ၸွမ်ႁၢၼ်ၸေႃႇမိၼ်းထုၼ်း ၽူႈၶၢၼ်ပၢၵ်ႇႁွင်ႈၵၢၼ်ၾၢႆႇပွင်ႇၶၢဝ်ႇသိုၵ်းမၢၼ်ႈ ၺႃးသိုၵ်းမၢၼ်ႈၶိုၼ်းႁွင်ႉထတ်းလွင်ႈ တီႈလိၼ် – ၵၢၼ်သူင်ႇၶၢႆ/ ႁပ်ႉသိုဝ်ႉ(Tender)- လႄႈလွင်ႈသုၼ်ႇၵၢၼ်သိုဝ်ႉၶၢႆ (Permit)ၸိူဝ်းၼႆႉဝႃႈၼႆ။

လွင်ႈၼႆႉတီႈသိုဝ်ႇၶၢဝ်ႇ ၻီႊဝီႊပီႊ ဢွၵ်ႇဝႆႉဝႃႈ – ၵူၼ်းၸမ်ၸႂ်ၼႂ်းတပ်ႉသိုၵ်းလၢတ်ႈဝႃႈ မၼ်းၸၢႆးထုၵ်ႇႁွင်ႉထတ်းလွင်ႈ ၵၢၼ်ၵိၼ်သူးၵိၼ် လၢပ်ႈၼႂ်းၵၢၼ်သူင်ႇၶၢႆ ၵၢၼ်ႁပ်ႉသိုဝ်ႉတႃႇၵေႃႇသၢင်ႈႁွင်ႈၵၢၼ်ၾၢႆႇပွင်ႇၶၢဝ်ႇ၊ လွင်ႈၵိၼ်သူးၵိၼ်လၢပ်ႈ ၼႂ်းၵၢၼ် ပၼ်သုၼ်ႇသိုဝ်ႉၶၢႆ တီႈလိၼ် ၼႂ်းတပ်ႉၽႄၾၢႆႇၵပ်းသၢၼ် ၸိူဝ်းၼႆႉ- ဝႃႈၼႆ။

ၸွမ်ႁၢၼ်ၸေႃႇမိၼ်းထုၼ်းၼႆႉ တင်ႈတႄႇသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး သိုၵ်းမၢၼ်ႈပၼ်ဝႆႉပုၼ်ႈၽွၼ်း မၼ်းၸၢႆးတီႈႁွင်ႈၵၢၼ် ၾၢႆႇပွင်ႇၶၢဝ်ႇလႄႈ ၽူႈၸီႉသင်ႇပၢႆးတိုၵ်းပၢႆးၸႂ်။ ၵူၺ်းၵႃႈတင်ႈတႄႇ ႁၢင်လိူၼ်မၢတ်ႉၶျ် ႁူဝ်ပီ 2026 ၼႆႉ ၺႃးသိုၵ်းမၢၼ်ႈ ပူတ်းၸၼ်ႉတၼ်းႁဵင်းပၢၵ်ႈဢွၵ်ႇတူင်ႇဝူင်းဝႆႉသေ ထိုင်မႃးၼႂ်းႁူဝ်လိူၼ်ဢေႊပရိူဝ်ႊလ်ၼႆႉ ၺႃးႁွင်ႉထတ်းထၢမ်လွင်ႈတၢင်းၽိတ်း လွင်ႈၵိၼ်သူးၵိၼ်လၢပ်ႈ။ ၼႃႈတီႈပုၼ်ႈၽွၼ်းၸွမ်ႁၢၼ်ၸေႃႇမိၼ်းထုၼ်းၼၼ်ႉတႄႉ သိုၵ်းမၢၼ်ႈဢဝ် ၵႅမ်ၸွမ်ႁၢၼ်ယႄးယိၼ်ႉဢွင်ႇမႃးပုတ်ႈတႅၼ်းတၢင်ဝႆႉ လႆႈႁူႉၼင်ႇၼႆ။

ၵူၼ်းၼႂ်းတူင်ႇဝူင်းႁွင်ႈၵၢၼ်ပွႆႇငဝ်းႁၢင်ႈသဵင်မျႃႉဝတီႇတႄႉလၢတ်ႈဝႃႈ – ၸွမ်ႁၢၼ်ၸေႃႇမိၼ်းထုၼ်းၼႆႉယၢမ်းလဵဝ် ၸဵမ်ၼႂ်းတပ်ႉသိုၵ်းလႄႈ တၢင်းၾၢႆႇၵူၼ်းမိူင်းၼႆႉ ဢမ်ႇမီးပုၼ်ႈၽွၼ်းသင်ယဝ်ႉ။ ၵူၺ်းၵႃႈမီးၶၢဝ်ႇလိုဝ်းဝႆႉဝႃႈ ပေႃးမီးလူင်ပွင်ၸိုင်ႈမႂ်ႇမႃး တေၸၢင်ႈပဵၼ်ၵႅမ်ၽွင်းလူင်ၾၢႆႇပွင်ႇၶၢဝ်ႇ – ဝႃႈၼႆဝႆႉသေတႃႉ တေႃႇထိုင်ယၢမ်းလဵဝ် ပႆႇႁၼ်ၶၢဝ်ႇသင်ၶိုၼ်ႈမႃး။ ၵူၺ်းၵႃႈ ဝၢႆးလင်ပိုၼ်ၽၢဝ်ႇၸိုဝ်ႈၸွမ်ၸိုင်ႈလႄႈ ၸုမ်းလူင်ပွင်ၸိုင်ႈမႂ်ႇယဝ်ႉ သင်ဝႃႈဢမ်ႇပႃးၸိုဝ်ႈမၼ်းၸၢႆးမႃးၵေႃႈ လႅပ်ႈတေထုၵ်ႇပူတ်းပၢၵ်ႈတႄႉယဝ်ႉ- ဝႃႈၼႆ။

ၸွမ်ႁၢၼ်ၸေႃႇမိၼ်းထုၼ်းၼႆႉ ႁၢႆၼႃႈႁၢႆတႃၵႂႃႇ ဝၢႆးလင်ဝၼ်းတီႈ 23/03/2026 ၶၢဝ်ႇပၢႆးယူႇလီ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ဢွၵ်ႇၽႄႈလၢမ်းၸွမ်းသိုဝ်ႇၼႅင်ႈသၢၼ်မႃး။

ၶၢဝ်ႇၼႂ်းတူင်ႇဝူင်းတပ်ႉသိုၵ်းဝႃႈမၼ်းၸၢႆးၺႃးမၢပ်ႇမႂ်ယွၼ်ႉၽႄႈၶၢဝ်ႇပၢႆးယူႇလီၸွမ်ၸိၵ်းသိုၵ်းၼႆသေ လုမ်းတြႃးသိုၵ်းႁွင်ႉထတ်းမိူဝ်ႈဝၼ်းတီႈ 25/03/2026 ဝႃႈၼႆ။

ၸွမ်ႁၢၼ်ၸေႃႇမိၼ်းထုၼ်းၼႆႉ ပဵၼ်လုၵ်ႈႁဵၼ်းတီႈၸၼ်ႉၸွမ်သိုၵ်း DSA ၸုပ်ႈ 37။ သိုဝ်ႇၶၢဝ်ႇမၢၼ်ႈလၢႆလၢႆဢၼ်တႄႉဢွၵ်ႇဝႆႉဝႃႈမၼ်းၸၢႆးပဵၼ်ၵူၼ်းၼပ်ႉယမ်ၸမ်ၸႂ်ၵၼ်တင်း ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ။ ပဵၼ်ၵူၼ်းဢၼ်ၸွမ်ၸိၵ်းသိုၵ်းမၢၼ်ႈယုမ်ႇၸႂ် ၸႂ်ႉၵၢၼ်မႃးၵေႃႉၼိုင်ႈ။ ၸင်ႇဝႃႈ ထုၵ်ႇယုၵ်ႉယွင်ႈပၼ်တီႈယူႇ ၽူႈၶၢၼ်ပၢၵ်ႇၾၢႆႇပွင်ႇၶၢဝ်ႇတပ်ႉသိုၵ်းမႃး။ ၽိူဝ်ႇသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းယဝ်ႉ ၶိုၼ်းထုၵ်ႇယုၵ်ႉယွင်ႈၶိုၼ်ႈပဵၼ်ၵႅမ်ၽွင်းလူင်ၾၢႆႇပွင်ႇၶၢဝ်ႇတပ်ႉသိုၵ်း လႄႈပဵၼ်ပႃးၽူႈၶၢၼ်ပၢၵ်ႇၶွင်ႇသီႇသိုၵ်းမၢၼ်ႈဝႆႉ။

ၶေႃႈမုလ်းၶၢဝ်ႇ- ၻီႊဝီႊပီႊ