လုၵ်ႈလၢင်းလၢၼ်လိၼ် တေႁူမ်ႈၵၼ်ၸတ်းပၢင်ပွႆးဝၼ်းၵိူတ်ႇ ၸဝ်ႈၼၢင်းမူဝ်ၶမ်း (ၼၢင်းၾႃႉ မိူင်းသႅၼ်ဝီ) ဢႃယုၶွပ်ႈတဵမ် 100 ပီ တီႈဝဵင်းလႃႈသဵဝ်ႈ။ ၵူၼ်းမိူင်းသႅၼ်ဝီ ႁၢင်ႈႁႅၼ်းသူၼ်းတုမ်ၵၼ်တေၵႂႃႇၶဝ်ႈႁူမ်ႈ။
ပၢင်ပွႆးဝၼ်းၵိူတ်ႇၼၢင်းၾႃႉသႅၼ်ဝီ ၸဝ်ႈၼၢင်းမူဝ်ၶမ်း ဢႃယုၶွပ်ႈတဵမ် 100 ပီတေၸတ်းၼႂ်းဝၼ်းတီႈ 21/10/2018 တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ပေႃးထိုင်မႃးဝၼ်းတီႈ 21/10/2018 ၵူၼ်းမိူင်းသႅၼ်ဝီတေႁူမ်ႈၵၼ် ၵႂႃႇၶဝ်ႈႁူမ်ႈပၢင်ပွႆးဝၼ်းၵိူတ်ႇ ၼၢင်းၾႃႉသႅၼ်ဝီ ၸဝ်ႈၼၢင်းမူဝ်ၶမ်း ၼႂ်းတိုဝ်ႉတၢင်းဢႃယုၶွပ်ႈတဵမ် 100 ပီ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
လုင်းၸၢႆးၵႅၼ်ႇဝုၼ်း ၵူၼ်းမိူင်းသႅၼ်ဝီ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ – “ ပေႃးထိုင်မႃးဝၼ်းတီႈ 21/10/2018 ၼႆႉ ယွၼ်းႁႂ်ႈၵူၼ်းမိူင်းသႅၼ်ဝီႁဝ်း ၽွမ်ႉၸႂ်ၵၼ်ၵႂႃႇၶဝ်ႈႁူမ်ႈၼမ်ၼမ်သေၵမ်း။ ယွၼ်ႉဝႃႈ ၸဝ်ႈၾႃႉႁဝ်းၶႃႈၼႆႉမိူဝ်ႈဢွၼ်တၢင်း ၶဝ်ၸဝ်ႈ လႆႈသၢင်ႈၽွၼ်းလီပၼ်ၵူၼ်းဝၢၼ်ႈ ၵူၼ်းမိူင်းႁဝ်းၶႃႈလႄႈ ႁဝ်းၶႃႈၵေႃႈဢမ်ႇထုၵ်ႇလီလူင်လိုမ်း ” ဝႃႈၼႆ။
ၸဝ်ႈၼၢင်းမူဝ်ၶမ်းၼႆႉ ပဵၼ်မေးၼၢင်းၸဝ်ႈၾႃႉလူင်သႅၼ်ဝီ ၸဝ်ႈၶမ်းႁူမ်ႇၾႃႉၵေႃႉၼိုင်ႈ။ ၸဝ်ႈၶမ်းႁူမ်ႇၾႃႉ ၶိုၼ်ႈပဵၼ် ၸဝ်ႈၾႃႉသႅၼ်ဝီမိူဝ်ႈ AD 1925 ၵေႃးၸႃႇ (1287) လိူၼ်သၢမ်လွင်ႈ 6 ၶမ်ႈ ၽွင်းဢႃယုၸဝ်ႈလႆႈ 22 ပီသေ ပုတ်ႈၵိၼ် မိူင်းသႅၼ်ဝီ ပွင်သၢင်ႈတိုဝ်းၵမ်ႁဵတ်းၸွမ်းပိူင်ၶုၼ်မိူင်းသိပ်းပိူင် ႁဵတ်းသၢင်ႈတိုဝ်းၵမ်ၸွမ်းတြႃး၊ ဢမ်ႇတဵၵ်းတဵင်ၵူၼ်းမိူင်း၊ မီးၸႂ်လီၸႂ်မျၢတ်ႈ၊ ဢွၼ်ၵူၼ်းမိူင်းႁဵတ်းလွင်ႈတၢင်းလီ၊ ပွင်သၢင်ႈၵၢၼ်ၸိူဝ်ႉၸၢတ်ႈ၊ ၼင်ႇဢၼ်မၼ်းၸဝ်ႈပွင်ပဵၼ်လႆႈၼၼ်ႉၸွႆႈထႅမ်ၵူႈပၢႆးပၢႆး ၵွပ်ႈၼၼ်လႄႈ ၵူၼ်းမိူင်းသႅၼ်ဝီ ဢွၼ်ၵၼ်ႁၵ်ႉႁူမ်မၼ်းၸဝ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ