ၾၢႆႇတူၺ်းလွမ်ႁႅင်းၵၢၼ် မိူင်းထႆး ၾၢင်ႉထိုင်ပေႃႈလဵင်ႉ/မႄႈလဵင်ႉ သင်ၸႂ်ႉၵၢၼ်လုၵ်ႈလဵင်ႉၼႂ်းဝၼ်းလိုဝ်ႈၼႆ တေပၼ်တူတ်ႈတၢမ်ႇၶွၵ်ႈ တင်းတၢမ်ႇမႂ်ငိုၼ်း ၸၢင်ႈထိုင်သႅၼ်ၿၢတ်ႇ ဝႃႈၼႆ။

ဝၼ်းတီႈ 07/10/2018 ၸၢႆးဢၼၼ်ႊၶျႆႊ ဢူႊထႆႊၽတ်ႊထၼႃႊ ၸဝ်ႈၼႃႈတီႈၾၢႆႇတူၺ်းလွမ်ႁႅင်းၵၢၼ် လၢတ်ႈတီႈသိုဝ်ႇ ၶၢဝ်ႇထႆးဝႃႈ – ၸွမ်းၼင်ႇပၵ်းပိူင်ယဝ်ႉ ပေႃႈလဵင်ႉ/ မႄႈလဵင်ႉ တေဢမ်ႇလႆႈၸႂ်ႉၵၢၼ်လုၵ်ႈလဵင်ႉၼႂ်းဝၼ်းလိုဝ်ႈၵၢၼ် ၊ သင်ဝႃႈမီးၵၢၼ်လမ်ႇလွင်ႈလူဝ်ႇႁဵတ်းၼႆ လုၵ်ႈလဵင်ႉ တေလႆႈတဵမ်ၸႂ်ႁဵတ်းပၼ်ၵွၼ်ႇ ၸင်ႇတေၸႂ်ႉလႆႈလႄႈ တေလႆႈပၼ်ငိုၼ်းၵႃႈ    ႁဵတ်းၵၢၼ်ၼႂ်းဝၼ်းလိုဝ်ႈပႃး ၼႆယဝ်ႉ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈတီႈ ၸုမ်းၶၢဝ်ႇၽူႈတွႆႇ ႁွၵ်ႈဝႃႈ – တီႈတႄႉမၼ်းပၵ်းပိူင်ဢၼ်ၼႆႉ မၼ်းမီးမႃးႁိုင်ယဝ်ႉၶႃႈ ၵူၺ်းၵႃႈ ၶဝ်ၵေႃႈဢမ်ႇၶဵင်ႈၶႅင်တႄႉတႄႉ ၊ ဢၼ်မီးၶၢဝ်ႇဢွၵ်ႇမႃးၸိူင်ႉၼႆၼႆႉ ၶဝ်လႅပ်ႈၾၢင်ႉဝႆႉၵွၼ်ႇသေ ၶဝ်တေ ၶဵင်ႈၶႅင်ၸႂ်ႉတိုဝ်းၵႂႃႇႁိုဝ်ဢမ်ႇႁူႉ။ ပေႃးၶဝ်ၸႂ်ႉတိုဝ်းၵႂႃႇတႄႉတေလီတေႃႇႁႅင်းၵၢၼ် ၶႃႈဢေႃႈ ၊ ယွၼ်ႉႁႅင်းၵၢၼ် ဢၼ်ဢမ်ႇမီးဝၼ်းလိုဝ်ႈၵေႃႈမီးတင်းၼမ်” ဝႃႈၼႆ။

ၼၢင်းၸိင်ႇ ႁႅင်းၵၢၼ်တႆး ၼႂ်းၵဵင်းမႆႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၶႃႈမႃးႁဵတ်းၵၢၼ်မႄႈဝၢၼ်ႈ ၵိၼ်ယူႇၸွမ်းပိူၼ်ႈၼႂ်းၵဵင်းမႆႇဢေႃႈ လၢတ်ႈတႄႉဝႃႈ ပၼ်လိုဝ်ႈၼိုင်ႈဝူင်ႈၼိုင်ႈဝၼ်းဝႃႇ ၵူၺ်းၵႃႈပေႃးယူႇ ႁိူၼ်းတႄႉ ဢမ်ႇလႆႈလိုဝ်ႈသင် ၸႂ်ႉၵၢၼ်ယူႇတိၵ်းတိၵ်းႁဵတ်းၼၼ်ဢေႃႈ” ဝႃႈၼႆ။

ပၵ်းပိူင်ၼႆႉ သင်ပေႃႈလဵင်ႉ/မႄႈလဵင်ႉၵေႃႉလႂ် ဢမ်ႇၸွမ်းပၵ်းပိူင်မၢႆမီႈၼႆၸိုင် ၸၢင်ႈၺႃးတူတ်ႈတၢမ်ႇၶွၵ်ႈ ဢမ်ႇပူၼ်ႉ 6 လိူၼ် မႂ်ငိုၼ်းဢမ်ႇပူၼ်ႉ 100,000 (ၼိုင်ႈသႅၼ်) ၿၢတ်ႇ ဢမ်ႇၼၼ်တင်း တူၵ်းၶွၵ်ႈလႄႈ တင်းၺႃးမႂ်ငိုၼ်းၼႆယဝ်ႉ။