ႁွင်ႈၵၢၼ်ၾၢႆႇပွင်ႇၶၢဝ်ႇ ႁေႃၶမ်းလူင်မိူင်းၸိုင်ႈထႆး ပိုၼ်ၽၢဝ်ႇမၵ်းမၼ်ႈ ပၵ်းပိူင်မႂ်ႇၵဵဝ်ႇၵပ်းလွင်ႈပၢႆးပၺ်ႇၺႃႇမိူင်းထႆး ႁႂ်ႈလုၵ်ႈဢွၼ်ႇၼႂ်းမိူင်းထႆးလႆႈႁဵၼ်းလိၵ်ႈၵူႈၵေႃႉၽဵင်ႇပဵင်းၵၼ်။

ႁႂ်ႈၾၢႆႇပၢႆးပၺ်ႇၺႃႇလူင်ပွင်ၸိုင်ႈထႆး ႁပ်ႉလုၵ်ႈဢွၼ်ႇၼႂ်းမိူင်းထႆး ႁဵၼ်းလိၵ်ႈလၢႆးၵူႈၵေႃႉ ပဵၼ်လုၵ်ႈႁႅင်းၵၢၼ်ၵေႃႈလီ လုၵ်ႈလၢင်းၵူၼ်းၼွၵ်ႈမိူင်းၸိူဝ်းမႃးယူႇမိူင်းထႆးၵေႃႈယဝ်ႉ ႁႂ်ႈမီးသုၼ်ႇလႆႈႁဵၼ်းလိၵ်ႈလၢႆးမိူၼ်ၵၼ်တင်းမူတ်း ဝႃႈၼႆ။

လိၵ်ႈပိုၼ်ၽၢဝ်ႇၼႆႉဢွၵ်ႇမႃးမိူဝ်ႈ ဝၼ်းတီႈ 30/1/2026 ။

ၼႂ်းလိၵ်ႈၼၼ်ႉပႃးဝႆႉဝႃႈ – လုၵ်ႈလၢင်းႁႅင်းၵၢၼ်ယၢၼ်မိူင်း ၸိူဝ်းဢမ်ႇမီးဝတ်းဝႂ်ၵိူတ်ႇ ဢမ်ႇမီးဝတ်းဝႂ်သင်ၼၼ်ႉ ယူႇတီႈတၢင်းႁွင်ႈၵၢၼ်ၾၢႆႇပၢႆးပၺ်ႇၺႃႇ တေလႆႈဢွၵ်ႇပၼ်မၢႆတူဝ်လုၵ်ႈဢွၼ်ႇ 13 တူဝ် ဢၼ်မီးတူဝ်လိၵ်ႈ G တၢင်းၼႃႈမၼ်း။

လွင်ႈၼႆႉ ၸၢႆးတႆး ဢၼ်ၸွႆႈထႅမ်လွင်ႈႁဵတ်းဝတ်းဝႂ်ႁႅင်းၵၢၼ်တႆး ၼႂ်းမိူင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ-“ ပၵ်းပိူင်ဢၼ်ၼႆႉယၢမ်ႈဢွၵ်ႇမႃးပွၵ်ႈၼိုင်ႈယဝ်ႉ ၵူၺ်းၵႃႈဢမ်ႇတၼ်းလႆႈပဵၼ်ၵၢၼ်။ ၵမ်းၼႆႉပိုၼ်ၽၢဝ်ႇဢွၵ်ႇမႃးထႅင်ႈၵမ်းၼိုင်ႈယဝ်ႉ။ တေပဵၼ်တူဝ် G ၼမ်းၼႃႈ။ သင်ပဵၼ်မႃးတႄႉတႄႉလီယူႇဢေႃႈလုၵ်ႈဢွၼ်ႇႁဝ်းတေလႆႈႁဵၼ်းလိၵ်ႈလီလီ။ ၵူၺ်းၵႃႈပေႃးတူၺ်းငဝ်းလၢႆးၵၢၼ်မိူင်းႁေ ငဝ်းလၢႆးလွင်ႈပၼ်ႁႃႁႅင်းငၢၼ်းမိူင်းမၢၼ်ႈဢၼ်ပဵၼ်ယူႇၼႆႉႁေတႄႉ – လွင်ႈပၼ်သုၼ်ႇလႆႈလုၵ်ႈဢွၼ်ႇၼႆႉ တေႁဵတ်းလႆႈမွၵ်ႈႁိုဝ်ၵူၺ်းဢမ်ႇႁူႉ” – ဝႃႈၼႆ။

ပူၼ်ႉမႃးမွၵ်ႈ4 ပီ လုၵ်ႈဢွၼ်ႇႁႅင်းၵၢၼ်ယၢၼ်မိူင်း လုၵ်ႈဢွၼ်ႇတႆးၵေႃႉၼိုင်ႈယၢမ်ႈမီးဝတ်းဝႂ်တူဝ် G ၼမ်းၼႃႈၸိူင်ႉၼႆ။ ၵူၺ်းၵႃႈ ၽွင်းဢွၵ်ႇလိၵ်ႈ မေႃး 6 သေ တေသိုပ်ႇႁဵၼ်းလိၵ်ႈတီႈၸၼ်ႉၸွမ် မိူင်းလမ်းပၢင်းၼၼ်ႉ ယူႇတီႈၸၼ်ႉၸွမ်လၢတ်ႈဝႃႈ ဝတ်းဝႂ်ဢၼ်ၼႆႉဢမ်ႇမီးသုၼ်ႇႁဵၼ်းလိၵ်ႈၼႆသေ ဢဝ်လုၵ်ႈဢွၼ်ႇၼၼ်ႉလႆႈဢွၵ်ႇမႃးႁဵတ်းၵၢၼ်ႁႃၵိၼ်လဵင်ႉတွင်ႉပႅတ်ႈ – ၵေႃႈယၢမ်ႈမီးမႃး။

ၵူၺ်းၵႃႈၼႂ်းပၵ်းပိူင်မၢႆမီႈၵမ်းၼႆႉတႄႉပႃးဝႆႉဝႃႈ – လုၵ်ႈဢွၼ်ႇဢမ်ႇမီးမၢႆၵပ်းတူဝ်ၵေႃႈ ႁူင်းႁဵၼ်းတေလႆႈႁပ်ႉတႃႇၶဝ်ႈႁဵၼ်းလိၵ်ႈ၊ မီးသုၼ်ႇႁဵၼ်းလိၵ်ႈတေႃႇပေႃးယဝ်ႉၸၼ်ႉလိၵ်ႈသုင်သုတ်းၼႂ်းမိူင်းထႆး ဝႃႈၼႆဝႆႉယူႇ။

ဢၼ်လႆႈပၼ်သုၼ်ႇလုၵ်ႈဢွၼ်ႇၸိူင်ႉၼႆၼႆႉၵေႃႈ ၶႂ်ႈႁႂ်ႈလုမ်ႈၾႃႉဝႆႉၼၵ်း ဝႆႉၵႃႈၶၼ်သုၼ်ႇလႆႈလုၵ်ႈဢွၼ်ႇမိူၼ်ၵၼ် – တႅမ်ႈဝႆႉပႃးၼင်ႇၼႆ။

လွင်ႈတေပၼ်သုၼ်ႇလုၵ်ႈဢွၼ်ႇႁဵၼ်းလိၵ်ႈၵူႈၵေႃႉၼႆႉ တေတႄႇၼႂ်းပီၵၢၼ်ႁဵၼ်းလိၵ်ႈပီတေမႃးၼႆႉ ၼႂ်းလိၵ်ႈၼၼ်ႉတႄႉပႃးဝႆႉၼင်ႇၼႆ။