ပလိၵ်ႈထႆး ၵဵင်းမႆႇ ၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်းၸၢႆးၼုမ်ႇတႆး 20 ပၢႆ သေၵုမ်းၶင်ဝႆႉ ၼႄးဝႃႈသၢင်ႈလွင်ႈဢမ်ႇ ၼိမ်သဝ်း ၽိတ်းမေႃးၵၼ်ၸဵမ်ၸိူဝ်းၼႆႉ။

ဝၼ်းတီႈ 05/11/2018 သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇဝႃႈ – ၸဝ်ႈၼႃႈတီႈပလိၵ်ႈဝဵင်းၵဵင်းမႆႇ ႁူမ်ႈၵၼ်လူင်းပိုၼ်ႉတီႈၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်း ၼုမ်ႇၸၢႆးတႆး 24 ၵေႃႉ ၸွမ်းၵၢတ်ႇ၊ ၸွမ်းတၢင်းလႄႈ ၼိူဝ်ၶူဝ်ၶၢမ်ႈၼမ်ႉပိင်းၸိူဝ်းၼႆႉလၢႆလၢႆတီႈၼႂ်းဝဵင်းၵဵင်းမႆႇ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၸဝ်ႈၼႃႈတီႈ ပလိၵ်ႈၶဝ်ၼႆႉ ၶဝ်မီးသုၼ်ႇလႆႈ တီႉၺွပ်းႁဝ်းလႆႈတႃႇသေႇယဝ်ႉ ယွၼ်ႉဝႃႈမၼ်းပဵၼ်ၼႃႈတီႈ ပုၼ်ႈၽွၼ်းၶဝ်ယဝ်ႉ၊ ၵွပ်ႈၼၼ်လႄႈ မိူဝ်ႈႁဝ်းမႃးယူႇႁႃ  ႁဵတ်းၵၢၼ်ၼႂ်းဝၢၼ်ႈမိူင်းပိူၼ်ႈၼၼ်ႉ ႁဝ်းလူဝ်ႇမေႃယူႇမေႃၵိၼ် ၊ မေႃၸွမ်းပၵ်းပိူင်ဝၢၼ်ႈမိူင်းပိူၼ်ႈ တေလၢတ်ႈ တေႁဵတ်း  သင်ၵေႃႈ ႁႂ်ႈဝူၼ်ႉထိုင်ပေႃႈမႄႈ၊ ပီႈၼွင်ႉလႄႈ ၸိူဝ်ႉၶိူဝ်းတူဝ်ၵဝ်ႇသေၵမ်း၊ ယွၼ်ႉႁဝ်းလႄႈပိူၼ်ႈလႆႈတုၵ်ႉၶ၊ ပိူၼ်ႈလႆႈယၢပ်ႇ ၸႂ်ၼၼ်ႉယႃႇပေႁဵတ်း ” ဝႃႈၼႆ။

တီႈၼႂ်းမိူင်းၸိုင်ႈထႆးၼႆႉ မီးႁႅင်းၵၢၼ်ယၢၼ်မိူင်းလၢႆၸၢဝ်းၶိူဝ်းမႃးႁႃႁဵတ်းၵၢၼ်ႁႃၵိၼ်လဵင်ႉတွင်ႉ ၼင်ႇႁိုဝ်ၵူၼ်းၶဝ်ႈမိူင်း တေႁဵတ်းၸွမ်းမၢႆမီႈလႄႈ ဢမ်ႇသၢင်ႈလွင်ႈသုၵ်ႉယုင်ႈ ဢူၼ်ၵဝ်းၼႂ်းပိုၼ်ႉတီႈၼၼ်ႉ လူင်ပွင်ၸိုင်ႈမိူင်းထႆးဢၼ်မီး ၸွမ်သိုၵ်းလူင်ပရႃႊယုတ်ႊ ၸၼ်ႊဢူဝ်ႊၶျႃႊ ပဵၼ်ၸွမ်ၽွင်းလူင်ၼႆႉ ၶဵင်ႈၶႅင်ၵူတ်ႇထတ်းယူႇတႃႇသေႇ။

ၾၢႆႇၼိုင်ႈၵေႃႈ ၵူတ်ႇထတ်းထဵတ်ႈထၢမ်လွင်ႈဝတ်းဝႂ်ႁဵတ်းၵၢၼ်၊ ၸိူဝ်းဢမ်ႇမီးဝတ်းဝႂ်တဵမ်ထူၼ်ႈ၊ ဢမ်ႇၼၼ်ႁဵတ်းၵၢၼ်ၽိတ်းတီႈၸိူဝ်းၼႆႉ ၸဝ်ႈၼႃႈတီႈထႆး တီႉၺွပ်းယဵတ်ႈၶွၵ်ႈသေ သူင်ႇမိူဝ်း လႅၼ်လိၼ် မႄႈသွတ်ႇ – မျဝၻီႇ၊ မႄႈသၢႆ – တႃႈၶီႈလဵၵ်း ၶိုၼ်းၼႂ်းပီ 2018 ၼႆႉၵူၺ်း ဢမ်ႇယွမ်း 5 မိုၼ်ႇယဝ်ႉ ဝႃႈၼႆ။