ၶွမ်းမသျိၼ်ႊငမ်းယဵၼ် မိူင်းႁူမ်ႈတုမ် တေၵႂႃႇႁူပ်ႉ ၸုမ်းဢူၺ်းလီပွတ်းႁွင်ႇ 3 ၸုမ်း တီႈဝဵင်းၶုၼ်းမိၼ် မိူင်းၶႄႇ ၼႂ်းဝၼ်းမိူဝ်ႈၽုၵ်ႈၼႆ။

ဝၼ်းတီႈ 31/10/2018 ၸုမ်းဢူၺ်းလီပွတ်းႁွင်ႇ 3 ၸုမ်း AA (ရၶႅင်ႇ), TNLA (တဢၢင်း) လႄႈ NMDAA (ၶႄႇၵဝ်ႈ ၵၢင်ႉ) တေႁူပ်ႉၵၼ် တင်း ၶွမ်ႊမသျိၼ်ႊငမ်းယဵၼ်မိူင်းႁူမ်ႈတုမ် တီႈဝဵင်းၶုၼ်းမိၼ် ၸႄႈမိူင်းယုၼ်ၼၢၼ် ၸိုင်ႈမိူင်း ၶႄႇ။ ႁူပ်ႉထူပ်းဢုပ်ႇဢူဝ်းငူပ်ႉငီႉၵၼ် တွၼ်ႈတႃႇ တင်း 3 ၸုမ်း ပေႃးတေလႆႈၶဝ်ႈပႃးသဵၼ်ႈ တၢင်းၶၵ်ႉၵၢၼ်လွင်ႈ ငမ်းယဵၼ် မိူင်းႁူမ်ႈတုမ် ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈၸတ်းၵၢၼ်လုမ်း PI ၽူႈၶဝ်ႈပႃးၸွႆႈထႅမ်ၶၵ်ႉၵၢၼ်လွင်ႈငမ်းယဵၼ် လၢတ်ႈတီႈၽူႈတွႆႇႁွၵ်ႈ ဝႃႈ “ မိူဝ်ႈၼႆႉ တင်းၾၢႆႇၶွမ်ႊမတီႊလွင်ႈငမ်းယဵၼ် မိူင်းႁူမ်ႈတုမ် ဢၼ်တေၵႂႃႇႁူပ်ႉတင်း ၸုမ်းဢူၺ်းလီပွတ်းႁွင်ႇ 3 ၸုမ်းၼႆႉ ႁၼ်ထိုင်ဝႃႈ ၾၢႆႇသိုၵ်းတပ်ႉမတေႃႇဢမ်ႇပေႃးသႂ်ႇၸႂ် ၸွမ်းၵႃႈႁိုဝ်လႄႈ လႅပ်ႈၶႂ်ႈယၢပ်ႇဝႆႉၼင်ႇၵဝ်ႇ” ဝႃႈၼႆ။

ၵၢၼ်တေၵႂႃႇႁူပ်ႉ ၸုမ်းဢူၺ်းလီပွတ်းႁွင်ႇ 3 ၸုမ်းၼၼ်ႉ ၾၢႆႇလူင်ပွင်ၸိုင်ႈ ၶွမ်ႊမသျိၼ်ႊၾၢႆႇငမ်းယဵၼ် မီးဢူး ၶိၼ်ႇၸေႃႇဢူး တင်း ဢူးတဵင်းၸေႃႇ ဢၼ်တေၵႂႃႇပဵၼ်ၽူႈႁူႉၽူႈႁၼ်ၸွမ်း တေမီး ၸုမ်းဝႃႉ UWSA တင်း ၸုမ်းၶၢင် KIA ဝႃႈၼႆ။

ၸုမ်းဢူၺ်းလီပွတ်းႁွင်ႇ ၼႂ်းၶွမ်ႊမတီႊဢုပ်ႇဢူဝ်းလွင်းငမ်းယဵၼ် FPNCC ဢၼ်ၸုမ်းဝႃႉ UWSA ဢွၼ်ႁူဝ်ၼႆႉ လုၵ်ႈၸုမ်းမီး 7 ၸုမ်း။ ၼႂ်း 7 ၸုမ်းၼၼ်ႉ ၸုမ်းၶၢင် KIA ၺႃးလေႃႇတိုၵ်းႁၢဝ်ႈႁႅင်း။ 3 ၸုမ်း လွႆ TNLA ၊ ၵဝ်ႈၵၢင်ႉ MNDAA၊ ရၶႅင်ႇ AA ၶဝ် 3 ၸုမ်းၼႆႉ မၵ်းမၢႆပဵၼ်ၸုမ်းသုၵ်ႉယုင်ႈဢူၼ်ၵဝ်း၊ ဝႃႉ UWSA တင်း မိူင်းလႃး NDAA တင်ႈတႄႇ ၵိုတ်းသိုၵ်းဢဝ်ငမ်းယဵၼ် 1989 ဢမ်ႇပဵၼ်ပၢင်တိုၵ်းမႃး တင်းသိုၵ်းလူင်ပွင်ၸိုင်ႈမၢၼ်ႈသေၵမ်း၊ ၸုမ်းတႆး SSPP တင်း သိုၵ်းလူင်ပွင်ၸိုင်ႈမၢၼ်ႈၵႆႉၵႆႉပဵၼ်ပၢင်တိုၵ်းၵၼ် ဝႃႈၼႆ။