ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်းဝၢၼ်ႈၵူၼ်းမိူင်း ၵူၼ်းၵႃႉဝူဝ်း၊ ၸဝ်ႈၵႃး ၵႆႉၵႆႉၺႃးယိုဝ်းတၢႆ မိူဝ်ႈပူၼ်ႉ မႃး 4 ဝၼ်းၼၼ်ႉၵေႃႈ ၵူၼ်းဝၢၼ်ႈၸၢမ်ၽိူၵ်ႇ ၺႃးယိုဝ်းတၢႆ ပဵၼ်ၼမ်ႉမိုဝ်းၽႂ်/ ၸုမ်းလႂ်ဢၼ်ဝႃႈၼၼ်ႉ ၾၢႆႇၸဝ်ႈ ၼႃႈတီႈယင်းပႆႇၵူတ်ႇထတ်းတီႉၺွပ်းလႆႈ။
ဝၼ်းတီႈ 26/07/2018 ယၢမ်းၵၢင်ၶိုၼ်း မွၵ်ႈ 10 မူင်း လုင်းၸၢႆးၸိင်ႇဝိၼ်း ဢႃယု 44 ပီ ပဵၼ်ၸၢဝ်းလွႆ ၺႃးၵူၼ်းႁၢႆႉ ၵေႃႉၼိုင်ႈ တူမ်းၼႃႈသေ ၶဝ်ႈယိုဝ်းၼႂ်းႁိူၼ်း တိူဝ်ႉမၢတ်ႇ 3 ၵမ်းလူႉတၢႆ ၼႂ်းႁိူၼ်းမၼ်းၸၢႆး တီႈဝၢၼ်ႈၸၢမ်ၽိူၵ်ႇ ဢိူင်ႇၸၢမ်ၽိူၵ်ႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးသႅင် ၵူၼ်းပိုၼ်ႉတီႈ ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝဵင်းသီႇပေႃႉ ႁဝ်းၶႃႈၼႆႉ တေႃႈလဵဝ် တေ လႆႈဝႃႈ ဢမ်ႇမီးလွင်ႈႁူမ်ႇလူမ်ႈသင်ၶႃႈယဝ်ႉ။ လွင်ႈယိုဝ်းၵၼ်တၢႆၸိူင်ႉၼႆ ၶႂ်ႈဝႃႈမီးယူႇသေႇသေႇယဝ်ႉ။ လွင်ႈ လုင်းၸၢႆးၸိင်ႇဝိၼ်းၺႃးယိုဝ်းတၢႆထႅင်ႈၼႆႉၵေႃႈ ပဵၼ်ၽႂ် ၸုမ်းလႂ်ႁဵတ်းဢၼ်ဝႃႈၼၼ်ႉ ၸဝ်ႈၼႃႈတီႈၶဝ် ပႆႇၺွပ်းလႆႈ။ ၵူၼ်းႁၢႆႉဢၼ်မႃးယိုဝ်းၼႆႉၵေႃႈ ၶဝ်ၶီႇလူတ်ႉၶိူင်ႈမႃးၸွမ်းၵၼ် 2 ၵေႃႉ။ ၵေႃႉၼိုင်ႈပႂ်ႉတီႈလူတ်ႉၶိူင်ႈ ထႅင်ႈၵေႃႉၼိုင်ႈ ၶဝ်ႈၵႂႃႇယိုဝ်း” ဝႃႈၼႆ။
လုင်းၸၢႆးၸိင်ႇဝိၼ်းၼႆႉ လႆႈတိူဝ်ႉမၢၵ်ႇၵွင်ႈတီႈတူဝ်မၼ်းၸၢႆး 3 ႁွႆး တိူဝ်ႉတီႈၵွင်ႇၵေႃႈႁွႆးၼိုင်ႈ၊ တီႈပုမ်ႁွႆးၼိုင်ႈလႄႈ တီႈ ၵွင်းလင် ႁွႆးၼိုင်ႈ မၼ်းၸၢႆး လႆႈတၢႆထင်တီႈၼႂ်းႁိူၼ်းမၼ်းၵမ်းလဵဝ်။ လုင်းၸၢႆးၸိင်ႇ ဝိၼ်းၼႆႉ ပိုတ်ႇဝႆႉ ႁူင်းသိုဝ်ႉ ၶၢႆၶဝ်ႈၵၢပ်ႇ ဢိၵ်ႇပႃး ႁၢၼ်ႉၵုၼ်ႇတၢင်းၶၢႆ တီႈႁိူၼ်း မၼ်းၸၢႆး တီႈဝၢၼ်ႈၸၢမ်ၽိူၵ်ႇ။ ဝၢၼ်ႈၸၢမ်ၽိူၵ်ႇၼႆႉ ယၢၼ်ၵႆ ဝဵင်းသီႇပေႃႉ 1 လၵ်းပၢႆ ဝႃႈၼႆ။
ၸႄႈတွၼ်ႈၵျွၵ်ႉမႄးၼႆႉ ၵူၼ်းမိူင်းၵႆႉၵႆႉၺႃးယိုဝ်းတၢႆယူႇတႃႇသေႇ။ ဝၼ်းတီႈ 09/07/2018 ၵူၼ်းႁေႃႈၵႃးတၢင်ႇဝူဝ်း ၺႃးယိုဝ်း ႁိမ်းဝၢၼ်ႈပၢင်ႇတိုင် ၵျွၵ်ႉမႄး။ ဝၼ်းတီႈ 15/06/2018 လုင်းၸၢႆးၸၢမ်ႇၺုၼ်ႉ ၼၢင်းသူၺ်ႇၵျီႇ ၸဝ်ႈၶွင် ႁၢၼ်ႉၶၢႆၶဝ်ႈၽၵ်းၺႃးယိုဝ်းတၢႆ ၵိုၵ်းႁၢၼ်ႉ တီႉဝၢၼ်ႈသူၼ်ဢွႆႈ ဝဵင်းသီႇပေႃႉ။ ဝၼ်းတီႈ 11/06/2018 ၵူၼ်းႁေႃႈၵႃး တၢင်ႇဝူဝ်းၺႃးယိုဝ်းတၢႆ ၼႂ်းၵႄႈသီႇပေႃႉ ၵျွၵ်ႉမႄး။ ဝၼ်းတီႈ 08/05/2018 ၸဝ်ႈၵႃး 12 လေႃႉ ၺႃးယိုဝ်းတၢႆၶမ်ၵႃး တီႈႁိမ်းဝၢၼ်ႈသူၼ်ဢွႆႈ ဝဵင်းသီႇပေႃႉ။ ဝၼ်းတီႈ 20/05/2018 ၵူၼ်းဝၢၼ်ႈ ၵုင်းသႃႇ သီႇပေႃႉ သွင်ၵေႃႉၽူဝ်မေး ၺႃးယိုဝ်းတၢႆ ၵိုၵ်းႁိူၼ်း။ ဝၼ်းတီႈ 31/03/2018 ၵူၼ်းၵႃႉဝူဝ်းၺႃးယိုဝ်းတၢႆၼႂ်းၵႄႈဝၢၼ်ႈသီႇသူင်ႇ တင်းဝၢၼ်ႈ ၵုင်းသႃႇ။ ၼႂ်းလုၵ်ႈလိူၼ် ၵျႅၼ်ႊၼိဝ်ႊရီႊ ႁူဝ်ပီ 2018 ၼၼ်ႉၵေႃႈ ၵူၼ်းၵႃႉဝူဝ်းၺႃးယိုဝ်း တၢႆၼႂ်းၸႄႈဝဵင်း သီႇပေႃႉ ဝႃႈၼႆ။
ဢၼ်ၵူၼ်းဝၢၼ်ႈၵူၼ်းမိူင်းၺႃးယိုဝ်းတၢႆၶိူဝ်းယႂ်းၼႆႉ ဢမ်ႇမီးၸုမ်းလႂ်ၸွႆႈထႅမ်ၵႄႈလိတ်ႈပၼ်ႁႃ ႁႂ်ႈၵူၼ်းမိူင်းပေႃး လႆႈယူႇၵတ်းယဵၼ်၊ မီးလွင်ႈႁူမ်ႇလူမ်ႈလႄႈ လႆႈမႆႈၸႂ်ယူႇၵူႈၶၢဝ်းယၢမ်း ၵူၼ်းမိူင်းသီႇပေႃႉလၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ