ၸုမ်းယိပ်းၵွင်ႈၵၢင်ႇ ၼႂ်းမိူင်းႁူမ်ႈတုမ် မီးလၢႆၸုမ်း

ၸုမ်းယိပ်းၵွင်ႈၵၢင်ႇ ၼႂ်းမိူင်းႁူမ်ႈတုမ်မၢၼ်ႈ မီး 23 ၸုမ်း – သွၼ်ႇပႃးသိုၵ်းလူင်ပွင်ၸိုင်ႈမၢၼ်ႈ ၼေႇပျီႇတေႃႇ တင်း ၸုမ်းသိုၵ်းၵေႃႇၵၢၼ်ႁၢႆႉ ဢၼ်ၽုတ်းဢွၵ်ႇၵေႃႇၵၢၼ်ႁၢႆႉမႃး တၢင်းမိူင်းရၶႅင်ႇ ၼႂ်းပီၼႆႉ။

ၸုမ်းယိပ်းၵွင်ႈၵၢင်ႇၸိူဝ်းပဵၼ် ၸၢဝ်းၶိူဝ်းၵိုၵ်းပိုၼ်ႉမိူင်းတႄႉ တႄႇယိပ်းၵွင်ႈ လူၺ်ႈဝၢၼ်ႈမိူင်းဢမ်ႇၵေႃႇတင်ႈၸွမ်း လိၵ်ႈၵိၼ်ၵႅၼ်ႇပၢင်လူင် လႄႈယိူင်းဢၢၼ်းမိူၼ်ၵၼ် လၢႆးႁဵတ်းလၢႆးသၢင်ႈ လွင်ႈၼပ်ႉသွၼ်ႇယုမ်ႇယမ် ဢမ်ႇပေႃးမိူၼ် ၵၼ်၊ လိူဝ်သေ သိုၵ်းလူင်ပွင်ၸိုင်ႈမၢၼ်ႈ ၸုမ်းလႂ်ၵေႃႈ ဢမ်ႇႁူမ်ႈၵၼ်ၵေႃႇတင်ႈလႆႈတပ်ႉသိုၵ်းၵႅၼ်ႇၶႅင်ၼႅၼ်ႈၼႃ၊ ဝၢၼ်ႈမိူင်းဢမ်ႇၵတ်းယဵၼ် ပဵၼ်ပၢင်တိုၵ်းၵၼ်မႃး ၶၢဝ်းတၢင်း 70 ပီ။

ဢၼ်တႅၵ်ႇဝႆႉယူႇယၢမ်းလဵဝ် တေလႆႈဝႃႈ – မီးယူႇ 3-4 ၾၢႆႇ။ ၸုမ်းႁပ်ႉလွၵ်းပိူင် NCA ၵိုတ်းတိုၵ်းတူဝ်ႈမိူင်း 8 ၸုမ်း။ ၸုမ်းဢမ်ႇႁပ်ႉလွၵ်းပိူင် NCA ၵေႃႈမီး 8 ၸုမ်း။ ၸုမ်းဢၼ်ငႃငိူမ်ႉသေ သဵတ်ႈၵႃႈသဵတ်ႈႁူဝ် ဢုပ်ႇဢူဝ်းမႃး တင်ႈတႄႇ ပီ 2011 တေႃႇယၢမ်းလဵဝ်ပဵၼ် ၸုမ်း UNFC ဢၼ်ၵိုတ်းလုၵ်ႈၸုမ်း 4 ၸုမ်း။

ၼွၵ်ႈၼၼ်ႉ ဢၼ်ပႆႇႁူမ်ႈၾၢႆႇလႂ် မီးၸုမ်းသိုၵ်းၼႃႇၵ NSCN-K၊ ဢၼ်ၽုတ်းဢွၵ်ႇမႃးၼႂ်းပီသွင်ပီၶိုၼ်းသမ်ႉ မီးထႅင်ႈ တပ်ႉသိုၵ်းၸိူဝ်ႉၸၢတ်ႈတႆးလႅင် TNA။

ဢိင်ၼိူဝ်ပၼ်ႁႃၼႂ်းမိူင်းရၶႅင်ႇသေ ၸုမ်းၵူၼ်းၶိူဝ်းပင်ႇၵလီဢၼ်ယူႇ သဝ်းၼႂ်း မိူင်းရၶႅင်ႇသမ်ႉ ၵေႃႇတင်ႈမႃးၸုမ်းယိပ်းၵွင်ႈသေ တင်ႈတပ်ႉ ARSA ဢၼ်လူင်ပွင်ၸိုင်ႈမၵ်းမၢႆပိုၼ်ၽၢဝ်ႇဝႃႈ ပဵၼ် ၸုမ်းၵေႃႇၵၢၼ်ႁၢႆႉ။

ၵွပ်ႈၼၼ် ပေႃးပႃးသိုၵ်းလူင်ပွင်ၸိုင်ႈမၢၼ်ႈ ၼေႇပျီႇတေႃႇ တင်းမူတ်း ၼႂ်းမိူင်းႁူမ်ႈတုမ်မိူင်းမၢၼ်ႈၼႆႉ မီးယူႇၸုမ်း ယိပ်းၵွင်ႈ 23 ၸုမ်း။ လိူဝ်ၼၼ်ႉ ယင်းမီးၸုမ်းဢၼ်ယူႇတႂ်ႈသိုၵ်းလူင်ပွင်ၸိုင်ႈမၢၼ်ႈ မိူၼ်ၼင်ႇ တပ်ႉပႂ်ႉလႅၼ်လိၼ် တင်း တပ်ႉပျီႇတုၸိတ်ႉ ဢၼ်မီးၵႂၢမ်းမၢႆဝႃႈ သိုၵ်းၵူၼ်းမိူင်း ၸိူဝ်းၼၼ်ႉ တင်းၼမ်တင်းလၢႆထႅင်ႈလူးၵွၼ်ႇ။

M-Army – သိုၵ်းလူင်ပွင်ၸိုင်ႈ၊ တႄႇယိုတ်းဢႃႇၼႃႇဝၢၼ်ႈမိူင်း ၸဵမ်ပီ 1962 သေ ၵုမ်းၵႅဝ်ဝၢၼ်ႈမိူင်းမႃးတေႃႇယၢမ်းလဵဝ် ဝၢႆးပၢင်လုၵ်ႉႁိုၼ်ႇၼႄၵၢင်ၸႂ်ယဝ်ႉ ၵေႃႇတင်ႈဝဵင်းငဝ်ႈငုၼ်းၼေႇပျီႇတေႃႇ၊ ၶၢႆႉလုမ်းငဝ်ႈမိူင်းၵႂႃႇပၵ်းတီႈၼၼ်ႈ ၽွင်းပီ ၶရိတ်ႉ 2000 တဵမ်။ ဢၼ်ဢဵၼ်ႁႅင်းယႂ်ႇလိူဝ်ပိူၼ်ႈသေ ၶဵၼ်ႇတႅမ်ႈပိူင်ငဝ်ႈပိုင်ႈမိူင်း 2008 တိုတ်ႉၼွင်ႇဢႃႇၼႃႇဝၢၼ်ႈမိူင်းဝႆႉ တေႃႇယၢမ်းလဵဝ်။

ၶေႃႈမုလ်း ၽူႈတွႆႇႁွၵ်ႈ 001 November 2017