ၵူၼ်းမိူင်းမၢၼ်ႈ၊ မိူင်းတႆး ဢၼ်ၵႂႃႇႁဵတ်းၵၢၼ်ၼႂ်းမိူင်းထႆး ၸိူဝ်းဢမ်ႇၶဝ်ႈပၵ်းပိူင်ၵူၼ်းႁဵတ်းၵၢၼ်ၼၼ်ႉ ထုၵ်ႇပလိၵ်ႈ ထႆး တီႉၺွပ်းသူင်ႇတူဝ်ပွၵ်ႈတၢင်း လႅၼ်လိၼ်တႆး – ထႆး တၢင်းၸႄႈဝဵင်းတႃႈၶီႈလဵၵ်း မီးၵႂႃႇ 850 ပၢႆယဝ်ႉ ဝႃႈၼႆ။
တႄႇဢဝ် ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊ ထိုင် ဝၼ်းတီႈ 17 လိူၼ်သႅပ်ႊထႅမ်ႊၿိူဝ်ႊ ၼႂ်းပီ 2018 ၼႆႉမႃး ပလိၵ်ႈ ထႆး သူင်ႇႁႅင်းၵၢၼ်တႆး၊ မၢၼ်ႈ ပၼ်တပ်ႉပလိၵ်ႈမၢၼ်ႈ ၸႄႈဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း မီးၵႂႃႇယဝ်ႉ ၸၢႆး 563 ၵေႃႉ၊ ယိင်း 260 ၵေႃႉလႄႈ လုၵ်ႈဢွၼ်ႇ 31 ၵေႃႉ ႁူမ်ႈ ၵၼ် တင်းမူတ်း 854 ၵေႃႉ ဝႃႈၼႆ။
သိုဝ်ႇၶၢဝ်ႇမျၢၼ်ႇမႃႉဢလိၼ်း ဢွၵ်ႇဝႆႉဝႃႈ “ ႁႅင်းၵၢၼ်မိူင်းႁူမ်ႈတုမ် ဢၼ်ၺႃးတီႉၼၼ်ႉ ၵမ်ႈၼမ် ဝတ်းဝႂ်မူတ်း ဢႃယု၊ ဢမ်ႇၵႂႃႇလၢႆးငၢၼ်းတူဝ်၊ ဢမ်ႇမီးဝတ်းဝႂ် ၸဵမ်ၸိူဝ်းၼႆႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၾၢႆႇပလိၵ်ႈ၊ ၾၢႆႇၵူတ်ႇထတ်းၵူၼ်းၶဝ်ႈမိူင်း၊ ၾၢႆႇႁႅင်းၵၢၼ်၊ ႁွင်ႈၵၢၼ်ၽူႈၵွၼ်းၸႄႈဝဵင်း၊ ၸုမ်းသၢၼ်ၶတ်းၵႃႉၶၢႆၵူၼ်း ၸိူဝ်းၼႆႉ ႁူမ်ႈၵၼ် ဢဝ်ပုၼ်ႈၽွၼ်းသေ သူင်ႇတူဝ်ပွၵ်ႈမိူဝ်း ၶိုၼ်းဝၢၼ်ႈၽႂ်/ မိူင်း မၼ်း ယဝ်ႉ ဝႃႈၼႆ။