ၵူၼ်းၼုမ်ႇႁႅင်းၵၢၼ်တႆး ၽိတ်းမေႃးပေႃႉထုပ်ႉၵၼ်ၶိုၼ်းႁၢဝ်ႈႁႅင်း ၼႂ်းၵဵင်းမႆႇ မီးၵူၼ်းမၢတ်ႇၸဵပ်း 4 ၵေႃႉ ဝႃႈၼႆ။

ဝၼ်းတီႈ 29/09/2018 ယၢမ်းၵၢင်ၶိုၼ်း မွၵ်ႈ 10:30 မူင်းၼၼ်ႉ ၵူၼ်းၼုမ်ႇႁႅင်းၵၢၼ်တႆး မွၵ်ႈ 20 ပၢႆ ၸီႉၼႃႈ တမ်တႃ ၽိတ်းမေႃးပေႃႉထုပ်ႉၵၼ် ၼႂ်းၵၢတ်ႇမိူင်းမႂ်ႇ ၸႄႈဝဵင်းၵဵင်းမႆႇ ၸိုင်ႈထႆး။ ႁႅင်းၵၢၼ်တႆး ဢမ်ႇႁူႉၸွမ်း လွင်ႈသင် လႆႈတိူဝ်ႉမၢတ်ႇၸဵပ်းၸွမ်း ဝႃႈၼႆ။

ၸၢႆးတႆးထိူၼ်ႇ ၾၢႆႇၸွႆႈထႅမ်ၸုမ်းတူင်ႉၼိုင်တူင်ႇဝူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ လုၵ်ႈဢွၼ်ႇၼႆႉ လုၵ်ႉတၢင်း လမ်းပုၼ်းမႃး။ ဢူၺ်းၵေႃႉၶဝ် ဢၼ်ယူႇတီႈၼႂ်းၵၢတ်ႇမိူင်းမႂ်ႇၼၼ်ႉ ႁွင်ႉၶဝ်မႃးၼႂ်းၵၢတ်ႇ။ သမ်ႉမႃးၺႃး ၸုမ်းဢၼ် ဢမ်ႇမႅၼ်ႈၵၼ်သေ ၸႂ်လမ်ၽိတ်းမေႃးၵၼ်။ ၾၼ်းၺႃးပႃး ၸုမ်းဢၼ်လၢၵ်ႈလေႃႉ တေႃႉၶူဝ်းၼႂ်းၵၢတ်ႇ။ ၵူၼ်းၼုမ်ႇ 20 ပၢႆၼႆႉ ပေႃးထိုင်ၼႂ်းၵၢတ်ႇၵေႃႈ ၽိတ်းပိူၼ်ႈလူင်ၵႂႃႇ ၵူႈၵေႃႉ ၸိူဝ်းမႃးသိုဝ်ႉၶၢႆၼႂ်း ၵၢတ်ႇၵေႃႈ ဢမ်ႇဝႆႉၵိုတ်း” ဝႃႈၼႆ။

“ၸုမ်းၽိတ်းၵၼ်ၼႆႉ ၶဝ်မီးလွင်ႈဢမ်ႇႁၢၼ်ႉၸႂ်ၼိူဝ်ၵၼ်မႃး လၢႆၵမ်းယဝ်ႉ။ ဢၼ်ၶဝ်ပေႃႉၵၼ်ၵေႃႈ ပွၵ်ႈၼႆႉပဵၼ် ပွၵ်ႈၵမ်း 3 ။ မိူဝ်ႈဝၼ်းတီႈ 28/09/2018 ၼၼ်ႉၵေႃႈ ၶဝ်ပေႃႉၵၼ်ယဝ်ႉၵမ်းၼိုင်ႈ” ဝႃႈၼႆ။

ယွၼ်ႉၸုမ်းၶဝ်ၾၼ်းလႄႈ ၵူၼ်းဢၼ်ႁဵတ်း ၵၢၼ်ႁႃၵိၼ်လဵင်ႉတွင်ႉၼႂ်းၵၢတ်ႇမိူင်းမႂ်ႇၼၼ်ႉ မၢတ်ႇၸဵပ်း 3 ၵေႃႉ။ ၼႂ်းၸုမ်းၵူၼ်းႁၢႆႉၽိတ်းၵၼ်သမ်ႉ မၢတ်ႇၸဵပ်းၼိုင်ႈၵေႃႉ ဢၼ်တိူဝ်ႉမၢတ်ႇ တင်းမူတ်းမီး 4 ၵေႃႉ ဝႃႈၼႆ။

ၸၢႆးၶမ်း ၵူၼ်းႁဵတ်းၵၢၼ် ၼႂ်းၵၢတ်ႇမိူင်းမႂ်ႇ လၢတ်ႈဝႃႈ “ ႁဝ်းၶႃႈၵေႃႈ ဢမ်ႇပွင်ႇၸႂ်ၶႃႈၼႃ ၵူၼ်းႁၢႆႉ ဢၼ်သၢင်ႈပၼ် ႁႃ ပဵၼ်ၽိုၼ်းပဵၼ်ၾႆးယူႇၼႂ်းမိူင်းပိူၼ်ႈၸိူဝ်းၼႆႉ ႁဵတ်းသင်လႄႈ ၸဝ်ႈၼႃႈတီႈထႆးၶဝ် ဢမ်ႇတီႉၺွပ်း သူင်ႇပွၵ်ႈမိူဝ်း ၶႃႈၼေႃႈ။ ပေႃးၶဝ်တီႉၺွပ်းပၼ်တၢမ်ႇယဝ်ႉၵေႃႈ ပွႆႇၶိုၼ်းႁဵတ်းၼႆၶဝ်ၵေႃႈ တေသိုပ်ႇယႃႉ ၸိုဝ်ႈတႆးၼဝ်ႈယူႇ တိၵ်း တိၵ်း။ ပေႃးပဵၼ်ပီႈၼွင်ႉႁႅင်းၵၢၼ် ႁဵတ်း ၵိၼ်ၵၢၼ်ႁႃလဵင်ႉတွင်ႉၸွမ်းဝၼ်းလႂ် ဝၼ်းၼၼ်ႉသမ်ႉ ၺႃးၵိၼ်ၸွမ်း ၸဝ်ႈၼႃႈတီႈထႆး လႄႇႁႃသွၵ်ႈတဝ်တီႉၺွပ်းယူႇတႃႇ သေႇ ႁဵတ်းၵၢၼ်ၽိတ်းတီႈၵူၺ်းၵေႃႈ တီႉၺွပ်းသေ သူင်ႇပွၵ်ႈ မိူဝ်းၵမ်းလဵဝ် လွင်ႈၼႆႉ ပဵၼ်ဢၼ် ပႅၵ်ႇၸႂ်ယူႇၶႃႈၼႃ” ဝႃႈၼႆ။

ၵူၼ်းမၢတ်ႇၸဵပ်း 4 ၵေႃႉၼၼ်ႉ ယူႇတီႈပလိၵ်ႈထႆးၶဝ် လႆႈသူင်ႇတူဝ်ယူတ်းယႃဝႆႉတီႈႁူင်းယႃသူၼ်ၻွၵ်ႊဝႆႉယဝ်ႉ ဝႃႈၼႆ။

ၼွၵ်ႈလိူဝ်ၼၼ်ႉ ပလိၵ်ႈထႆး ၵုမ်းတီႉလႆႈ ၵူၼ်းႁၢႆႉ2 ၵေႃႉ ဢၼ်လႅၼ်ႈပၢႆႈ။ တီႉလႆႈပႃး လႅဝ်းမိတ်ႈ၊ ၶူဝ်းၽိတ်း မၢႆမီႈလႄႈ ၵွင်ႈ ၸိူဝ်းၼႆႉပႃး ဝႃႈၼႆ။