်းၵၢၼ်) သေ ၼင်ႇႁိုဝ် တေႁႃတၢင်းဢွၵ်ႇ လွင်ႈၶွင်ႉၶမ်ၵၼ်လႄႈ လွင်ႈတေသိုပ်ႇ ယၢင်ႈပႆၵႂႃႇၸွမ်း ၶၵ်ႉ ၵၢၼ်လွင်ႈငမ်းယဵၼ် တေလႆႈႁဵတ်းႁိုဝ်ၶိုင်သၢင်ႈႁၢင်ႈပွင်ၵႂႃႇ ၸဵမ်ၸိူဝ်းၼႆႉ။
မိူဝ်ႈဝၼ်းတီႈ 16/11/2018 သမ်ႉ RCSS တင်း PC ႁူပ်ႉဢုပ်ႇၵၼ်။ ဝၼ်းတီႈ 17/11/2018 KNU တင်း PC ႁူပ်ႉၵၼ် သေ ဝၼ်းတီႈ 18 သမ်ႉ ႁူပ်ႉဢုပ်ႇၵၼ်တင်း KNPP လႄႈ KIO ၸိူဝ်းၼႆႉ။
တၢင်းၾၢႆႇၶွမ်ႊမသျိၼ်ႊလွင်ႈငမ်းယဵၼ်မၢၼ်ႈ PC ဢၼ်ၵႂႃႇႁူပ်ႉထူပ်းသမ်ႉ ပဵၼ်ဢူးၶိၼ်ႇၸေႃႇဢူး၊ ဢူးသေႃႇထေး၊ ဢူး ဢွင်ႇၸူဝ်း၊ ဢူးလႃႉမွင်ႇသူၺ်ႇလႄႈ ဢူးၵျေႃႇလိၼ်းဢူး ၸဵမ်ၸိူဝ်းၼႆႉ။
