ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 5 ၼၼ်ႉ ၽူႈတႅၼ်းသၽႃး ယွၼ်းၶႂၢင်ႉဢမ်ႇမႃးၶိုၼ်ႈ ပၢင်ၵုမ် မီး 26 ၵေႃႉ ၸၢႆးလူင်းသႅင် ႁူဝ်ပဝ်ႈသၽႃးမိူင်းတႆးပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်။
ဝၼ်းတီႈ 24/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 5 ဢၼ်ၸတ်းႁဵတ်းတီႈ လုမ်း သၽႃးမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၼႂ်းဝၼ်းလဵဝ် ၽူႈတႅၼ်းသၽႃးမိူင်းတႆး ယွၼ်းၶႂၢင်ႉ ဢမ်ႇ မႃးၶိုၼ်ႈပၢင်ၵုမ် မီး 26 ၵေႃႉ ဝႃႈၼႆ။
ၼႂ်းဝၼ်းတီႈ 24 ၽူႈတႅၼ်းသၽႃးမိူင်းတႆး တင်းမူတ်း မီး 143 ၵေႃႉၼၼ်ႉ ၶဝ်ႈႁူမ်ႈပၢင်ၵုမ် တင်းမူတ်း 117 ၵေႃႉ ၸိူင်ႉၵၢတ်ႈ 26 ၵေႃႉ ဝႃႈၼႆ။
ၽူႈမီးပုၼ်ႈၽွၼ်း ၶွမ်ႊမတီႊၾၢႆႇၵူတ်ႇထတ်း ၽူႈတႅၼ်းသၽႃးၸႄႈမိူင်း လၢတ်ႈတီႈ သိုဝ်ႇၶၢဝ်ႇ 7day ဝႃႈ “ ၽူႈ တႅၼ်းဢၼ်ၶဝ်ယွၼ်းၶႂၢင်ႉ ဢမ်ႇမႃးၶိုၼ်ႈပၢင်ၵုမ်ၼႆႉ ယွၼ်ႉၶဝ်မီးၵၢၼ် တႃႇၶဝ်ဢၼ်လူဝ်ႇႁဵတ်း” ဝႃႈၼႆ။
ပၢင်ၵုမ်သၽႃး ဝၼ်းထူၼ်ႈ 5 ၼၼ်ႉ ၽူႈတႅၼ်းသၽႃးမိူင်းတႆး 10 ၵေႃႉ တွင်ႈထၢမ် ၼႂ်းသၽႃး 10 ဢၼ်။ ပၢင်ၵုမ် သၽႃးမိူင်းတႆး ပွၵ်ႈၼႆႉ တႄႇဢဝ်ဝၼ်းတီႈ 17 ထိုင် 25 လိူၼ်သႅပ်ႊထႅမ်ႊၿိူဝ်ႊ 2018 တႃႇၶၢဝ်းတၢင်း 7 ဝၼ်း ဝႃႈၼႆ။
