ၵူၼ်းမိူင်းသီႇပေႃႉ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ယိုဝ်းသႂ်ႇတီႈ ႁိမ်းဝၢၼ်ႈၼွင်ဢၢင်း လႆႈမၢတ်ႇၸဵပ်းႁၢဝ်ႈႁႅင်းသေ လူႉတၢႆၵႂႃႇ ဝႃႈၼႆ။
ဝၼ်းတီႈ 01/10/2018 ယၢမ်းၵၢင်ၶမ်ႈမွၵ်ႈ 7:30 မူင်း ၸၢႆးထုၼ်း ဢႃယု 34 ပီ ၺႃးၸုမ်းဢမ်ႇႁူႉၾၢႆႇ ယိုဝ်းသႂ်ႇ တီႈႁိမ်းဝၢၼ်ႈၼွင်ဢၢင်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၵဵဝ်ႇလူၺ်ႈလွင်ႈၼႆႉ ပဵၼ် ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ပႆႇလႆႈႁူႉ ဝႃႈၼႆ။
ၵူဝ်ႇမဵဝ်း ၸုမ်းပရႁိတ ၸႄႈဝဵင်းသီႇပေႃႉ(နယ်စည်းမခြား ပရဟိတ အသင်း) လၢတ်ႈတီႈၽူႈတွႆႇႁွၵ်ႈ ဝႃႈ “ ၵူၼ်းမိူင်း ဢၼ်ၺႃးယိုဝ်းၼၼ်ႉ ပဵၼ်ၽူႈၸၢႆး ဢႃယု 34 ပီ။ ၵူၼ်းဢၼ်မႃးယိုဝ်းၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ်ဢၼ်ဝႃႈ ၼၼ်ႉ ဢမ်ႇလႆႈႁူႉ။ တေႃႈလဵဝ် တူဝ်တၢႆ ၽူႈၸၢႆးၼၼ်ႉ ႁဝ်းၶႃႈလႆႈတေႃႉသူင်ႇပၼ်ႁူင်းယႃ ၵျွၵ်ႉမႄးယဝ်ႉ” ဝႃႈၼႆ။
သိုပ်ႇလၢတ်ႈဝႃႈ မၼ်းၸၢႆးၺႃးယိုဝ်းၾၢႆႇလင်။ ဢၼ်ၶဝ်ယိုဝ်းမၼ်းၸၢႆးၼၼ်ႉ ပဵၼ်တၢင်းၾၢႆႇလင်။ ဢွင်ႈတီႈ ဢၼ် ၺႃးယိုဝ်းၼၼ်ႉ ပဵၼ် တီႈႁိမ်းဝၢၼ်ႈၼွင်ဢၢင်း တီႈသူၼ်ၶဝ်ႈၵၢပ်ႇ။
ၵဵဝ်ႇလူၺ်ႈလွင်ႈၼႆႉ ၸဝ်ႈၼႃႈတီႈပလိၵ်ႈၸႄႈဝဵင်း သီႇပေႃႉၵေႃႈ လၢတ်ႈတီႈၽူႈတွႆႇႁွၵ်ႈဝႃႈ ၸႂ်ႈၶႃႈဢေႃႈ ၽူႈၸၢႆး ၵေႃႉၼိုင်ႈ ၺႃးယိုဝ်းတၢႆ။ ၵူၺ်းၵႃႈ ပဵၼ်ၸုမ်းလႂ် ၼမ်ႉမိုဝ်းၽႂ်ယိုဝ်းဢၼ်ဝႃႈၼၼ်ႉ ဢမ်ႇလႆႈႁူႉ တေႃႈလဵဝ် တိုၵ်ႉ ၵူတ်ႇထတ်းယူႇ” ဝႃႈၼႆ။
“ၼႂ်းဝဵင်းသီႇပေႃႉႁဝ်းၶႃႈၼႆႉ ၵႆႉၵႆႉမီးလွင်ႈယိုဝ်း ၶႃႈႁႅမ်ၵၼ်တၢႆ။ ယူႇတီႈၾၢႆႇၸဝ်ႈၼႃႈတီႈၶဝ် ဢမ်ႇတီႉၺွပ်းလႆႈ ၵူၼ်း ႁၢႆႉသေပွၵ်ႈ။ လွင်ႈႁူမ်ႇလူမ်ႈ တွၼ်ႈတႃႇၵူၼ်းမိူင်းၵေႃႈဢမ်ႇမီး လိူဝ်သေ ၸဝ်ႈၵဝ်ႇ ၶိုၼ်းဢဝ်ႁူမ်ႇလူမ်ႈၶိုၼ်း ၵူၺ်း” ၵူၼ်းၼႂ်းပိုၼ်ႉတီႈ ၸႄႈဝဵင်းသီႇပေႃႉ ၵေႃႉၼိုင်ႈတႄႉ လၢတ်ႈၼႄၼင်ႇၼႆ။
ၵဵဝ်ႇလူၺ်ႈလွင်ႈၵူၼ်းမိူင်း ၼႂ်းၸႄႈဝဵင်းသီႇပေႃႉ ဢၼ်ၺႃးၸုမ်းဢမ်ႇႁူႉၾၢႆႇယိုဝ်းတၢႆၼႆႉ တင်ႈတႄႇႁူဝ်ပီ 2018 ၼႆႉမႃး တင်းမူတ်းတေမီးမွၵ်ႈ 10 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ