လူင်ပွင်ၸိုင်ႈမိူင်းႁူမ်ႈတုမ်မၢၼ်ႈ ပိုၼ်ၽၢဝ်ႇပိၵ်ႉလၢၼ်ႇၵၢၼ်ၵႃႉၶၢႆလႅၼ်လိၼ်ၵူၼ်းၵႃႉလႄႈ ၵူၼ်းယူႇသဝ်းထုင်ႉၼၼ်ႉထူပ်းတၢင်းယၢပ်ႇ။
ဝၼ်းတီႈ 09/11/2018 သိုဝ်ႇၶၢဝ်ႇၵဵင်းမႆႇပိုၼ်ၽၢဝ်ႇဝႃႈ – “ လူင်ပွင်ၸိုင်ႈမိူင်းႁူမ်ႈတုမ်မၢၼ်ႈပိုၼ်ၽၢဝ်ႇ သင်ႇႁႄႉႁၢမ်ႈ ၵုၼ်ႇသိၼ်ၵႃႉ ဢၼ်လုၵ်ႈတၢင်းမိူင်းထႆး ၶဝ်ႈၼႂ်းမိူင်းႁူမ်ႈတုမ်ဝၢႆးလင်သေ ၵူတ်ႇထတ်းၺႃးသၢၼ်ဢၼ်လေႃးတႃႇႁဵတ်းဢွၵ်ႇယႃႈမဝ်းၵမ် တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ဝႃႈပဵၼ်ဢၼ်ဢဝ်လုၵ်ႉမိူင်းထႆး တၢင်းလၢၼ်ႇမႄႈႁွင်ႈသွၼ် (ထႆး) – မႄႈၸႄႉ ဝႃႈၼႆ။
တၢင်းၾၢႆႇလူင်ပွင်ၸိုင်ႈမၢၼ်ႈပိုၼ်ၽၢဝ်ႇဝႃႈ တင်ႈဢဝ်ဝၼ်းတီႈ 06/11/2018 ၼႆႉၵႂႃႇလႆႈပိၵ်ႉလၢၼ်ႇၵၢၼ်ၵႃႉၶၢႆ ၶူဝ်းၵုၼ်ႇ မႄႈၸႄႉ(ၾၢႆႇၸႄႈမိူင်းယၢင်းလႅင်) – ဢိူင်ႇၶုၼ်ယူမ်း ၸႄႈတွၼ်ႈမႄႈႁွင်ႈသွၼ် တေၶိုၼ်းပိုတ်ႇၶိုၼ်းမိူဝ်ႈလႂ် ဢၼ်ဝႃႈ ၼၼ်ႉပႆႁူႉ မိူဝ်ႈလဵဝ်ပၼ်ၵႃးဢွၼ်ႇတေႃႉသူင်ႇၶူဝ်းၵုၼ်ႇဢၼ်လမ်ႇလွင်ႈတႃႇၸႂ်ႉတိုဝ်းၵူႈဝၼ်းၼၼ်ႉၵူၺ်း ။ ၵႃးတေႃႉၵုၼ်ႇ ၵမ်းသိုဝ်ႈ၊ ၵႃး 6 လေႃႉၸိူဝ်းၼႆႉတႄႉ တိုၼ်းဢမ်ႇပၼ်တေႃႉတၢင်ႇ ၵႂႃႇမႃးၼႆယဝ်ႉ ။
ပူၼ်ႉမႃးမိူဝ်ႈၼႂ်းလိူၼ်ဢွၵ်ႊထူဝ်ႊၿိူဝ်ႊ 2018 ၼၼ်ႉ လူင်ပွင်ၸိုင်ႈမိူင်းႁူမ်ႈတုမ်မၢၼ်ႈလႄႈ ၾၢႆႇၽဵဝ်ႈမူၺ်ႉယႃႈမဝ်းၵမ် လႆႈၸတ်းႁဵတ်းပၢင်ၵုမ်တႃႇႁူမ်ႈၵၼ်ၵႄႈလိတ်ႈပၼ်ႁႃယႃႈမဝ်းၵမ် တီႈၼေႇပျီႇတေႃႇသေ ႁၼ်လီႁူမ်ႈၵၼ်ဝႃႈ တေၵိုတ်းၵၢၼ် တေႃႉၵုၼ်ႇၶဝ်ႈဢွၵ်ႇတင်းမိူင်းထႆးဝႃႈၼႆ။