တႄႇႁူဝ်လိူၼ်မၢတ်ႉၶျ် ပီ 2026 ၼႆႉမႃး ၵူၼ်းမိူင်းတႆး လႄႈ မိူင်းမၢၼ်ႈထုင်ႉပဵင်း လႆႈထူပ်းပၼ်ႁႃ ၼမ်ႉမၼ်းၸိူဝ်ႉၾႆး ဢမ်ႇၵုမ်ႇထူၼ်ႈ ၊ ႁၢၼ်ႉမၢင်တီႈပိုတ်ႇၶၢႆပၼ်ၼမ်ႉမၼ်းယူႇသေတႃႉ ယုၵ်ႉဝႆႉ ၶၼ်ၼမ်ႉမၼ်းသုင်ႁႅင်း ႁဵတ်းႁႂ်ႈၸဝ်ႈသူၼ်ၶဝ်ႈၵၢပ်ႇလႆႈၸႂ်ႉတိုၼ်းလၢင်းၼမ် ၶၢႆသမ်ႉဢမ်ႇလႆႈ ၵႃႈၶၼ်သုင် ။

ယၢမ်းလဵဝ် ၵူၼ်းၽုၵ်ႇၶဝ်ႈၵၢပ်ႇ ၼႂ်းၸႄႈဝဵင်းၵုၼ်ႁဵင် လႄႈ ၸႄႈဝဵင်းၼမ်ႉၸၢင် ၸိုင်ႈတႆး ပွတ်း ၸၢၼ်း ပဵၼ်ၽွင်း ဢဝ်ၶဝ်ႈၵၢပ်ႇၶၢႆ ။ ယွၼ်ႉၼမ်ႉမၼ်းၸိူဝ်ႉၾႆးပုင်ႈၶိုၼ်ႈသုင်လႄႈ  ၸဝ်ႈသူၼ် ၶဝ်ႈၵၢပ်ႇ ၼႅတ်ႈဢဝ်ၶဝ်ႈၵၢပ်ႇဢွၵ်ႇၶၢႆ ၵႃႈထုၵ်ႇၵႃႈပေႃး  ။

ယၢမ်းလဵဝ် တီႈၸႄႈဝဵင်းၼမ်ႉၸၢင် ၼမ်ႉမၼ်းၸၢၵ်ႈ (ထၢတ်ႈသီႇ) ၼိုင်ႈလိတ်ႉ/လီႇတႃႇလႂ် မီးမွၵ်ႈ 7,000-8,000 ပျႃး၊ မၢင်တီႈမၢင်ၸႄႈဝဵင်း ၵႃႈၶၼ်သုင်လိူဝ်ၼၼ်ႉ သွင်ပုၼ်ႈ ၼိုင်ႈလိတ်ႉ /လီႇတႃႇ မီးမွၵ်ႈ 12,000 ပျႃး ။ ၶႂ်ႈသိုဝ်ႉၼမ်ၵေႃႈ ဢမ်ႇလႆႈ၊ သိုဝ်ႉလႆႈ ၸွမ်းၼင်ႇပၢမ်ႉၼမ်ႉမၼ်း ၶဝ် မၵ်းတတ်းၶၢႆပၼ်ၼၼ်ႉၵူၺ်း ။  

ၸဝ်ႈသူၼ်ၶဝ်ႈၵၢပ်ႇၼႂ်းၸႄႈဝဵင်းၵုၼ်ႁဵင်လၢတ်ႈၽူႈတွႆႇႁွၵ်ႈဝႃႈ -“ ၸဝ်ႈသူၼ်ၶဝ်ႈၵၢပ်ႇၵမ်ႈၼမ် ပႆႇလႆႈၶၢႆၶဝ်ႈၵၢပ်ႇ ၊ တလဵဝ် ၼမ်ႉမၼ်းၵႃႈယႂ်ႇ တႃႇဢိတ်ႇဢွၵ်ႇၼႆႉသမ်ႉၼမ်ႉမၼ်းသိုဝ်ႉယၢပ်ႇ ၊ ပေႃးၶၢႆၶဝ်ႈၵၢပ်ႇသမ်ႉ ဢမ်ႇလႆႈၶၼ်မၼ်း ။  မိူဝ်ႈဢွၼ်တၢင်းၶၼ်ၶဝ်ႈၵၢပ်ႇ ၼိုင်ႈၸွႆႉလႆႈ 1,400 ပျႃးသေတႃႉ ၵမ်းၼႆႉ 700-800 ၵူၺ်းယဝ်ႉ ၼႆႉတင်းၽႂ်ၵေႃႈ ဢမ်ႇႁပ်ႉသိုဝ်ႉ”- ဝႃႈၼႆ ။

ယၢမ်းလဵဝ် ၼႂ်းမိူင်းတႆး လၢႆၸႄႈဝဵင်း ပဵၼ်ၶၢဝ်းၸဝ်ႈသူၼ်ၶဝ် ဢဝ်ၶဝ်ႈၵၢပ်ႇၼႂ်းသူၼ်ၼႂ်းႁႆႈ တေႃႉသူင်ႇၶၢႆလႄႈ  ၼႂ်းလိူၼ်မတ်ႉၶျ်ၼႆႉ ၶၼ်ၶဝ်ႈၵၢပ်ႇ လႆႈၶၢႆၼိုင်ႈၸွႆႉ 700 ထိုင် 800 ပျႃး ။

တႃႇတေၽုၵ်ႇသွမ်ႈၶဝ်ႈၵၢပ်ႇၼႆႉ ယွၼ်ႉလႆႈလူင်းတိုၼ်းလၢင်းၼမ်လႄႈ ပုၼ်ႈတႃႇၸဝ်ႈသူၼ်ဢမ်ႇလႆႈ   ၼမ်ႉတွၼ်းသင် ႁဵတ်းႁႂ်ႈ ၵူၼ်းၽုၵ်ႇၶဝ်ႈၵၢပ်ႇ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ ဝႃႈၼႆ ။

ၸဝ်ႈသူၼ်ၶဝ်ႈၵၢပ်ႇဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ -“ ပေႃးဢမ်ႇဢဝ်တလဵဝ် ၊ ဢမ်ႇၶၢႆတလဵဝ်ၵေႃႈ ပေႃးဝၢႆးၼႆႉမႃး ၵူဝ်ဢမ်ႇမီးၼမ်ႉမၼ်း ၊ ပေႃးၼမ်ႉမၼ်းဢမ်ႇမီး ဢမ်ႇၸၢင်ႈၶိုတ်ႈၸၢင်ႈလူၺ်ႇၶႃႈလူင် ၊ ယွၼ်ႉၼၼ်လႄႈ ၵႃႈလႆႈၵဵပ်းၶၢႆၵမ်းလဵဝ်”- ဝႃႈၼႆ ။

တႄႇႁူဝ်လိူၼ် မတ်ၶျ်ႉၼႆႉ ၼႆႉမႃး ယွၼ်ႉၼမ်ႉမၼ်းၸိူဝ်ႉၾႆး ႁႃသိုဝ်ႉယၢပ်ႇ ၵႃႈၶၼ်ပုင်ႈၶိုၼ်ႈသုင်ႁႅင်း  မိူၼ်ၼင်ႇ ၶၼ်ၵုၼ်ႇၼႂ်းမိူင်းတႆးပွတ်းၸၢၼ်းလၢႆလၢႆ ဝဵင်းပုင်ႈၶိုၼ်ႈၸွမ်း ၵူၼ်းမိူင်းယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ  ။

ၸဝ်ႈႁၢၼ်ႉၶၢႆၶဝ်ႈၽၵ်းဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ၼမ်ႉမၼ်းၵေႃႈၵႃႈႁႅင်း ၊ ၶၼ်ၶူဝ်းၵုၼ်ႇၸိူဝ်းၼႆႉၵေႃႈၵႃႈၶိုၼ်ႈၸွမ်း  ၊ ယွၼ်ႉၵုၼ်ႇၵႃႈႁႅင်းလႄႈ ၶဝ်ႈၽၵ်းၸိူဝ်းၼႆႉၵေႃႈလႆႈၶိုၼ်ႈၵႃႈမၼ်း ၶဝ်ႈၶူဝ်ႈဢွၼ်တၢင်းဝၢၼ်ႇ 3,500 ၼၼ်ႉ တလဵဝ် လႆႈၶၢႆ 5,000 ၊ ဢမ်ႇၸၢင်ႈႁဵတ်းႁိုဝ် ၊ ၵူၼ်းၵႂႃႇမႃး ၵူၼ်းမႃးဝႄႉၵိၼ်ၶဝ်ႈၵေႃႈဢႄႇၼႃႈ ဢမ်ႇၶၢႆလီ”- ဝႃႈၼႆ ။

ဢိင်ၼိူဝ်ၶၼ်ၼမ်ႉမၼ်းၸိူဝ်ႉၾႆးၵႃႈၶၼ်သုင် ႁႃသိုဝ်ႉယၢပ်ႇမႃးသေ ၶၼ်ၵုၼ်ႇၵူႈသႅၼ်းသႅၼ်း ၊ ၵႃႈၵႃး ၸိူဝ်းၼႆႉပုင်ႈၶိုၼ်ႈသူင်ႇၸွမ်းသေဢမ်ႇၵႃး ၊ သၢႆၵၢၼ်မိၼ်လၢႆလၢႆဢၼ်ၼႂ်းမိူင်းမၢၼ်ႈ လႆႈၵိုတ်းလိုဝ်ႈဝႆႉ- ႁၢၼ်ႉၶၢႆဝႂ်ၶိူင်ႈမိၼ်မၢင်ႁၢၼ်ႉၼႆႉ တႄႇပၼ်ၶိုၼ်းငိုၼ်းၵႃႈဝႂ်ၶိူင်ႈမိၼ်ဢၼ်ပိူၼ်ႈမႃးသိုဝ်ႉဝႆႉၸိူဝ်းၼၼ်ႉယူႇယဝ်ႉ- ဝႃႈၼႆ ။