ၵူၼ်းမိူင်းၼမ်ႉၶမ်း ႁူမ်ႈၵၼ်တုၵ်းယွၼ်း ႁႂ်ႈလႆႈၸႂ်ႉၶိုၼ်း ၸိုဝ်ႈပွၵ်ႉယွမ်ႇမိူၼ်ၼင်ႇမိူဝ်ႈၵဝ်ႇၶိုၼ်း ဝႃႈၼႆ။
ဝၼ်းတီႈ 28/06/2018 ၵူၼ်းမိူင်းၼမ်ႉၶမ်း ၼပ်ႉႁူဝ်ႁဵင် ႁူမ်ႈၵၼ်သေ ၵဵပ်းသဵၼ်ႈၸိုဝ်ႈ၊ လူင်းလၢႆးမိုဝ်း တီႈႁူင်းႁေႃ သိူဝ်ၽိူၵ်ႇ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ တုၵ်းယွၼ်းၸိုဝ်ႈပွၵ်ႉ ဢၼ်သႂ်ႇဝႆႉၸွမ်းမၢႆၼပ်ႉၼၼ်ႉ ႁႂ်ႈလႅၵ်ႈ လၢႆႈ ပိၼ်ႇၶိုၼ်းၸိုဝ်ႈပွၵ်ႉ မိူၼ်ၼင်ႇ ဢၼ်ယၢမ်ႈႁွင်ႉမႃး မိူဝ်ႈၵူႈပွၵ်ႈၼၼ်ႉ ဝႃႈၼႆ။
ၸၢႆးၵမ်ႇ ၵူၼ်းပွၵ်ႉမၢၼ်ႈၶမ်း လၢတ်ႈတီႈၽူႈတွႆႇႁွၵ်ႈဝႃႈ “ ယၢမ်းလဵဝ်ၼႆႉ ၸိုဝ်ႈပွၵ်ႉသႂ်ႇဝႆႉမၢႆၼပ်ႉၵူၺ်း။ ပွၵ်ႉ 1 ၊ ပွၵ်ႉ 2 ၸိူင်ႉၼႆ။ မိူဝ်ႈၵူႈပွၵ်ႈ ၸိုဝ်ႈပွၵ်ႉယွမ်ႇၼႂ်းၸႄႈဝဵင်းၼမ်ႉၶမ်းၼႆႉ မီးၸိုဝ်ႈဝႆႉၵူႈပွၵ်ႉ။ ယွၼ်ႉၼၼ်ယူႇတီႈၵူၼ်းၼႂ်း ပွၵ်ႉသေ တုၵ်းယွၼ်းႁႂ်ႈလႅၵ်ႈလၢႆႈပိၼ်ႇပၼ်ၶိုၼ်း ႁႂ်ႈလႆႈသႂ်ႇၸိုဝ်ႈပွၵ်ႉ ပၼ်ၶိုၼ်းမိူၼ်ၵဝ်ႇတင်းမူတ်း” ဝႃႈၼႆ။
တေႃႈလဵဝ် ၵူၼ်းမိူင်း 14 ပွၵ်ႉ ၼႂ်းၸႄႈဝဵင်းၼမ်ႉၶမ်းၼႆႉ ႁူမ်ႈၵၼ် လူင်းလၢႆးမိုဝ်းသေ တေတၢင်ႇ ထိုင်ၼႂ်းသၽႃး ဝႃႈၼႆ။
ၸၢႆးၵမ်ႇ သိုပ်ႇလၢတ်ႈဝႃႈ “ မိူဝ်ႈၵူႈပွၵ်ႈ ပွၵ်ႉ 1 တင်း ပွၵ်ႉ 2 ၼႆႉႁူမ်ႈၵၼ်ဝႆႉ။ ယွၼ်ႉဝႃႈ ၽူႈၵွၼ်းပွၵ်ႉၶဝ် မီးပၼ် ႁႃၵၼ်လွင်ႈၸုမ်ႈ(မိၵ်ႈမၢႆ) ။ လွင်ႈၼႆႉ သင်ပွၵ်ႉၽႂ်ယႂ်ႇၵေႃႈ ၵေႃႉၼၼ်ႉၵူၺ်းလႆႈၸႂ်ႉတိုဝ်းၵႂႃႇ။ လိူဝ်ၼၼ်ႉ သင်ဝႃႈ ၵူၼ်းမိူင်းၵႂႃႇယွၼ်းဝႂ်ႁပ်ႉႁွင်းၸိုင် ၺႃးမိူဝ်ႈၽူႈၵွၼ်းပွၵ်ႉဢွၵ်ႇတၢင်း ၵူၼ်းမိူင်းႁူပ်ႉလွင်ႈယၢပ်ႇၽိုတ်ႇ မႃးတႃႇသေႇ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ယူႇတီႈၽူႈတႅၼ်းသၽႃးၵူၼ်းမိူင်း ဢူးထုၼ်းၵျေႃႇၵေႃႈ ယၢမ်ႈလႆႈဢဝ်တၢင်ႇၼႂ်းသၽႃး ပွၵ်ႈၵမ်း 2 ၵမ်းထူၼ်ႈ 7 မိူဝ်ႈဝၼ်းတီႈ 5 လိူၼ်မၢတ်ႊၶျ်ပူၼ်ႉမႃးၼၼ်ႉ ဝႃႈၼႆ။
21 ပွၵ်ႉ ဢၼ်ၵူၼ်းမိူင်းတုၵ်းယွၼ်းႁႂ်ႈသႂ်ႇၶိုၼ်းၸိုဝ်ႈၼၼ်ႉ မိူၼ်ၼင်ႇ 1) ပွၵ်ႉၼွင်ၸၢင်ႉ၊ 2) ပွၵ်ႉႁူဝ်ၵၢတ်ႇ၊ 3) ၸရေးတၢၼ်း၊ 4) ပွၵ်ႉၵွင်းၼွင်၊ 5) ပွၵ်ႉမူဝ်ၶမ်း၊ 6) ပွၵ်ႉတႅၼ်ႈမႃႉ၊ 7) ပွၵ်ႉၼိူဝ်၊ 8) ပွၵ်ႉလူင်၊ 9) ပွၵ်ႉႁူဝ်ၼွင်၊ 10) ပွၵ်ႉတႂ်ႈ၊ 11) ပွၵ်ႉၼမ်ႉၶမ်းၽွင်၊ 12) ပွၵ်ႉၵုင်းၵလႃး၊ 13) ပွၵ်ႉမၢၼ်ႈၼႃး၊ 14) ၵွင်းသႃႇ၊ 15) ပွၵ်ႉဝဵင်းသႃႇ၊ 16) ပွၵ်ႉၵွင်းၼွင်ၸၢင်ႉ၊ 17) ပွၵ်ႉမၢၼ်ႈၶမ်း၊ 18) ပွၵ်ႉဢွင်ႇမင်ၵလႃႇ၊ 19) ပွၵ်ႉဢွင်ႇၶျၢမ်းသႃႇ၊ 20) ပွၵ်ႉဢွင်ႇမဵတ်ႉတႃႇ လႄႈ 21) ပွၵ်ႉၵွင်းတပ်ႉ ၸိူဝ်းၼႆႉ ဝႃႈၼႆ။
