TNLA တီႉၺွပ်း ၼၢင်းမူဝ်ႁွမ် ဢၼ်ပဵၼ်မႄႈလုၵ်ႈဢွၼ်ႇ 3 ၵေႃႉၺႃးသိုၵ်း TNLA ၶဝ်ႈတီႉဢဝ်ၼႂ်းႁိူၼ်းၵႂႃႇ တဵမ် လိူၼ်ဝၼ်းမိူဝ်ႈၼႆႉလႄႈ ၵူၼ်းမိူင်း ၼမ်ႉၶမ်း 2 မိုၼ်ႇပၢႆ ႁူမ်ႈၵၼ် ဢဝ်လၢႆးၵတ်းယဵၼ် ၼႄၵၢင်ၸႂ် တုၵ်းယွၼ်း ႁႂ်ႈပွႆႇတူဝ်ပၼ် ၶၼ်ၶၼ်ဝႆးဝႆး။
မိူဝ်ႈၼႆႉ ဝၼ်းတီႈ 17/09/2018 ယၢမ်းၵၢင်ၼႂ် မွၵ်ႈ 8 မူင်း ၵူၼ်းမိူင်းၼမ်ႉၶမ်း ႁူဝ်ၵူၼ်း 2 မိုၼ်ႇပၢႆ ႁူမ်ႈၵၼ် ပႆ တၢင်းဢွၵ်ႇၼႄၵၢင်ၸႂ် ပၼ်ႇဝဵင်းၼမ်ႉၶမ်း လူၺ်ႈလၢႆးၵတ်းယဵၼ်။ ပိူင်လူင် တုၵ်းယွၼ်းႁႂ်ႈသိုၵ်းတဢၢင်း TNLA ပွႆႇပၼ်တူဝ်ၼၢင်းမူဝ်ႁွမ် ဢၼ်ၶဝ်တီႉၺွပ်းၵႂႃႇ တဵမ် 1 လိူၼ် ၼႂ်းဝၼ်းမိူဝ်ႈၼႆႉ ဝႃႈၼႆ။
ၸၢႆးဢၢႆႈၶိူဝ်း ၽူႈဢွၼ်ႁူဝ် ဢွၵ်ႇၼႄၵၢင်ၸႂ်/ ၵူၼ်းၼုမ်ႇၼမ်ႉၶမ်း လၢတ်ႈဝႃႈ “ ဢမ်ႇဝႃႈၸုမ်းလႂ် မူႇလႂ် ဢၼ် တီႉၺွပ်းၵူၼ်းမိူင်းၵႂႃႇၼၼ်ႉ ႁဝ်းၶႃႈတိုၼ်းသၢၼ်ၶတ်း ၵူႈၸုမ်းၶႃႈယဝ်ႉ။ ၸုမ်းယိပ်းၵွင်ႈၵၢင်ႇဢၼ်ဝႃႈၼၼ်ႉ ပဵၼ် ၸုမ်းဢၼ်ဢဝ်ႁူမ်ႇလူမ်ႈပၼ်ၵူၼ်းမိူင်း။ ယွၼ်ႉၼၼ် ႁဝ်းၶႃႈ ၸင်ႇဢွၼ်ၵၼ် တုၵ်းယွၼ်းသိုၵ်းတဢၢင်း TNLA ႁႂ်ႈပွႆႇတူဝ်ၼၢင်းမူဝ်ႁွမ် ၵူၼ်းမိူင်းၼမ်ႉၶမ်းၽႂ်းၽႂ်း။ တေႃႈလဵဝ် ၵူၼ်းမိူင်းၼမ်ႉၶမ်းႁဝ်းၶႃႈ တင်းမူတ်း ႁူမ်ႈၵၼ်သေ တုၵ်းယွၼ်းႁႂ်ႈပွႆႇတူဝ်။ သင်ဝႃႈ ဢမ်ႇပွႆႇပၼ်ၼၢင်းမူဝ်ႁွမ်ၸိုင် ၵူၼ်းမိူင်းဢၼ်ယူႇသဝ်းၼႂ်းၼမ်ႉၶမ်း မိူၼ်ၸၢဝ်းတႆး၊ ၸၢဝ်းတဢၢင်း လွင်ႈမိုတ်ႈၵိုဝ်းၵၼ်ၼၼ်ႉ ၸၢင်ႈပဵၼ်မႃးလႆႈ လွင်ႈပႅင်းၸင်းတေႃႇၵၼ် လွင်ႈၼႆႉ ပဵၼ်လွင်ႈဢၼ် လီမႆႈၸႂ်ဝႆႉဢၼ်ၼိုင်ႈ။ ယွၼ်ႉၼၼ်ႉ တုၵ်းယွၼ်းႁႂ်ႈပွႆႇတူဝ်မၼ်းၼၢင်းၽႂ်းၽႂ်းသေၵမ်း” ဝႃႈၼႆ။
ၵူၼ်းမိူင်းၼမ်ႉၶမ်း 2 မိုၼ်ႇပၢႆ ဢၼ်ဢွၼ်ၵၼ်ပႆတၢင်းသေ ႁွင်ႉပၢဝ်ႇၼၼ်ႉ “ ဢၼ်သိုၵ်း TNLA တီႉၺွပ်းၼၢင်း မူဝ်ႁွမ်ၵႂႃႇၼၼ်ႉ ႁႂ်ႈပွႆႇပၼ် ႁႂ်ႈပွႆႇပၼ်။ ဢၼ်ဢမ်ႇၶဝ်ႈတၢင်းၵၢၼ် ၵဵပ်းၶွၼ်ႇၼိူဝ်ၵူၼ်းမိူင်းၼၼ်ႉၵေႃႈ ႁႂ်ႈၵိုတ်းပႅတ်ႈ ႁႂ်ႈၵိုတ်းပႅတ်ႈ။ ႁႂ်ႈပၵ်းပိူင်ဝၢၼ်ႈမိူင်းသုမ်ႇငမ်း ၸဵမ်ၸိူဝ်းၼႆႉ ဝႃႈၼႆ။
ၼၢင်းမူဝ်ၶမ်း ၵေႃႉပဵၼ်ပီႈၼၢင်း ၼၢင်းမူဝ်ႁွမ် လၢတ်ႈဝႃႈ “ ယိၼ်းၸူမ်းၶွပ်ႈၸႂ်ထိုင် ၵူၼ်းမိူင်းၼမ်ႉၶမ်း ႁဝ်းၶႃႈ တင်းသဵင်ႈ ဢၼ်ႁူမ်ႈၵၼ် ၸွႆႈထႅမ် တုၵ်းယွၼ်းႁႂ်ႈသိုၵ်းတဢၢင်း TNLA ပွႆႇပၼ်တူဝ် ၼွင်ႉၶႃႈ ႁႂ်ႈပွႆႇပၼ် ၽႂ်းၽႂ်း ၼၼ်ႉ” ဝႃႈၼႆ။
သိုပ်ႇလၢတ်ႈထႅင်ႈဝႃႈ ဝၢႆးသေ ၵူၼ်းၼႂ်းၼႃႈႁိူၼ်းႁဝ်းၶႃႈ လႆႈဢွၼ်ၵၼ်ဢွၵ်ႇၼႄၵၢင်ၸႂ်ယဝ်ႉၼၼ်ႉ တေႃႇထိုင် ယၢမ်းလဵဝ် ႁဝ်းၶႃႈ ဢမ်ႇလႆႈႁပ်ႉငိၼ်းၶၢဝ်ႇလွင်ႈမၼ်းၼၢင်းသင်။ ႁဝ်းၶႃႈတႄႉ ပဵၼ်ဢၼ်မႆႈၸႂ်တႃႇမၼ်း ၼၢင်းတႄႉ တႄႉ။ မႆႈၸႂ်လွင်ႈပၢႆးယူႇလီမၼ်းၼၢင်း လွင်ႈႁူမ်ႇလူမ်ႈ ၸဵမ်ၸိူဝ်းၼႆႉ။ လုၵ်ႈဢွၼ်ႇမၼ်းၼၢင်းၵေႃႈ တိုၵ်ႉၵေႃႉလဵၵ်ႉ ယူႇ။ တွၼ်ႈတႃႇတေလဵင်ႉလူ တူၺ်းထိုင်လုၵ်ႈဢွၼ်ႇၼၼ်ႉ မႄႈၼႆႉတိုၼ်းလူဝ်ႇတူၺ်းပၼ်ၶႃႈယဝ်ႉ။ ယွၼ်ႉၼၼ် တုၵ်းယွၼ်းႁႂ်ႈပွႆႇပၼ်မၼ်းၼၢင်းၶိုၼ်းၽႂ်းၽႂ်းသေၵမ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 07/09/2018 ပူၼ်ႉမႃးၼႆႉၵေႃႈ ယူႇတီႈၵူၼ်းႁိူၼ်းၵူၼ်းယေး ၼၢင်းမူဝ်ႁွမ် ဝဵင်း ၼမ်ႉၶမ်းသေ ၼႄၵၢင်ၸႂ် တုၵ်းယွၼ်းႁႂ်ႈပွႆႇပၼ်ၼၢင်းမူဝ်ႁွမ် ဝႃႈၼႆ။
မိူဝ်ႈဝၼ်းတီႈ 17/08/2018 ယၢမ်းၵၢင်ၼႂ်ၼၼ်ႉ ၵူၼ်းသိုၵ်းတဢၢင်း TNLA ႁႃႈၵေႃႉ ပႃးၵွင်ႈၸေးမိုဝ်း ၶဝ်ႈတီႉဢဝ် တူဝ်ၼၢင်းမူဝ်ႁွမ်ၵႂႃႇ တေႃႇ ထိုင်ယၢမ်းလဵဝ် ပႆႇပွႆႇပၼ်မႃး တေႃႇဝၼ်းမိူဝ်ႈၼႆႉ မီးလိူၼ်ယဝ်ႉ ဝႃႈၼႆ။
ၼၢင်းမူဝ်ႁွမ်ၼႆႉ မီးလုၵ်ႈ 3 ၵေႃႉ၊ ပဵၼ်ၵူၼ်းႁႃၵိၼ်လဵင်ႉတွင်ႉသိုဝ်ႈယူဝ်း “မိူဝ်ႈပီ 2016 သိုၵ်း TNLA မႃးၵဵပ်းၶွၼ်ႇ ၵႂႃႇ 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်းငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင်ၵေႃႉ ၺႃးသိုၵ်းမၢၼ်ႈ မူၵ်းယိုဝ်းၸွမ်းတၢင်းတၢႆၵေႃႉၼိုင်ႈ၊ တီႉလႆႈတူဝ်လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်းၾူၼ်းလၢတ်ႈဝၼ်းၼၼ်ႉၵမ်းလဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်ၵူၺ်းသေ ႁဝ်းဢမ်ႇဢဝ်သၢႆၸႂ်ႁဝ်းလႅၵ်ႈ သေပွင်ႇၶၢဝ်ႇလေႃႇ ႁဝ်းဢမ်ႇၸႂ်ႈၵူၼ်းဢဝ်ၶၢဝ်ႇပွင်ႇၶၢဝ်ႇပၼ်ၽႂ် – ဝႃႈၼႆ။
