ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉဝိႁၢရ်လူင် မၢၼ်ႈသူႈ ၸႄႈဝဵင်းလႃႈသဵဝ်ႈၼၼ်ႉ တေႃႈလဵဝ် ၶိုၼ်း ဢွၼ်ၵၼ်ပွၵ်ႈႁိူၼ်းယေးၽႂ်မၼ်းမူတ်း ယွၼ်ႉငဝ်းလၢႆးၼႂ်းပိုၼ်ႉတီႈၼိမ်သဝ်းယဝ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 02/11/2018 ယၢမ်းၵၢင်ဝၼ်း ၵူၼ်းဝၢၼ်ႈပၢင်ႁုင်း၊ ဝၢၼ်ႈပဵင်း၊ ဝၢၼ်ႈ ၼႃးႁႃႈ၊ ဝၢၼ်ႈ 13 လၵ်း လႄႈ ဝၢၼ်ႈ 15 လၵ်း ၼႂ်းဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ။ ၵူၼ်းဝၢၼ်ႈမိူင်းတွင် ဢိူင်ႇၼႃးသၢႆး ၸႄႈဝဵင်းၼမ်ႉတူႈ၊ ႁူမ်ႈၵၼ် ႁူဝ်ၵူၼ်း ႁိမ်းႁဵင် ဢၼ်ပၢႆႈၽေးသိုၵ်းမႃးသွၼ်ႈဝႆႉတီႈ ဝတ်ႉဝိႁၢရ်မၢၼ်ႈသူႈ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇၼၼ်ႉ ၶိုၼ်းဢွၼ်ၵၼ်ပွၵ်ႈႁိူၼ်းယေးၽႂ်မၼ်းမူတ်းယဝ်ႉ ဝႃႈၼႆ။
ၵူၼ်းပၢႆႈၽေးသိုၵ်း ဝၢၼ်ႈပဵင်းလၢတ်ႈတီႈၽူႈတွႆႇႁွၵ်ႈဝႃႈ “ ၽူႈယႂ်ႇၵူၼ်းလူင်ၶဝ်ပွင်ႇမႃး ဝႃႈငဝ်းလၢႆးၼႂ်းပိုၼ်ႉ တီႈ ၼိမ်ယဝ်ႉၼႆသေ ႁဝ်းၶႃႈ ၶိုၼ်းဢွၼ်ၵၼ်ပွၵ်ႈၶႃႈယဝ်ႉ။ ႁဝ်းၶႃႈမႆႈၸႂ် သူၼ်ႁႆႈၼႃး ႁိူၼ်းယေးႁဝ်းၶႃႈဢေႃႈ။ တီႈ ဝတ်ႉမၢၼ်ႈသူႈတႄႉ ဢမ်ႇမီးၽႂ်ယဝ်ႉ ၶိုၼ်းဢွၼ်ၵၼ်ပွၵ်ႈမိူဝ်းမူတ်းယဝ်ႉ” ဝႃႈၼႆ။
မိူဝ်ႈဝၼ်းတီႈ 29/10/2018 သိုၵ်းဢူၺ်းလီပွတ်းႁွင်ႇ တင်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် တၢင်းပွတ်း ဢိူင်ႇ ဢီႇၼၢႆးသေ ၵူၼ်းမိူင်း 1,131 ၵေႃႉ လႆႈဢွၼ်ၵၼ်ပၢႆႈဢွၵ်ႇမႃးသွၼ်ႈဝႆႉတီႈ ဝတ်ႉမၢၼ်ႈသူႈ ၸႄႈဝဵင်းလႃႈသဵဝ်ႈ ဝႃႈၼႆ။
ၵူၺ်းၵႃႈ ပွတ်းသီႇပေႃႉသမ်ႉ ၶိုၼ်းပဵၼ်ပၢင်တိုၵ်းၵၼ်ထႅင်ႈလႄႈ ဝၼ်းတီႈ 02/11/2018 ၼႆႉၵူၼ်းၼႂ်း ဢိူင်ႇၼႃး မၢၵ်ႇၶေႃ 546 ၵေႃႉ ဢွၼ်ၵၼ်ပၢႆႈၽေးသိုၵ်းမႃးမီးတီႈၵျွင်းၼႃးမၢၵ်ႇၶေႃ ဝႃႈၼႆ။
