ၼၢင်းယိင်းၸၢဝ်းလႃးႁူႇ ၵူၼ်းမိူင်းသၢတ်ႇ ၵေႃႉၼိုင်ႈ ၺႃးၶႃႈႁႅမ်ၽွင်းၵႂႃႇမၢႆႁႆႈ ဝႃႈၼႆ။

ၵူၼ်းမိူင်းသၢတ်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ  – “ ဝၢႆးသေ ႁူႉဝႃႈ မီးၵူၼ်းလူႉတၢႆၼႂ်းထဵင်ၼၼ်ႉယဝ်ႉ ႁွင်ႉၽူႈယႂ်ႇၵူၼ်းလူင်ၼႂ်းဝၢၼ်ႈၵႂႃႇတူၺ်းၸွမ်း။ တူၺ်းမိူၼ် ၺႃးပေႃႉၺႃးထုပ်ႉဝႆႉတီႈၵွၵ်းႁူဝ် တိုၵ်ႉၼုၵ်းလိူတ်ႈဝႆႉယူႇၼိူဝ်ထဵင်ႁႆႈ  ” – ဝႃႈၼႆ။

ပိူင်ပဵၼ်ၼႆႉ ပဵၼ်ၵႂႃႇ မိူဝ်ႈဝၼ်းတီႈ 03/07/2026 ၶၢဝ်းၵၢင်ဝၼ်း  ။ ၸွမ်းၼင်ႇ ၵူၼ်းဝၢၼ်ႈလၢတ်ႈတႄႉ ၼၢင်းယိင်းၵေႃႉလူႉတၢႆၼႆႉ ၸိုဝ်ႈ ၼႃႈႁႄႈသီး ဢႃယု 20 ပၢႆ တႄႇၼႃႈႁိူၼ်း မီးလုၵ်ႈ 2 ၵေႃႉ ယူႇဝၢၼ်ႈဢႃးႁႄႈ ဢိူင်ႇၸတီႇ ၸႄႈဝဵင်းမိူင်းသၢတ်ႇ ႁဵတ်းၵၢၼ်ႁႆႈၵၢၼ်သူၼ်  ။

ဢွင်ႈတီႈ ဢၼ်ၵေႃႉလူႉတၢႆၵႂႃႇမၢႆႁႆႈၼႆႉ  ယၢၼ်ၵႆ ဝၢၼ်ႈဢႃးႁႄႈ မွၵ်ႈ 2 လၵ်း မီးၾၢႆႇတူၵ်းဝဵင်းမိူင်းသၢတ်ႇ ။ ဝၢႆးၼၼ်ႉ  ပလိၵ်ႈလႄႈၸုမ်းပျီႇတူႉၸိတ်ႉမိူင်းသၢတ်ႇ တီံႉၺွပ်းဢဝ် ၵူၼ်းၸၢႆးဢၼ်ထၢင်ႇထိူမ် 4 ၵေႃႉ ပႃးတင်း ၸဝ်ႈၽူဝ်ၵေႃႉလူႉတၢႆ။

ဝၢႆးသေ ထဵတ်ႈထၢမ်တူၺ်းယဝ်ႉ ပလိၵ်ႈပွႆႇလွတ်ႈၶိုၼ်း 3 ၵေႃႉပႃးတင်းၸဝ်ႈၽူဝ်မၼ်းၼၢင်း ။ တိုၵ်ႉၵုမ်းၶင်ထဵတ်ႈထၢမ်ဝႆႉၵေႃႉၼိုင်ႈ ။ ယွၼ်ႉဝႃႈ ၵူၼ်းၸၢႆးၵေႃႉၼႆႉ ယၢမ်ႈမီးပၼ်ႁႃၵၼ်တင်းၵူၼ်းၼႂ်းဝၢၼ်ႈ ။ ယၢမ်ႈၽိတ်းမေႃး ယၢမ်ႈႁဵတ်းႁၢႆႉၵူၼ်းၼႂ်းဝၢၼ်ႈမႃး ။ ဢႃယုမၼ်းၸၢႆး   34 ပီ ဝႃႈၼႆ။

လွင်ႈၶႃႈႁႅမ်ၵၼ်ပွၵ်ႈၼႆႉ ပႆႇႁူႉဝႃႈ ပဵၼ်ၵွပ်ႈသင် ပလိၵ်ႈတိုၵ်ႉထဵတ်ႈထၢမ် ၽူႈထၢင်ႇထိူမ်ဝႆႉယူႇ  ။

မိူဝ်ႈၼႂ်းပီ 2023 ၼၼ်ႉၵေႃႈ ၵူၼ်းပွၵ်ႉႁူဝ်ၼႃး မိူင်းသၢတ်ႇ သွင်ၽူဝ်မေးၽိတ်းၵၼ် ၵေႃႉပဵၼ်ၽူဝ်ၽၼ်းၶေႃးမေးၸဝ်ႈၵဝ်ႇတၢႆသေ ၵႂႃႇပႅတ်ႈတူၵ်းၼမ်ႉ ။