ၾူၼ်လူင်တူၵ်းႁႅင်းလၢႆဝၼ်းထပ်းၵၼ်လႄႈ ႁဵတ်းႁႂ်ႈၼမ်ႉႁူၺ်ႈၼမ်ႉလွႆၼွင်း လႆၶဝ်ႈထူမ်ႈ ဢိူင်ႇဝၢၼ်ႈဢိၵ်ႇ ၼႃးၵူၼ်းဝၢၼ်ႈတင်းၼမ်။
ဝၼ်းတီႈ 03/10/2018 ဝၢႆးလင်ၾူၼ်လူင်တူၵ်းႁိူတ်ႇယဝ်ႉ ၼမ်ႉလႆၶဝ်ႈထူမ်ႈ တၢင်းၶဝ်ႈဢွၵ်ႇဝဵင်းလႄႈ ၼႃးၵူၼ်းဝၢၼ်ႈတင်းၼမ်တေႃႇထိုင်မိူဝ်ႈလဵဝ်ပႆႇယွမ်း။
ၸၢႆးၶိူဝ်းတႆး ၵူၼ်းမိူင်းပၼ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ တီႈမိူင်းႁဝ်းၶႃႈၼႆႉ ပေႃးထိုင်မႃး ၶၢဝ်းၾူၼ်ၼႆ ၼမ်ႉၵႆႉထူမ်ႈတႃႇသေႇဢေႃႈ၊ မိူဝ်ႈလဵဝ်ၼမ်ႉတိုၵ်ႉယိုင်ႈဝႆႉယူႇၶႃႈ ၊ ၸဝ်ႈၼႃးဢၼ် ၺႃးၼမ်ႉထူမ်ႈမီးမွၵ်ႈ 10 ပၢႆၶႃႈ ပေႃးၼမ်ႉယွမ်းလႄႈ ထတ်းတူၺ်းတႄႉ ၸင်ႇႁူႉလွင်ႈလူႉ သုမ်းမၼ်းမီးမွၵ်ႈလၢႆဢေႊၶိူဝ်ႊၼႆၶႃႈဢေႃႈ” ဝႃႈၼႆ။
တီႈဝဵင်းမိူင်းပၼ်ႇၼႆႉ ပေႃးထိုင်မႃးၶၢဝ်းၾူၼ်ၼႆ ၼမ်ႉၵႆႉထူမ်ႈယူႇၵူႈပီ ။ ပူၼ်ႉမႃးမိူဝ်ႈ ဝၼ်းတီႈ 01/10/2018 ယၢမ်းဝၢႆးဝၼ်း မွၵ်ႈ 1 မူင်း ထိုင် 4 မူင်းၼၼ်ႉ ၾူၼ်တူၵ်းႁႃႇယႂ်ႇ ၼႂ်းၸႄႈဝဵင်းတူၼ်ႈတီး ၸိုင်ႈ တႆးပွတ်းၸၢၼ်း ၼမ်ႉထူမ်ႈတီႈပွၵ်ႉၸိူဝ်းမီးၾၢႆႇတႅမ်ႇ မိူၼ်ၼင်ႇ ၾၢႆႇတၢင်းႁူင်းယႃပတ မျႃး၊ ႁၢင်ႈမႃႉမိၼ်းယူၵ်ႉ၊ ပွၵ်ႉမေႇၽိဝ်ႇ၊ သဵၼ်ႈတၢင်းလူင် ၵႂႃႇဢေးတႃႇယႃႇ ၸဵမ်ၸိူဝ်းၼႆႉ သေဢမ်ႇၵႃး လၢႆလၢႆဝဵင်းၼႂ်းၸိုင်ႈတႆးပွတ်းၸၢၼ်းၺႃးၼမ်ႉထူမ်ႈႁၢဝ်ႈႁႅင်းၼင်ႇၵဝ်ႇ။
