ႁူဝ်ၼႃႈ ၸုမ်းပီႇတူႉၸိတ်ႉမၢၵ်ႇၵႅင်း ႁပ်ႉႁဵတ်းႁူဝ်ပဝ်ႈၵေႃပွင်ပဵၼ်ပၢင်ပွႆးပီမႂ်ႇတႆး ဝဵင်းတူၼ်ႈတီး

ၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈဝဵင်းတူၼ်ႈတီး 28 ၸုမ်း ႁူမ်ႈၵၼ်ဢုပ်ႇဢူဝ်းၵၼ် ယုၵ်ႉဢဝ်ႁူဝ်ၼႃႈၸုမ်းပီႇ တူႉၸိတ်ႉမၢၵ်ႇၵႅင်း(ထုင်ႉပၢင်ႇလႅင်းသႂ်) ၶိုၼ်ႈပဵၼ်ႁူဝ်ပဝ်ႈ ပွင်ပဵၼ်ပၢင်ပွႆး ပီမႂ်ႇတႆး 2113 ၼီႈ ဝႃႈၼႆ။

ဝၼ်းတီႈ 08/09/2018 ယၢမ်းဝၢႆးဝၼ်း 1 မူင်း ၸုမ်းတူင်ႉၼိုင်တူင်ႇဝူင်းတႆး 28 ၸုမ်း ႁူပ်ႉထူပ်းဢုပ်ႇဢူဝ်းၵၼ် လွင်ႈႁၢင်ႈ ႁႅၼ်းဝၢင်းၽႅၼ် ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ ဢၼ်တေထိုင်ၼႆႉ။ ပၢင်ႁူပ်ႉထူပ်းၼႆႉ ၸတ်းႁဵတ်း တီႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ မီးတူဝ်တႅၼ်းၸုမ်း တူင်ႉၼိုင်တူင်ႇဝူင်းတႆး ၶဝ်ႈႁူမ်ႈ 48 ၵေႃႉ ႁူမ်ႈၵၼ်လႆႈၸႂ်ယုၵ်ႉဢဝ်ၸဝ်ႈၸၢႆးလူႇ(ႁွင်ႉ) ၸဝ်ႈလႅင်းသႂ် ႁူဝ်ၼႃႈ ၸုမ်းပီႇတူႉၸိတ်ႉမၢၵ်ႇၵႅင်း (ထုင်ႉပၢင်ႇလႅင်းသႂ်) ၶိုၼ်ႈပဵၼ်ႁူဝ်ပဝ်ႈ ၵေႃပွင်ပဵၼ်ပၢင်ပွႆး ဝႃႈၼႆ။

ၼၢင်းၼူၼ်းမူဝ် ၽူႈပွင်ၵၢၼ်ၼႂ်းၶွမ်ႊမတီႊပွင်ပဵၼ်ပၢင်ပွႆး ပီမႂ်ႇတႆး 2113 ၼီႈ လၢတ်ႈတီႈၽူႈတွႆႇႁွၵ်ႈဝႃႈ “ ၸုမ်း တူင်ႉၼိုင်တူင်ႇဝူင်းတႆးႁဝ်း 28 ၸုမ်း ႁူမ်ႈၵၼ်သေ တႅပ်းတတ်း ယုၵ်ႉဢဝ် ၸဝ်ႈသိုၵ်းလူင် ၸဝ်ႈလႅင်းသႂ် (ထုင်ႉ ပၢင်ႇလႅင်းသႂ်) ၶိုၼ်ႈပဵၼ်ႁူဝ်ပဝ်ႈ ၶွမ်ႊမတီႊပွင်ပဵၼ်ပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ ဢၼ်တေ ထိုင်ၼႆႉ” ဝႃႈၼႆ။

ပၢင်ၵုမ်ၼၼ်ႉ လႆႈဢုပ်ႇဢူဝ်း တႅပ်းတတ်း ဝၼ်းပွႆး၊ ဢွင်ႈတီႈ၊ ၶၢဝ်းယၢမ်း လႄႈ ၵေႃၽႄၶွမ်ႊမတီႊထႅင်ႈ 5 ႁူဝ်ၶေႃႈ မိူၼ်ၼင်ႇ ၵေႃၽႄႁၢင်ႈႁႅၼ်းပၢင်ပွႆးလႄႈႁူမ်ႇလူမ်ႈ၊ ၵေႃၽႄႁပ်ႉ ၶႅၵ်ႇလႄႈ လဵင်ႉလူ၊ ၵေႃၽႄ ငိုၼ်းၵွင်ၵၢင်၊ ၵေႃၽႄလူႇတၢၼ်းလႄႈ ၵေႃၽႄ လိၵ်ႈလၢႆးလႄႈၾၢႆႇမူၼ်ႈသိူဝ်း ၸိူဝ်းၼႆႉ။
ၶွမ်ႊမတီႊပွင်ပဵၼ်ပၢင်ပွႆး ႁူမ်ၸူမ်းပီမႂ်ႇတႆး 2113 ၼီႈသမ်ႉ တင်းမူတ်း ပီၼႆႉ မီး 17 ၵေႃႉ ဝႃႈၼႆ။

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ ဢၼ်တေၸတ်းႁဵတ်းတီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼႆႉ တေၸတ်းႁဵတ်း ၼႂ်းဝၼ်းတီႈ 6-7-8/12/2018 တီႈဝၢင်းႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ဝႃႈၼႆ။