RCSS တင်း PC ႁူပ်ႉဢုပ်ႇဢူဝ်းၵၼ် တီႈၵဵင်းမႆႇ ၸိုင်ႈထႆး၊ တေဢုပ်ႇၵၼ် ၵဵဝ်ႇၵပ်း လွင်ႈဢၼ်ၶွင်ႉၶမ်ၵၼ်ဝႆႉၸိူဝ်း ၼၼ်ႉ ၼင်ႇႁိုဝ် တင်းသွင်ၾၢႆႇပေႃးတေႁႃလၢႆးဢၼ်တေႁႃၵႂၢမ်းတွပ်ႇလႆႈ ဝႃႈၼႆ။

မိူဝ်ႈၼႆႉ ဝၼ်းတီႈ 16/11/2018 ယၢမ်းႁူဝ်ၶမ်ႈ 5 မူင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA တင်း ၶွမ်ႊမသျိၼ်ႊလွင်ႈငမ်းယဵၼ် (Peace Commission) တေႁူပ်ႉဢုပ်ႇၵၼ်တီႈႁူင်းႁႅမ်ႊၶမ်းမွၼ်ႉလၢၼ်ႉ ၼႃး ၸႄႈဝဵင်းသၼ်ၵမ်းၽႅင်း ၸႄႈတွၼ်ႈၵဵင်းမႆႇ ၸိုင်ႈထႆး ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းႁွင်ႈၵၢၼ် PI လၢတ်ႈတီႈၽူႈတွႆႇႁွၵ်ႈဝႃႈ “ တင်း 2 ၾၢႆႇ လူင်ပွင်ၸိုင်ႈ တင်း RCSS ၼႆႉ ၵွပ်ႈပိူဝ်ႈဝႃႈ မီးလွင်ႈၶွင်ႉၶမ်ၵၼ်မႃးႁိုင်လႄႈ မိူဝ်ႈဝၼ်းတီႈ 15-16 လိူၼ်ဢွၵ်ႊထူဝ်ႊၿိူဝ်ႊ ၼၼ်ႉၵေႃႈ မႃးၺႃးၵၼ်သေ တေ ဢၢင်ႈၵႄႈ။ ၵူၺ်းၵႃႈ ဢမ်ႇၸၢင်ႈၵႄႈသေဢမ်ႇၵႃး သမ်ႉၶွင်ႉၶမ်ထႅင်ႈ ၵွပ်ႈပိူဝ်ႈၸိူင်ႉၼၼ်လႄႈ တေႁႃလၢႆးလႂ် သေၵႄႈ ၼႆတၢင်းၾၢႆႇ PC ၶဝ်မႃးဢုပ်ႇၵုမ်ႁႃလၢႆးမၼ်း။ လိူဝ်ၼၼ်ႉၵေႃႈ လႅပ်ႈတေသိုပ်ႇဢုပ်ႇပႃးထႅင်ႈ လွင်ႈ JMC ယူႇ” ဝႃႈၼႆ။

တူဝ်တႅၼ်းဢၼ်မႃးႁူပ်ႉၵၼ် ၵမ်းၼႆႉ တၢင်းၾၢႆႇ PC ပဵၼ် ဢူးၶိၼ်ႇသေႃႇဢူး၊ ဢူးသေႃႇ ထေး၊ ဢူးဢွင်ႇသူဝ်း၊ ဢူးလႃႉမွင်ႇသူၺ်ႇလႄႈ ဢူးၵျေႃႇလိၼ်းဢူး (ၽူႈၵမ်ႉၸွႆႈ)။ တၢင်းၾၢႆႇ RCSS တႄႉ ၸွမ်သိုၵ်းလူင် ယွတ်ႈ သိုၵ်း ဢွၼ်ႁူဝ်မႃး ဝႃႈၼႆ။

သင်ဝႃႈ ႁူပ်ႉၵၼ်တင်း RCSS ယဝ်ႉ မိူဝ်ႈၼႆႉၸိုင် PC ၼႆႉ ဝၼ်းတီႈ 17/11/2018 တေႁူပ်ႉ တင်း KNU၊ ဝၼ်းတီႈ 18/11/2018 သမ်ႉ တေႁူပ်ႉၵၼ်တင်း KIO လႄႈ KNPP ဝႃႈၼႆ။