Friday, March 29, 2024

လုၵ်ႈဢွၼ်ႇၼႂ်းၸႄႈဝဵင်းၵေးသီး ၵဵပ်းလဵၼ်ႈမၢၵ်ႇ ဝၢႆးပၢင်တိုၵ်း တႅၵ်ႇတိူဝ်ႉတၢႆ 1 ၵေႃႉ မၢတ်ႇ 4 ၵေႃႉ

Must read

မိူဝ်ႈၽွင်းသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်း SSPP/SSA တီႈတႃႈၽႃသွင်ႇ မိူဝ်ႈပီ 2014 ၼၼ်ႉ မၢၵ်ႇ(ဢမ်ႇႁူႉသႅၼ်း) ၵိုတ်းၶမ်ဝႆႉၼႂ်းဝၢၼ်ႈ လုၵ်ႈဢွၼ်ႇႁဵၼ်း ၵႂႃႇၵဵပ်းဢဝ်မႃးလဵၼ်ႈ တႅၵ်ႇတိူဝ်ႉတၢႆ 1 ၵေႃႉ မၢတ်ႇၸဵပ်း 4 ၵေႃႉ ဝႃႈၼႆ။

Photo by – SNLD Kesi/ ၸၢႆးၼုမ်ႇလႅင်း ဢႃယု 10 ပီ ဝၢၼ်ႈငူးလိူမ် ၵေႃ့ဢၼ်လႆႈမၢတ်ႇၸဵပ်းႁၢဝ်ႈႁႅင်း သူင်ႇယူတ်းယႃတူဝ်တီႈႁူင်းယႃဢွင်ႇပၢၼ်း

ဝၼ်းတီႈ 26/10/2018 ယၢမ်းဝၢႆးဝၼ်း လုၵ်ႈဢွၼ်ႇႁဵၼ်း 5 – 6 ၵေႃႉ တီႈဝၢၼ်ႈငူးလိူမ် ၸႄႈဝဵင်းၵေးသီး ၸႄႈ တွၼ်ႈလွႆလႅမ် ၸိုင်ႈတႆးပွတ်းၸၢၼ်း ဢွၼ်ၵၼ်ၵႂႃႇၵဵပ်းမၢၵ်ႇ ဢၼ်ၾင်လိၼ်ဝႆႉမႃး လဵၼ်ႈတႅၵ်ႇတိူဝ်ႉ ၼၢင်းသႅင်ၸိင်ႇ လုၵ်ႈႁဵၼ်းၸၼ်ႉ 6 လႆႈလူႉတၢႆထင်တီႈ။ တႆးၵေႃႉမၼ်းၼၢင်း 4 ၵေႃႉ ၵေႃႈတိူဝ်ႉမၢတ်ႇ၊ ၼႂ်းၼၼ်ႉ တႃႇၵေႃႉၼိုင်ႈ လႆႈမႆႈၸႂ်လိူဝ်ႁႅင်း ဝႃႈၼႆ။

- Subscription -

ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ လူႉတၢႆၵေႃႉၼိုင်ႈဢေႃႈ ဢၼ်မၢတ်ႇၸဵပ်းၼၼ်ႉ တႄႉ ပဵၼ်လုၵ်ႈႁဵၼ်း 4 ၵေႃႉ။ ၼႂ်း 4 ၵေႃႉၼၼ်ႉ တႃႇ 3 ၵေႃႉ လႆႈသူင်ႇ ယူတ်းယႃတူဝ်တီႈ ႁူင်းယႃၵေးသီး။ ထႅင်ႈ ၵေႃႉၼိုင်ႈတႄႉ ယွၼ်ႉလႆႈ မၢတ်ႇၸဵပ်း ႁၢဝ်ႈႁႅင်းသေ လႆႈသူင်ႇယူတ်းယႃတူဝ်တီႈႁူင်းယႃ ဢွင်ႇပၢၼ်း၊ တိူဝ်ႉ ၺႃးၸၢၵ်ႇမၢၵ်ႇ တီႈတူဝ်မၼ်းၸၢႆးၾၢႆႇၶႂႃ ႁၢဝ်ႈႁႅင်း” ဝႃႈၼႆ။

Photo by – SNLD Kesi/ ၸၢႆးပႃ့ဢွင်ႇ လုၵ်ႈႁဵၼ်းၸၼ့်ငဝ်ႈ ဝၢၼ်ႈငူးလိူမ် ဢၼ်လႆႈမၢတ်ႇၸဵပ်းၶိုၼ်ႈႁူင်းယႃ ၵေးသီး

လုၵ်ႈႁဵၼ်း ၵေႃႉဢၼ်လူႉတၢႆၼၼ်ႉ တိုၵ်ႉၶိုၼ်ႈႁဵၼ်း ၸၼ်ႉ 6 ၸိုဝ်ႈၼၢင်းသႅင်ၸိင်ႇ ဢႃယု 12 ပီ၊ ပူၼ်ႉၶၢပ်ႈတူဝ် မၼ်းၼၢင်း ၼႂ်းဝၼ်းတီႈ 26 ၼၼ်ႉၵမ်းလဵဝ်။ ပေႃးထိုင်မႃး ဝၼ်းတီႈ 1 လိူၼ်ၼူဝ်ႊဝႅမ်ႊၿိူဝ်ႊ ၸင်ႇတေႁႅၼ်းသွမ်း တၢင်တူဝ်ပၼ် ၵေႃႉပဵၼ်ပီႈၼွင်ႉ ၼၢင်းသႅင်ၸိင်ႇလၢတ်ႈၼႄၼင်ႇၼႆ။

ၸၢႆးလႅင်းၼုမ်ႇ ဢႃယု 10 ပီ ၵေႃႉလႆႈမၢတ်ႇၸဵပ်းႁၢဝ်ႈႁႅင်း ဢၼ်ၵႂႃႇသူင်ႇယူတ်းယႃတူဝ်တီႈႁူင်းယႃ ဢွင်ႇပၢၼ်း ၼၼ်ႉ ၶႃမၼ်းၸၢႆးၾၢႆႇၶႂႃ လႆႈတႅပ်းပႅတ်ႈ၊ တႃၾၢႆႇၶႂႃ မွတ်ႇၵႂႃႇလႄႈႁဵတ်းႁႂ်ႈပေႃႈမႄႈပီႈၼွင်ႉတိူဝ်ႉၸႂ်လိူဝ်ႁႅင်း ဝႃႈၼႆ။

လုၵ်ႈႁဵၼ်းဢၼ်လႆႈတိူဝ်ႉမၢတ်ႇၸဵပ်း 3 ၵေႃႉ ဢၼ်ယူတ်းယႃတူဝ်တီႈႁူင်းယႃၵေးသီးၼၼ်ႉ ၼၢင်းဢွမ်သႅၼ်သႂ် ဢႃယု 10 ပီ လုၵ်ႈႁဵၼ်းၸၼ်ႉ 4 ႁူင်းႁဵၼ်းၸၼ်ႉသုင် ၵေးသီး။ ၼၢင်းၽွင်းၺူဝ်ႇ ဢႃယု 7 ပီ လုၵ်ႈႁဵၼ်းၸၼ်ႉ 1 ႁူင်းႁဵၼ်းၸၼ်ႉငဝ်ႈ ဝၢၼ်ႈငူးလိူမ်လႄႈ ၸၢႆးပႃႉမွင်ႇ ဢႃယု 8 ပီ လုၵ်ႈႁဵၼ်းၸၼ်ႉငဝ်ႈ ပွၵ်ႈယူႇၶိုၼ်းတီႈဝၢၼ်ႈ ၽွင်းပိၵ်ႉႁဵၼ်းၶၢဝ်းဢွၵ်ႇဝႃႇ ဝႃႈၼႆ။

ၸၢႆးၸၢမ်ႇမိူင်း ၽူႈတႅၼ်းသၽႃးၸႄႈမိူင်း ၸႄႈဝဵင်းၵေးသီး လၢတ်ႈဝႃႈ “ ဢွင်ႈတီႈမၢၵ်ႇတႅၵ်ႇၼၼ်ႉ မၼ်းပဵၼ်တီႈ တႃႈၽႃသွင်ႇ ဝၢၼ်ႈငူးလိူမ်။ မိူဝ်ႈပီ 2014 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းလေႃႇတိုၵ်း SSPP ။ တီႈၼၼ်ႈ ၼၼ်ႉ မၼ်းပဵၼ်တီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပၵ်းဝႆႉ။ ဝၢႆးပၢင်တိုၵ်းယဝ်ႉၵႂႃႇၼၼ်ႉ ယူႇတီႈတပ်ႉသိုၵ်း လူင်ပွင်ၸိုင်ႈမၢၼ်ႈ မီးပုၼ်ႈၽွၼ်းထတ်းထွင်ပၼ်ပိုၼ်ႉႁူႉလွင်ႈမၢၵ်ႇမႅင်း” ဝႃႈၼႆ။

ယွၼ်ႉပၢင်တိုၵ်းၼႂ်းမိူင်းတႆးသေ မၢၵ်ႇၾင်လိၼ်၊ မၢၵ်ႇလူင် ဢၼ်ၵိုတ်းဝႆႉ ၸွမ်းသဵၼ်ႈတႃႈသၢႆ တၢင်း၊ ၸွမ်းဝၢၼ်ႈ ၸွမ်း သူၼ်ၸိူဝ်းပႆႇတႅၵ်ႇၵေႃႈတိုၵ်ႉမီးတၢင်းၼမ်။ တၢင်းပွတ်းဝဵင်းၼမ်ႉသၼ်ႇၵေႃႈ ၼႂ်းလိူၼ်ၼႆႉၵူၺ်း ၵူၼ်းမိူင်း ယဵပ်ႇၺႃးမၢၵ်ႇတႅၵ်ႇတိူဝ်ႉ 4 ပွၵ်ႈယဝ်ႉ ဝႃႈၼႆ။

မၢၵ်ႇၾင်လိၼ်ၼႆႉ ၸၢတ်ႈၸိုင်ႈလုမ်ႈၾႃႉ ႁၢမ်ႈဝႆႉဢမ်ႇပၼ်ၸႂ်ႉ။ ၵူၺ်းၵႃႈ တေႃႇထိုင်ယၢမ်းလဵဝ် ၼႂ်းမိူင်းမၢၼ်ႈ တိုၵ်ႉၸႂ်ႉ၊ ၵူၼ်းမိူင်းတႆး လႆႈယဵပ်ႇ ၺႃးၼမ်တီႈသုတ်း။ မိူဝ်ႈပီ 2017 လိူၼ်ၻီႊသႅမ်ႊၿိူဝ်ႊၼၼ်ႉ ယူႇတီႈ ICBL လႆႈတႅမ်ႈလိၵ်ႈတၢင်ႇထိုင် လွင်ႈႁႄႉ ႁၢမ်ႈၸႂ်ႉတိုဝ်းမၢၵ်ႇၾင်လိၼ်မႃးယဝ်ႉ ပွၵ်ႈၼိုင်ႈ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း