ၾၢႆႇမၢႆမီႈမိူင်းထႆးၾၢင်ႉ ၵူၼ်းၸိူဝ်းဢၼ်မီးတၢင်းယၢမ်ႈတႅမ်ႈလႃႇတႅမ်ႈဝႃႈႁင်းၵၼ်ၼိူဝ် Facebook ၼၼ်ႉပေႃးၵေႃႉဢၼ် ၺႃးလႃႇၼၼ်ႉဢမ်ႇႁၢၼ်ႉၸႂ်သေ ၵႂႃႇတၢင်ႇယိုၼ်ႈဢဝ်လိူင်ႈၼႆ ၸၢင်ႈၺႃးတၢမ်ႇ မႂ်ငိုၼ်းၼမ်ထိုင်သၢမ်သႅၼ်ၿၢတ်ႇၼႆယဝ်ႉ။
ဝၼ်းတီႈ 17/10/2018 ၸဝ်ႈၼႃႈတီႈၾၢႆႇမၢႆမီႈထႆး မွၵ်ႇလၢတ်ႈၾၢင်ႉတိူၼ်ထိုင်ၵူၼ်းဝၢၼ်ႈၵူၼ်းမိူင်းဝႃႈ ႁႂ်ႈဝႆႉၾၢင်ႉသတိ ၵၢၼ်တႅမ်ႈလႃႇ တႅမ်ႈဝႃႈႁင်းပိူၼ်ႈၼိူဝ် Facebook ယွၼ်ႉဝႃႈပေႃးၵူၼ်းဢၼ်ထုၵ်ႇၺႃးဝႃႈၼၼ်ႉ ဢမ်ႇႁၢၼ်ႉၸႂ်သေၵႂႃႇတၢင်ႇလုမ်းတြႃးၼႆ ၸၢင်ႈၺႃးတူတ်ႈတၢမ်ႇ မႂ်ငိုၼ်းၼမ်သုတ်းထိုင်သၢမ်သႅၼ်ၿၢတ်ႇၼႆယဝ်ႉ။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ပၵ်းပိူင်ၼႆႉပဵၼ်ဢၼ်တႄႉမၼ်းဢေႃႈ မၼ်းမီးမႃးႁိုင်ယဝ်ႉ ၵူၺ်းၵႃႈပိူၼ်ႈဢမ်ႇပေႃးသႂ်ႇၸႂ် ၊ ၵမ်ႈၼမ်တႄႉပိူၼ်ႈၵေႃႈပၵ်းတႃပႂ်ႉတူၺ်းမႃးယဝ်ႉ။ ၵမ်ၼမ်တႄႉတေပဵၼ်ၽူႈယႂ်ႇၵူၼ်းလူင် ၽူႈၼမ်းဝၢၼ်ႈမိူင်းၶဝ်ၸိူဝ်းၼႆႉဢေႃႈတေလႆႈဝႆႉသတိ ၊ ၵူၺ်းၵႃႈၸိူင်ႉႁိုဝ်ၵေႃႈလီ ဢၼ်ႁဝ်းၶႃႈၸႂ်ႉၾဵတ်ႉပုၵ်ၼႆႉႁႂ်ႈမီးသတိသေၸႂ်ႉ ယႃႇၸႂ်ႉပဵၼ်လွင်ႈသေႃႇသူၼ်းႁႂ်ႈမီးလွင်ႈတႅၵ်ႇယႅၵ်ႈၽိတ်းမေႃးၵၼ် ” ဝႃႈၼႆ။
ၸိူင်ႉၼၼ်ၼင်ႇၵဝ်ႇ ၽူႈၼမ်းၼႂ်းၵဝ်ႇ ၸုမ်းၸၢတ်ႈၸိုင်ႈလုမ်ႈၾႃႉ UN ၵေႃႈတူၵ်ႇတၵ်ႉဝႃႈ ၽူႈမီးပုၼ်ႈၽွၼ်းထုၵ်ႇလီ ၽွတ်ႈၸုမ်းသေဝႆႉၼၵ်းထတ်းထွင် Facebook တႃႇၵႄႈလိတ်ႈ ပၼ်ႁႃ ၸိူဝ်းၸႂ်ႉ Facebook သေလွၵ်ႇငိုတ်ႈ ၊ ၽိတ်းမေႃးၵၼ် ႁၢဝ်ႈႁႅင်းမႃးၵူႈဝၼ်း၊ ပႃးၵူၼ်းၸႂ်ႉ Facebook – ၼႂ်းမိူင်းႁူမ်ႈတုမ်မၢၼ်ႈ- ဝႃႈၼႆ။
