သိုၵ်းမၢၼ်ႈ သွၵ်ႈတဝ် လေႃႇယိုဝ်း သိုၵ်းတႆး SSPP ၼႂ်းၸႄႈဝဵင်းသီႇပေႃႉ 2 ၾၢႆႇလႆႈပဵၼ်ပၢင်တိုၵ်းၵၼ် ႁိမ်း 1 ၸူဝ်ႈ မူင်း ၵူၼ်းမိူင်းဢမ်ႇယွမ်း 500 ၵေႃႉ လႆႈဢွၼ်ၵၼ်ပၢႆႈ။
ဝၼ်းတီႈ 13/11/2018 ယၢမ်းၵၢင်ဝၼ်း မွၵ်ႈ 12 မူင်း သိုၵ်းလူင်ပွင်ၸိုင်ႈမၢၼ်ႈ ၶမယ 501 ပႃႈတႂ်ႈၸၵၶ 1 ၵျွၵ်ႉမႄး သွၵ်ႈတဝ် ၸွမ်းဝၢၼ်ႈၸွမ်းထိူၼ်ႇ ပိုတ်းယိုဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA 2 ၾၢႆႇ လႆႈ ပဵၼ်ပၢင်တိုၵ်းၵၼ် ၼႂ်းၵႄႈ ဝၢၼ်ႈၼႃးလေႃႉ တင်း ၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်းဝၢၼ်ႈ ၼႂ်းဢိူင်ႇၸေႈၶၢၼ် 500 ပၢႆ လႆႈဢွၼ်ၵၼ်ပၢႆႈၽေးသိုၵ်း ဝႃႈၼႆ။
ၵူၼ်းၼုမ်ႇၸွႆႈထႅမ် ၵူၼ်းပၢႆႈၽေးသိုၵ်း တီႈဝၢၼ်ႈၼႃးဢုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းၼႆႉ ပဵၼ် မိူဝ်ႈယၢမ်း 12 မူင်းၵၢင်ဝၼ်း၊ ႁိုင် 45 မိၼိတ်ႉ(ၼႃးထီး)။ ၵူၼ်းဝၢၼ်ႈလႆႈငိၼ်းသဵင်ၵွင်ႈလႄႈ လႆႈဢွၼ်ၵၼ်ပၢႆႈ။ ၵမ်ႈၽွင်ႈပၢႆႈၵႂႃႇတင်းၼမ်ႉလၼ်ႈ၊ ၵမ်ႈၽွင်ႈပၢႆႈၵႂႃႇတၢင်းမိူင်းၶိူဝ်း ဢၼ်ပၢႆႈမႃးတီႈ ဝတ်ႉၼႃးဢုင် ႁဝ်းၶႃႈတႄႉ ၸဵမ် ၸၢႆး/ ယိင်း မီး 262 ၵေႃႉ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃးဢုင်ၼႆႉ ပဵၼ်ၵူၼ်းဝၢၼ်ႈၼႃး တင်း ဝၢၼ်ႈၼႃးလေႃႉ 2 ဝၢၼ်ႈ။ ၵူၼ်းဝၢၼ်ႈၼႃး ၽူႈၸၢႆး 73 ၵေႃႉ၊ ယိင်း 139 ၵေႃႉ။ ဝၢၼ်ႈၼႃးလေႃႉသမ်ႉ ၵူၼ်းၸၢႆး 11 ၵေႃႉ၊ ယိင်း 46 ၵေႃႉ ႁူမ်ႈၵၼ် တင်းမူတ်း 262 ၵေႃႉ ဝႃႈၼႆ။
သိုပ်ႇလၢတ်ႈဝႃႈ “တေႃႈလဵဝ်တႄႉ သဵင်ၵွင်ႈယဵၼ်ၵႂႃႇယဝ်ႉ လႆႈငိၼ်းဝႃႈ တင်းသွင်ၾၢႆႇထွႆထွၼ် ၼင်ႇၵၼ်။ ၵူၺ်း ၵႃႈ ၵူၼ်းပၢႆႈၽေးသိုၵ်းတီႈဝတ်ႉၼႃႈဢုင် ပႆႇပွၵ်ႈ၊ ပႂ်ႉတူၺ်းငဝ်းလၢႆးမၼ်းထႅင်ႈဢိတ်းၼိုင်ႈၵွၼ်ႇ။ လိူဝ် ၼၼ်ႉ ၽူႈယႂ်ႇ ၵူၼ်းလူင် ၼႂ်းဢိူင်ႇၼႂ်းဝၢၼ်ႈ ႁဝ်းၶႃႈၵေႃႈ ႁႂ်ႈၵူၼ်းဝၢၼ်ႈၵႂႃႇတူၺ်းယူႇ ငဝ်းလၢႆးၼႂ်းပိုၼ်ႉတီႈ မီးၸိူင်ႉႁိုဝ်၊ ပဵၼ်ၸိူင်ႉ ႁိုဝ် သင်ဝႃႈ ၶႅမ်ႉလႅပ်ႈယူႇၼႆၸိုင် ၵူၼ်းပၢႆႈၽေးႁဝ်း တေဢွၼ်ၵၼ်ပွၵ်ႈ” ဝႃႈၼႆ။
ဢိူင်ႇၸေႈၶၢၼ်ၼႆႉ တင်းမူတ်း မီး 7 ဝၢၼ်ႈ။ ဝၢၼ်ႈမႂ်ႇ၊ ဝၢၼ်ႈၵိုတ်ႈ၊ ဝၢၼ်ႈၸေႈၶၢၼ်၊ ဝၢၼ်ႈၼႃး၊ ဝၢၼ်ႈၼႃးလေႃႉ၊ ဝၢၼ်ႈၼႃးလိၼ်းလႄႈ ဝၢၼ်ႈၼႃးဢုင် ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ