ၸုမ်းဢုပ်ႇဢူဝ်းၵၢၼ်မိူင်း PPST တူၵ်းလူင်းလႆႈၸႂ်ၵၼ် တေၶဝ်ႈႁူမ်ႈပၢင်ၵုမ်သႅၼ်းၽူႈၼမ်းသုင်သုတ်း၊ ဢၼ်တေ ၸတ်း ႁဵတ်းတီႈၼေႇပျီႇတေႃႇ။ ၼႂ်းၼၼ်ႉ ၸွမ်သိုၵ်းလူင် ယွတ်ႈသိုၵ်း ၽူႈၼမ်း RCSS တင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵေႃႈ လၢၵ်ႇလၢၵ်ႇလၢႆးလၢႆး တေၶဝ်ႈ ႁူမ်ႈၸွမ်း ဝႃႈၼႆ။

ဝၼ်းတီႈ 10-11/10/2018 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်းၵိုတ်းတိုၵ်းပတ်ႉပိုၼ်ႉတူဝ်ႈ မိူင်း NCA ဢုပ်ႇဢူဝ်းၵၼ် တီႈႁူင်းႁႅမ်း Amora Hotel ၸႄႈ ဝဵင်းၵဵင်းမႆႇ ၸိုင်ႈထႆး ဢုပ်ႇၵၼ် လွင်ႈတေၶဝ်ႈႁူမ်ႈ ဢမ်ႇၶဝ်ႈ ႁူမ်ႈပၢင်ၵုမ်သႅၼ်းၽူးၼမ်းသုင်သုတ်းလႄႈ NCA ၶွပ်ႈတဵမ် 3 ပီ ဢၼ်တေၸတ်းႁဵတ်းတီႈၼေႇပျီႇတေႃႇ ၼၼ်ႉ ဝႃႈၼႆ။

ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လၢတ်ႈဝႃႈ “ မိူဝ်ႈ လဵဝ်ၼႆႉ ဢၼ်ႁဝ်းတေၵႂႃႇဢုပ်ႇၼႆႉ ပဵၼ်ၼွၵ်ႈလႅၵ်ႈမၼ်းၵူၺ်း။ ၵွပ်ႈၸိူင်ႉၼၼ်လႄႈ ႁူဝ်ၶေႃႈဢၼ်ႁဝ်းပႆႇတူၵ်း လူင်းၵၼ်လႆႈၼႂ်းႁဝ်းၼင်ႇၵၼ်ၼၼ်ႉ ႁဝ်းဢမ်ႇလူဝ်ႇဢုပ်ႇသင်၊ ႁဝ်းၵႂႃႇထွမ်ႇၵူၺ်း။ ထႅင်ႈလွင်ႈၼိုင်ႈ တီႈဢၼ်တေ ၸတ်းႁဵတ်းပၢင်ၵုမ်သႅၼ်းၽူႈၼမ်းသုင်သုတ်း တီႈပူၵ်ႉပႃးဢၼ်ဝႃႈၼၼ်ႉ မၼ်းၸွၵ်ႉၸဵင်ႇမၼ်းၵႅပ်ႈၼႃႇ။ တီႈမၼ်း ဢမ်ႇသၢင်ႇထုၵ်ႇ။ ႁႂ်ႈလႆႈပဵၼ် တီႈဢၼ်ႁဝ်းၸၢင်ႈ တိူင်ႇပၢင်ႇၵၼ် ၶဝ်ႈႁႃၵၼ်လႆႈ ၵူႈၶၢဝ်းယၢမ်း ၶႂ်ႈႁႂ်ႈပဵၼ်တီႈတႃႈ ၵုင်ႈ ဢမ်ႇၼၼ် ၼေႇပျီႇတေႃႇ” ဝႃႈၼႆ။

လိုၼ်းသုတ်း တူၵ်းလူင်းလႆႈၸႂ်ၵၼ်တေၸတ်းႁဵတ်းပၢင်ၵုမ် တီႈၼေႇပျီႇတေႃႇ။ ပၢင်ၵုမ်သႅၼ်း ၽူႈၼမ်းသုင်သုတ်း ၼႆႉ တေၸတ်းႁဵတ်းတႄႇဢဝ် ဝၼ်းတီႈ 15 လိူၼ်ၼႆႉၵႂႃႇ ဝႃႈၼႆ။

ၽူႈတူင်ႉၼိုင်လွင်ႈၵၢၼ်ငမ်းယဵၼ် ၸဝ်ႈၼိုင်ႈတႄႉ ထတ်းသၢင်လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ် ဢၼ်ၸတ်း ႁဵတ်းမႃး ၶၢဝ်းတၢင်း 2 ဝၼ်းၼႆႉ ဢုပ်ႇၵၼ် လွင်ႈတေၶဝ်ႈႁူမ်ႈ ဢမ်ႇၶဝ်ႈႁူမ်ႈပၢင်ၵုမ်ၵူၺ်း။ လိုၼ်းသုတ်းတူၵ်း လူင်းၵၼ်ဝႃႈတေၵႂႃႇၶဝ်ႈႁူမ်ႈတင်းမူတ်း ဢၼ်လၢၵ်ႇလၢႆးတႄႉ ၽူႈၵွၼ်းသိုၵ်း သုင်သုတ်းမၢၼ်ႈ မိၼ်း ဢွင်ႇလၢႆႇ တင်း ၵႅမ်မၼ်း တေၶဝ်ႈႁူမ်ႈတင်းသွင်ၵေႃႉ။ ၾၢႆႇႁဝ်းၵေႃႈ ၸွမ်သိုၵ်းလူင် ယွတ်ႈသိုၵ်း တေၶဝ်ႈႁူမ်ႈ ၸွမ်းၼၼ်ႉ ယဝ်ႉ ယွၼ်ႉဝႃႈ မိူဝ်ႈ ၵူႈပွၵ်ႈ ဢမ်ႇတွၼ်ႉလႆႈႁၼ်ၶဝ် ၶဝ်ႈႁူမ်ႈ ပၢင်ၵုမ်ၸွမ်းၵၼ်မႃးသေပွၵ်ႈ” ဝႃႈၼႆ။

ႁူဝ်ၶေႃႈ ဢၼ်တေဢုပ်ႇၵၼ် ၼႂ်းပၢင်ၵုမ်သႅၼ်းၽူႈၼမ်းသုင်သုတ်း ဢၼ်တေၸတ်းႁဵတ်းတီႈၼေႇပျီႇတေႃႇၼႆႉ တင်းမူတ်း မီး 6 ႁူဝ်ၶေႃႈ မိူၼ်ၼင်ႇ 1) ၸူဝ်ႈပႆႇသုတ်းသဵင်ႈ 2019 ၼႆႉ ၼင်ႇႁိုဝ် ပေႃး တေလႆႈ လၵ်းၵၢၼ်ပိုၼ်ႉ ထၢၼ် ၶွင်ၻီႊမူဝ်ႊၶရေႊသီႇလႄႈ မိူင်းႁူမ်ႈတုမ် တေႁဵတ်းပၢင်ၵုမ် 3 ပွၵ်ႈၼၼ်ႉ။ 2) ၵဵဝ်ႇလူၺ်ႈလွင်ႈ ဢုပ်ႇဢူဝ်း ၵၢၼ်မိူင်းယူႇၼႆႉ မၼ်းမီးလွင်ႈၶွင်ႉၶမ် ဢၼ်ယႂ်ႇဢၼ်လူင်ယူႇ 2 လွင်ႈ – လွင်ႈၼႆႉ တေႁဵတ်းၸိူင်ႉႁိုဝ်။ 3) ယူင်ႉ ၶၢပ်ႈပၢင်ဢုပ်ႇဢူဝ်း ၵၢၼ်မိူင်းႁႂ်ႈမၼ်းပေႃးသၢင်းလၢင်းသေ ငၢႆႈၸႂ် တွၼ်ႈတႃႇႁဵတ်းၵၢၼ်ၼႆႉ တေမႄးၸိူင်ႉႁိုဝ်။ 4) တေဢဝ်လၢႆးဢၼ် ၽူႈဢွၼ်ႁူဝ်ၶဝ် ဢုပ်ႇဢူဝ်းၵၼ် လႆႈၸႂ်ၵၼ် ပေႃးဢုပ်ႇဢူဝ်းယဝ်ႉ လႆႈၸႂ်ၵၼ်ၵေႃႈ ၸင်ႇၵွႆႈ ဝၢင်းတမ်းပၼ်တီႈၾၢႆႇတႂ်ႈ လွင်ႈၼႆႉ တေဢဝ်လၢႆးလႂ် ႁဵတ်းၸိူင်ႉႁိုဝ်။ 5) ၸုမ်းၸိူဝ်းဢၼ်ပႆႇလူင်းလၢႆးမိုဝ်း NCA ၸိူဝ်းၼၼ်ႉ ႁႂ်ႈၶဝ်ပေႃးၶဝ်ႈပႃးမႃးၼႂ်း ၶၵ်ႉၵၢၼ်ငမ်းယဵၼ်ၼႆႉ တေႁဵတ်းၸိူင်ႉႁိုဝ်။ 6) လွင်ႈၵိုတ်းယိုဝ်းၸိူဝ်းၼႆႉ ႁႂ်ႈမၼ်းပေႃး မၼ်ႈၵိုမ်း တေႁဵတ်းၸိူင်ႉႁိုဝ် ၸဵမ်ၸိူဝ်းၼႆႉ ဝႃႈၼႆ။

ယူႇတီႈ PPST ဢၼ်တေၵႂႃႇၶဝ်ႈႁူမ်ႈ ပၢင်ၵုမ်သႅၼ်းၽူႈၼမ်းသုင်သုတ်း တီႈၼေႇပျီႇတေႃႇၼၼ်ႉ တင်းမူတ်း တေမီးမွၵ်ႈ 75 ၵေႃႉ။ တေပဵၼ်ၽူႈၼမ်းသုင်သုတ်း 10 ၵေႃႉ၊ ၸုမ်းႁၢင်ႈႁႅၼ်း 10 ၵေႃႉ၊ ၽူႈၵမ်ႉၸွႆႈၽူႈဢွၼ်ႁူဝ် သုင်သုတ်း 10 ၵေႃႉ။ လိူဝ်ၼၼ်ႉ ၵူၼ်းၸွမ်း၊ ၵူၼ်းယိပ်းၵၢၼ်လုမ်းလႄႈ ၵူၼ်းႁေႃႈရူတ်ႉၵႃး ၸဵမ်ၸိူဝ်းၼႆႉ။