ၼၢင်းၸၢမ်ႇၵေႃႉပဵၼ်မေးၼၢင်း ၸၢႆးသၢင်ႇယဵၼ်ႇ ဢၼ်ၺႃးပေႃႈလဵင်ႉ ၶႃႈႁႅမ်တၢႆတီႈဝဵင်းမႄႈၸႅမ်ႇ ၵဵင်းမႆႇမိူဝ်ႈ 2 လိူၼ်ပူၼ်ႉမႃးၼၼ်ႉ တေပွၵ်ႈယူႇၶိုၼ်းမိူင်းတႆး။
ဝၼ်းတီႈ 01/10/2018 ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ဢွၼ်ဢဝ်တူဝ် ၼၢင်းၸၢမ်ႇ ၵေႃႉပဵၼ်မေး ၸၢႆးသၢင်ႇယဵၼ်ႇ သူင်ႇတူဝ်ပၼ် ၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်း တီႈဝဵင်းၵဵင်းမႆႇ ၸိုင်ႈထႆး တႃႇသူင်ႇတူဝ်မၼ်းၼၢင်းပွၵ်ႈၶိုၼ်း မိူင်းတႆး ။
ၸၢႆးပိူင်းၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ ၼၢင်းၸၢမ်ႇၼႆႉ ယူႇမိူင်းထႆးၵေႃႈ ဢမ်ႇမီးဝတ်း ဝႂ် တႃႇယူႇသဝ်း ႁဵတ်းၵၢၼ် ၾၢႆႇၼိုင်ႈမၼ်းၼၢင်းၵေႃႈ မီးလုၵ်ႈဝႆႉ တၢင်းမိူင်းတႆး၊ ပေႃႈမႄႈပီႈၼွင်ႉၵေႃႈမီးတၢင်းမိူင်းတႆး၊ မၼ်းၼၢင်းၸင်ႇတႅပ်းတတ်း ပွၵ်ႈယူႇ ၶိုၼ်းမိူင်းတႆး။ ၵႃႈသၢႆႈတႅၼ်းဢၼ်မၼ်းၼၢင်းလႆႈႁပ်ႉ မီး 200,000 ၿၢတ်ႇငိုၼ်းထႆး၊တူၵ်းငိုၼ်းမၢၼ်ႈမွၵ်ႈ ႑႐႐ သႅၼ်ပျႃး။ ၵေႃႉပဵၼ်ပေႃႈလဵင်ႉၼၼ်ႉတႄႉ မိူဝ်ႈလဵဝ်လုၵ်ႈလၢင်းၼၢင်းမေး ၵႂႃႇထုတ်ႇဢဝ်တူဝ်မၼ်းၸၢႆး မိူဝ်းယူႇတီႈ ႁိူၼ်း ပေႃးလုမ်းတြႃးတႅပ်းတတ်းယဝ်ႉတႄႉ မၼ်းၸၢႆးၸၢင်ႈၺႃးတူတ်ႈတၢမ်ႇတေၸၢင်ႈပဵၼ်တူၵ်းၶွၵ်ႈ 15 – 20 ပီ ” ဝႃႈၼႆ ။
ပူၼ်ႉမႃးမိူဝ်ႈဝၼ်းတီႈ 08/08/2018 ပေႃႈလဵင်ႉ ၸႂ်လမ်တေႃႇ လုၵ်ႈလဵင်ႉ ဢၼ်ၵႂႃႇႁႃ ႁဵတ်းၵၢၼ်တၢင်းၼွၵ်ႈလႄႈ လမ်း ၵႂႃႇၸွမ်းယိုဝ်းထိုင်တီႈႁဵတ်းၵၢၼ်တၢင်းၼွၵ်ႈတေႃႇပေႃးတၢႆ သိုပ်ႇၼၼ်ႉ ဢဝ်ၵႂႃႇၾင်လိၼ်ပႅတ်ႈ တီႈၼႂ်းပႃႇ ႁိမ်းသူၼ်သူမ်ႈ။ ဝၼ်းတီႈ 17/08/2018 ၸဝ်ႈၼႃႈတီႈၸင်ႇႁူမ်ႈ ၵၼ်ၵႂႃႇတီႉၺွပ်းလႆႈတူဝ်ပေႃႈလဵင်ႉလႄႈ ႁူမ်ႈၵၼ်ၶုတ်းဢဝ်ၶၢပ်ႈတူဝ် ၸၢႆးသၢင်ႇယဵၼ်ႇ သူင်ႇႁူင်းယႃသူၼ်ၻွၵ်ႇပိူဝ်ႈ ၵူတ်ႇထတ်းႁႃလွင်ႈတၢင်းၵၢၼ်တၢႆ။ သိုပ်ႇၼၼ်ႉယူႇတီႈႁူင်းယႃ သူၼ်ၻွၵ်ႇသေ လုမ်းလႃးၶၢပ်ႈတူဝ်ၸၢႆးသၢင်ႇယဵၼ်ႇၵႂႃႇမိူဝ်ႈဝၼ်းတီႈ 19/9/2018 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ