ၵူၼ်းဝၢၼ်ႈၵူၼ်းသူၼ် ၸိူဝ်းပၢႆႈၽေးသိုၵ်း မႃးသွၼ်ႈဝႆႉတီႈဢိူင်ႇတႃႈတေႈ ၸႄႈဝဵင်းသီႇပေႃႉၼၼ်ႉ ပွၵ်ႈမိူဝ်းၵႂႃႇၶိုင်ႈ ပၢႆၼႆသေတႃႉ ယင်းပႆႇၸၢင်ႈမိူဝ်းမူတ်း။

ဝၼ်းတီႈ 12/09/2018 ယၢမ်းဝၢႆးဝၼ်း မွၵ်ႈ 2:30 မူင်းၼၼ်ႉ ၵူၼ်းဝၢၼ်ႈၼမ်ႉၵႅင်း 34 ၵေႃႉ ၶိုၼ်းဢွၼ်ၵၼ်ပွၵ်ႈ ၶိုၼ်းႁိူၼ်းယေးၽႂ်မၼ်း။ ၵူၺ်းၵႃႈ ဢၼ်ၵိုတ်းတီႈၼႂ်းဢိူင်ႇတႃႈတေႈ 30 ၵေႃႉ ယင်းပႆႇၸၢင်ႈပွၵ်ႈတိုၵ်ႉယူႇသဝ်းဝႆႉ တီႈ ဝတ်ႉ တႃႈတေႈ ၸႄႈဝဵင်းသီႇ ပေႃႉယူႇ ဝႃႈၼႆ။

လုင်းၸၢႆးမျၢတ်ႇဢွင်ႇ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈၼမ်ႉ ၵႅင်း ဢၼ်ပၢႆႈမႃးသွၼ်ႈဝႆႉတီႈ ဢိူင်ႇတႃႈတေႈၼၼ်ႉ ၵူၼ်းပၢႆႈၽေးၶဝ်ဝႃႈ တေဢမ်ႇပွၵ်ႈမိူဝ်းယဝ်ႉ ပွၵ်းမိူဝ်းၵႂႃႇၵေႃႈ ဢမ်ႇမီးလွင်ႈႁူမ်ႇလူမ်ႈ မၼ်းတုၵ်ႉၶၼႅၼ်ႇ ဝႃႈၼႆ။ လွင်ႈၼႆႉ ၵူၼ်းလူင်ဢိူင်ႇဝၢၼ်ႈ တိုၵ်ႉဢုပ်ႇ ဢူဝ်းၵၼ်ယူႇ။ လႆႈငိၼ်းဝႆႉတႄႉ တေႁဵတ်းဝၢၼ်ႈမႂ်ႇပၼ် တၢင်းၾၢႆႇႁွင်ႇဝၢၼ်ႈတႃႈတေႈ။ လွင်ႈၼႆႉ ပႆႇတႅပ်းတတ်း ၼင်ႇၵဝ်ႇ တိုၵ်ႉတေဢုပ်ႇ ဢူဝ်းၵၼ်ထႅင်ႈယူႇ” ဝႃႈၼႆ။

တေႃႈလဵဝ် ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉတီႈၼႂ်းဢိူင်ႇတႃႈတေႈ ၸႄႈဝဵင်းသီႇပေႃႉသမ်ႉ လင်ႁိူၼ်း 7 လင်၊ ၸၢႆး 13 ၵေႃႉ၊ ယိင်း 17 ၵေႃႉ ႁူမ်ႈၵၼ် 30 ၵေႃႉ၊ ၵူၼ်းဝၢၼ်ႈၼမ်ႉၵႅင်းၼႆႉ ယူႇၼႂ်းၸႄႈဝဵင်းၼမ်ႉတူႈ ၵမ်ႈၼမ် ပဵၼ် ၸၢဝ်းလီးသူး ဝႃႈၼႆ။

မိူဝ်ႈႁူဝ်လိူၼ် သႅပ်ႊထႅမ်ႊၿိူဝ်ႊ 2018 ၼႆႉ ယွၼ်ႉသိုၵ်းဢူၺ်းလီ ပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်း ၵၼ် ႁၢဝ်ႈႁႅင်း ၵူၼ်းမိူင်း ၼႂ်းၸႄႈဝဵင်းၼမ်ႉတူႈ ၼပ်ႉႁူဝ်ႁဵင် လႆႈဢွၼ်ၵၼ်ပၢႆႈၽေးသိုၵ်း ဝႃႈၼႆ။